Read Roman Urdu Geo yasāyāh 42 Bible Online

yasāyāh 42 - Roman Urdu Geo bible

yasāyāh 42

¹dekho, merā ḳhādim jise maiṅ qāim rakhtā hūṅ, merā barguzīdā jo mujhe pasand hai. maiṅ apne rūh ko us par ḍālūṅgā, aur wuh aqwām meṅ insāf qāim karegā.

²wuh na to chīḳhegā, na chillāegā, galiyoṅ meṅ us kī āwāz sunāī nahīṅ degī.

³na wuh kuchle hue sarkanḍe ko toṛegā, na bujhtī huī battī ko bujhāegā. wafādārī se wuh insāf qāim karegā.

⁴aur jab tak us ne duniyā meṅ insāf qāim na kar liyā ho tab tak na us kī battī bujhegī, na use kuchlā jāegā. jazīre us kī hidāyat se ummīd rakheṅge.”

⁵rab ḳhudā ne āsmān ko ḳhalaq karke ḳhaime kī tarah zamīn ke ūpar tān liyā. usī ne zamīn ko aur jo kuchh us meṅ se phūṭ nikaltā hai tashkīl diyā, aur usī ne rū-e-zamīn par basne aur chalne wāloṅ meṅ dam phūṅk kar jān ḍālī. ab yihī ḳhudā apne ḳhādim se farmātā hai,

⁶“maiṅ, rab ne insāf se tujhe bulāyā hai. maiṅ tere hāth ko pakaṛ kar tujhe mahfūz rakhūṅgā. kyūṅki maiṅ tujhe qaum kā ahd aur dīgar aqwām kī raushnī banā dūṅgā

⁷tāki tū andhoṅ kī āṅkheṅ khole, qaidiyoṅ ko koṭhaṛī se rihā kare aur tārīkī kī qaid meṅ basne wāloṅ ko chhuṭkārā de.

⁸maiṅ rab hūṅ, yihī merā nām hai! maiṅ bardāsht nahīṅ karūṅga ki jo jalāl mujhe milnā hai wuh kisī aur ko de diyā jāe, ki log butoṅ kī tamjīd kareṅ jabki unheṅ merī tamjīd karnī chāhie.

⁹dekho, jis kī bhī peshgoī maiṅ ne kī thī wuh wuqū meṅ āyā hai. ab maiṅ naī bātoṅ kā elān kartā hūṅ. is se pahle ki wuh wujūd meṅ āeṅ maiṅ unheṅ tumheṅ sunā detā hūṅ.”

¹⁰rab kī tamjīd meṅ gīt gāo, duniyā kī intihā tak us kī madahsarāī karo! ai samundar ke musāfiro aur jo kuchh us meṅ hai, us kī satāish karo! ai jazīro, apne bāshindoṅ samet us kī tārīf karo!

¹¹bayābān aur us ke qasbe ḳhushī ke nāre lagāeṅ, jin ābādiyoṅ meṅ qīdār bastā hai wuh shādmān hoṅ. silā ke bāshinde bāġh bāġh ho kar pahāṛoṅ kī choṭiyoṅ par zor se shādiyānā bajāeṅ.

¹²sab rab ko jalāl deṅ aur jazīroṅ tak us kī tārīf phailāeṅ.

¹³rab sūrme kī tarah laṛne ke lie niklegā, faujī kī tarah josh meṅ āegā aur jang ke nāre lagā lagā kar apne dushmanoṅ par ġhālib āegā.

¹⁴wuh farmātā hai, “maiṅ baṛī der se ḳhāmosh rahā hūṅ. maiṅ chup rahā aur apne āp ko roktā rahā. lekin ab maiṅ dard-e-zah meṅ mubtalā aurat kī tarah karāhtā hūṅ. merā sāṅs phūl jātā aur maiṅ betābī se hāṅptā rahtā hūṅ.

¹⁵maiṅ pahāṛoṅ aur pahāṛiyoṅ ko tabāh karke un kī tamām hariyālī jhulsā dūṅgā. daryā ḳhushk zamīn ban jāeṅge, aur johaṛ sūkh jāeṅge.

¹⁶maiṅ andhoṅ ko aisī rāhoṅ par le chalūṅgā jin se wuh wāqif nahīṅ hoṅge, ġhairmānūs rāstoṅ par un kī rāhnumāī karūṅga. un ke āge maiṅ andhere ko raushan aur nāhamwār zamīn ko hamwār karūṅga. yih sab kuchh maiṅ saranjām dūṅgā, ek bāt bhī adhūrī nahīṅ rah jāegī.

¹⁷lekin jo butoṅ par bharosā rakh kar un se kahte haiṅ, ‘tum hamāre dewatā ho’ wuh saḳht sharm khā kar pīchhe haṭ jāeṅge.

¹⁸ai bahro, suno! ai andho, nazar uṭhāo tāki dekh sako!

¹⁹kaun mere ḳhādim jaisā andhā hai? kaun mere paiġhambar jaisā bahrā hai, us jaisā jise maiṅ bhej rahā hūṅ? go maiṅ ne us ke sāth ahd bāndhā to bhī rab ke ḳhādim jaisā andhā aur nābīnā koī nahīṅ hai.

²⁰go tū ne bahut kuchh dekhā hai tū ne tawajjuh nahīṅ dī, go tere kān har bāt sun lete haiṅ tū suntā nahīṅ.”

²¹rab ne apnī rāstī kī ḳhātir apnī sharīat kī azmat aur jalāl ko baṛhāyā hai, kyūṅki yih us kī marzī thī.

²²lekin ab us kī qaum ko ġhārat kiyā gayā, sab kuchh lūṭ liyā gayā hai. sab ke sab gaṛhoṅ meṅ jakaṛe yā jeloṅ meṅ chhupāe hue haiṅ. wuh lūṭ kā māl ban gae haiṅ, aur koī nahīṅ hai jo unheṅ bachāe. unheṅ chhīn liyā gayā hai, aur koī nahīṅ hai jo kahe, “unheṅ wāpas karo!”

²³kāsh tum meṅ se koī dhyān de, koī āindā ke lie tawajjuh de.

²⁴soch lo! kis ne ijāzat dī ki yāqūb kī aulād ko ġhārat kiyā jāe? kis ne isrāīl ko luṭeroṅ ke hawāle kar diyā? kyā yih rab kī taraf se nahīṅ huā, jis ke ḳhilāf ham ne gunāh kiyā hai? log to us kī rāhoṅ par chalnā hī nahīṅ chāhte the, wuh us kī sharīat ke tābe rahne ke lie tayyār hī na the.

²⁵isī wajah se us ne un par apnā saḳht ġhazab nāzil kiyā, unheṅ shadīd jang kī zad meṅ āne diyā. lekin afsos, go āg ne qaum ko gher kar jhulsā diyā tāham use samajh nahīṅ āī, go wuh bhasm huī to bhī us ne dil se sabaq nahīṅ sīkhā.