Read Roman Urdu Geo yasāyāh 36 Bible Online

yasāyāh 36 - Roman Urdu Geo bible

yasāyāh 36

¹hizqiyāh bādshāh kī hukūmat ke 14weṅ sāl meṅ asūr ke bādshāh sanherib ne yahūdāh ke tamām qilāband shahroṅ par dhāwā bol kar un par qabzā kar liyā.

²phir us ne apne ālā afsar rabshāqī ko baṛī fauj ke sāth lakīs se yarūshalam ko bhejā. yarūshalam pahuṅch kar rabshāqī us nāle ke pās ruk gayā jo pānī ko ūpar wāle tālāb tak pahuṅchātā hai (yih tālāb us rāste par hai jo dhobiyoṅ ke ghāṭ tak le jātā hai).

³yih dekh kar mahal kā inchārj iliyāqīm bin ḳhilqiyāh, mīrmunshī shibnāh aur mushīr-e-ḳhās yūāḳh bin āsaf shahr se nikal kar us se milne āe.

⁴rabshāqī ne un ke hāth hizqiyāh ko paiġhām bhejā, “asūr ke azīm bādshāh farmāte haiṅ, tumhārā bharosā kis chīz par hai?

⁵tum samajhte ho ki ḳhālī bāteṅ karnā faujī hikmat-e-amlī aur tāqat ke barābar hai. yih kaisī bāt hai? tum kis par etimād kar rahe ho ki mujh se sarkash ho gae ho?

⁶kyā tum misr par bharosā karte ho? wuh to ṭūṭā huā sarkanḍā hī hai. jo bhī us par ṭek lagāe us kā hāth wuh chīr kar zaḳhmī kar degā. yihī kuchh un sab ke sāth ho jāegā jo misr ke bādshāh fir'aun par bharosā kareṅ!

⁷shāyad tum kaho, ‘ham rab apne ḳhudā par tawakkul karte haiṅ.’ lekin yih kis tarah ho saktā hai? hizqiyāh ne to us kī behurmatī kī hai. kyūṅki us ne ūṅchī jaghoṅ ke mandiroṅ aur qurbāngāhoṅ ko ḍhā kar yahūdāh aur yarūshalam se kahā hai ki sirf yarūshalam kī qurbāngāh ke sāmne parastish kareṅ.

⁸āo, mere āqā asūr ke bādshāh se saudā karo. maiṅ tumheṅ 2,000 ghoṛe dūṅgā basharteki tum un ke lie sawār muhayyā kar sako. lekin afsos, tumhāre pās itne ghuṛsawār haiṅ hī nahīṅ!

⁹tum mere āqā asūr ke bādshāh ke sab se chhoṭe afsar kā bhī muqābalā nahīṅ kar sakte. lihāzā misr ke rathoṅ par bharosā rakhne kā kyā fāidā?

¹⁰shāyad tum samajhte ho ki maiṅ rab kī marzī ke baġhair hī is mulk par hamlā karne āyā hūṅ tāki sab kuchh barbād karūṅ. lekin aisā hargiz nahīṅ hai! rab ne ḳhud mujhe kahā ki is mulk par dhāwā bol kar ise tabāh kar de.”

¹¹yih sun kar iliyāqīm, shibnāh aur yūāḳh ne rabshāqī kī taqrīr meṅ daḳhl de kar kahā, “barāh-e-karm arāmī zabān meṅ apne ḳhādimoṅ ke sāth guftgū kījie, kyūṅki ham yih achchhī tarah bol lete haiṅ. ibrānī zabān istemāl na kareṅ, warnā shahr kī fasīl par khaṛe log āp kī bāteṅ sun leṅge.”

¹²lekin rabshāqī ne jawāb diyā, “kyā tum samajhte ho ki mere mālik ne yih paiġhām sirf tumheṅ aur tumhāre mālik ko bhejā hai? hargiz nahīṅ! wuh chāhte haiṅ ki tamām log yih bāteṅ sun leṅ. kyūṅki wuh bhī tumhārī tarah apnā fuzlā khāne aur apnā peshāb pīne par majbūr ho jāeṅge.”

¹³phir wuh fasīl kī taraf muṛ kar buland āwāz se ibrānī zabān meṅ awām se muḳhātib huā, “suno! shahanshāh, asūr ke bādshāh ke farmān par dhyān do!

¹⁴bādshāh farmāte haiṅ ki hizqiyāh tumheṅ dhokā na de. wuh tumheṅ bachā nahīṅ saktā.

¹⁵beshak wuh tumheṅ tasallī dilāne kī koshish karke kahtā hai, ‘rab hameṅ zarūr chhuṭkārā degā, yih shahr kabhī bhī asūrī bādshāh ke qabze meṅ nahīṅ āegā.’ lekin is qism kī bātoṅ se tasallī pā kar rab par bharosā mat karnā.

¹⁶hizqiyāh kī bāteṅ na māno balki asūr ke bādshāh kī. kyūṅki wuh farmāte haiṅ, mere sāth sulah karo aur shahr se nikal kar mere pās ā jāo. phir tum meṅ se har ek angūr kī apnī bel aur anjīr ke apne daraḳht kā phal khāegā aur apne hauz kā pānī piegā.

¹⁷phir kuchh der ke bād maiṅ tumheṅ ek aise mulk meṅ le jāūṅgā jo tumhāre apne mulk kī mānind hogā. us meṅ bhī anāj aur naī mai, roṭī aur angūr ke bāġh haiṅ.

¹⁸hizqiyāh kī mat sunanā. jab wuh kahtā hai, ‘rab hameṅ bachāegā’ to wuh tumheṅ dhokā de rahā hai. kyā dīgar aqwām ke dewatā apne mulkoṅ ko shāh-e-asūr se bachāne ke qābil rahe haiṅ?

¹⁹hamāt aur arfād ke dewatā kahāṅ rah gae haiṅ? sifarwāim ke dewatā kyā kar sake? aur kyā kisī dewatā ne sāmariyya ko merī girift se bachāyā?

²⁰nahīṅ, koī bhī dewatā apnā mulk mujh se bachā na sakā. to phir rab yarūshalam ko kis tarah mujh se bachāegā?”

²¹fasīl par khaṛe log ḳhāmosh rahe. unhoṅ ne koī jawāb na diyā, kyūṅki bādshāh ne hukm diyā thā ki jawāb meṅ ek lafz bhī na kaheṅ.

²²phir mahal kā inchārj iliyāqīm bin ḳhilqiyāh, mīrmunshī shibnāh aur mushīr-e-ḳhās yūāḳh bin āsaf ranjish ke māre apne libās phāṛ kar hizqiyāh ke pās wāpas gae. darbār meṅ pahuṅch kar unhoṅ ne bādshāh ko sab kuchh kah sunāyā jo rabshāqī ne unheṅ kahā thā.