Read Roman Urdu Geo yasāyāh 39 Bible Online

yasāyāh 39 - Roman Urdu Geo bible

yasāyāh 39

¹thoṛī der ke bād bābal ke bādshāh marūdak-baladān bin baladān ne hizqiyāh kī bīmārī aur shifā kī ḳhabar sun kar wafd ke hāth ḳhat aur tohfe bheje.

²hizqiyāh ne ḳhushī se wafd kā istiqbāl karke use wuh tamām ḳhazāne dikhāe jo zaḳhīrāḳhāne meṅ mahfūz rakhe gae the yānī tamām sonā-chāṅdī, balsān kā tel aur bāqī qīmtī tel. us ne pūrā aslihāḳhānā aur bāqī sab kuchh bhī dikhāyā jo us ke ḳhazānoṅ meṅ thā. pūre mahal aur pūre mulk meṅ koī ḳhās chīz na rahī jo us ne unheṅ na dikhāī.

³tab yasāyāh nabī hizqiyāh bādshāh ke pās āyā aur pūchhā, “in ādmiyoṅ ne kyā kahā? kahāṅ se āe haiṅ?” hizqiyāh ne jawāb diyā, “dūrdarāz mulk bābal se mere pās āe haiṅ.”

⁴yasāyāh bolā, “unhoṅ ne mahal meṅ kyā kuchh dekhā?” hizqiyāh ne kahā, “unhoṅ ne mahal meṅ sab kuchh dekh liyā hai. mere ḳhazānoṅ meṅ koī chīz na rahī jo maiṅ ne unheṅ nahīṅ dikhāī.”

⁵tab yasāyāh ne kahā, “rabb-ul-afwāj kā farmān suneṅ!

⁶ek din āne wālā hai ki tere mahal kā tamām māl chhīn liyā jāegā. jitne bhī ḳhazāne tū aur tere bāpdādā ne āj tak jamā kie haiṅ un sab ko dushman bābal le jāegā. rab farmātā hai ki ek bhī chīz pīchhe nahīṅ rahegī.

⁷tere beṭoṅ meṅ se bhī bāz chhīn lie jāeṅge, aise jo ab tak paidā nahīṅ hue. tab wuh ḳhwājāsarā ban kar shāh-e-bābal ke mahal meṅ ḳhidmat kareṅge.”

⁸hizqiyāh bolā, “rab kā jo paiġhām āp ne mujhe diyā hai wuh ṭhīk hai.” kyūṅki us ne sochā, “baṛī bāt yih hai ki mere jīte jī amn-o-amān hogā.”