Read Roman Urdu Geo yasāyāh 33 Bible Online

yasāyāh 33 - Roman Urdu Geo bible

yasāyāh 33

¹tujh par afsos, jo dūsroṅ ko barbād karne ke bāwujūd barbād nahīṅ huā. tujh par afsos, jo dūsroṅ se bewafā thā, hālāṅki tere sāth bewafāī nahīṅ huī. lekin terī bārī bhī āegī. barbādī kā kām takmīl tak pahuṅchāne par tū ḳhud barbād ho jāegā. bewafāī kā kām takmīl tak pahuṅchāne par tere sāth bhī bewafāī kī jāegī.

²ai rab, ham par mehrbānī kar! ham tujh se ummīd rakhte haiṅ. har subh hamārī tāqat ban, musībat ke waqt hamārī rihāī kā bāis ho.

³terī garajtī āwāz sun kar qaumeṅ bhāg jātī haiṅ, tere uṭh khaṛe hone par wuh chāroṅ taraf bikhar jātī haiṅ.

⁴ai qaumo, jo māl tum ne lūṭ liyā wuh dūsre chhīn leṅge. jis tarah ṭiḍḍiyoṅ ke ġhol fasloṅ par jhapaṭ kar sab kuchh chaṭ kar jāte haiṅ usī tarah dūsre tumhārī pūrī milkiyat par ṭūṭ paṛeṅge.

⁵rab sarfarāz hai aur bulandiyoṅ par sukūnat kartā hai. wuhī siyyūn ko insāf aur sadāqat se mālāmāl karegā.

⁶un dinoṅ meṅ wuh terī hifāzat kī zamānat hogā. tujhe najāt, hikmat aur dānāī kā zaḳhīrā hāsil hogā, aur rab kā ḳhauf terā ḳhazānā hogā.

⁷suno, un ke sūrme galiyoṅ meṅ chīḳh rahe haiṅ, amn ke safīr talḳh āheṅ bhar rahe haiṅ.

⁸saṛakeṅ wīrān-o-sunsān haiṅ, aur musāfir un par nazar hī nahīṅ āte. muāhade ko toṛā gayā hai, logoṅ ne us ke gawāhoṅ ko radd karke insān ko haqīr jānā hai.

⁹zamīn ḳhushk ho kar murjhā gaī hai, lubnān kumlā kar sharmindā ho gayā hai. shārūn kā maidān beshajar bayābān sā ban gayā hai, basan aur karmil apne patte jhāṛ rahe haiṅ.

¹⁰lekin rab farmātā hai, “ab maiṅ uṭh khaṛā hūṅgā, ab maiṅ sarfarāz ho kar apnī quwwat kā izhār karūṅga.

¹¹tum ummīd se ho, lekin peṭ meṅ sūkhī ghās hī hai, aur janm dete waqt bhūsā hī paidā hogā. jab tum phūṅk māroge to tumhārā dam āg ban kar tum hī ko rākh kar degā.

¹²aqwām yūṅ bhasm ho jāeṅgī ki chūnā hī rah jāegā, wuh ḳhārdār jhāṛiyoṅ kī tarah kaṭ kar jal jāeṅgī.

¹³ai dūrdarāz ilāqoṅ ke bāshindo, wuh kuchh suno jo maiṅ ne kiyā hai. ai qarīb ke basne wālo, merī qudrat jān lo.”

¹⁴siyyūn meṅ gunāhgār ghabrā gae haiṅ, bedīn pareshānī ke ālam meṅ thartharāte hue chillā rahe haiṅ, “ham meṅ se kaun bhasm karne wālī is āg ke sāmne zindā rah saktā hai? ham meṅ se kaun hameshā tak bhaṛakne wālī is angīṭhī ke qarīb qāim rah saktā hai?”

¹⁵lekin wuh shaḳhs qāim rahegā jo rāst zindagī guzāre aur sachchāī bole, jo ġhairqānūnī nafā aur rishwat lene se inkār kare, jo qātilānā sāzishoṅ aur ġhalat kām se gurez kare.

¹⁶wuhī bulandiyoṅ par basegā aur pahāṛ ke qile meṅ mahfūz rahegā. use roṭī miltī rahegī, aur pānī kī kabhī kamī na hogī.

¹⁷terī āṅkheṅ bādshāh aur us kī pūrī ḳhūbsūratī kā mushāhadā kareṅgī, wuh ek wasī aur dūr dūr tak phailā huā mulk dekheṅgī.

¹⁸tab tū guzare hue haulnāk waqt par ġhaur-o-ḳhauz karke pūchhegā, “dushman ke baṛe afsar kidhar haiṅ? ṭaiks lene wālā kahāṅ ġhāib huā? wuh afsar kidhar hai jo burjoṅ kā hisāb-kitāb kartā thā?”

¹⁹āindā tujhe yih gustāḳh qaum nazar nahīṅ āegī, yih log jo nāqābil-e-fahm zabān bolte aur haklāte hue aisī bāteṅ karte haiṅ jo samajh meṅ nahīṅ ātīṅ.

²⁰hamārī īdoṅ ke shahr siyyūn par nazar ḍāl! terī āṅkheṅ yarūshalam ko dekheṅgī. us waqt wuh mahfūz sukūnatgāh hogā, ek ḳhaimā jo āindā kabhī nahīṅ haṭegā, jis kī meḳheṅ kabhī nahīṅ nikleṅgī, aur jis kā ek rassā bhī nahīṅ ṭūṭegā.

²¹wahāṅ rab hī hamārā zor-āwar āqā hogā, aur shahr daryāoṅ kā maqām hogā, aisī chauṛī nadiyoṅ kā maqām jin par na chappū wālī kashtī, na shāndār jahāz chalegā.

²²kyūṅki rab hī hamārā qāzī, rab hī hamārā sardār aur rab hī hamārā bādshāh hai. wuhī hameṅ chhuṭkārā degā.

²³dushman kā beṛā ġharq hone wālā hai. bādbān ke rasse ḍhīle haiṅ, aur na wuh mastūl ko mazbūt rakhne, na bādbān ko phailāe rakhne meṅ madad dete haiṅ. us waqt kasrat kā lūṭā huā māl baṭegā, balki itnā māl hogā ki langaṛe bhī lūṭne meṅ shirkat kareṅge.

²⁴siyyūn kā koī bhī fard nahīṅ kahegā, “maiṅ kamzor hūṅ,” kyūṅki us ke bāshindoṅ ke gunāh baḳhshe gae hoṅge.