Read Roman Urdu Geo yasāyāh 43 Bible Online

yasāyāh 43 - Roman Urdu Geo bible

yasāyāh 43

¹lekin ab rab jis ne tujhe ai yāqūb ḳhalaq kiyā aur tujhe ai isrāīl tashkīl diyā farmātā hai, “ḳhauf mat khā, kyūṅki maiṅ ne iwazānā de kar tujhe chhuṛāyā hai, maiṅ ne terā nām le kar tujhe bulāyā hai, tū merā hī hai.

²pānī kī gahrāiyoṅ meṅ se guzarte waqt maiṅ tere sāth hūṅgā, daryāoṅ ko pār karte waqt tū nahīṅ ḍūbegā. āg meṅ se guzarte waqt na tū jhulas jāegā, na sholoṅ se bhasm ho jāegā.

³kyūṅki maiṅ rab terā ḳhudā hūṅ, maiṅ isrāīl kā quddūs aur terā najātdahindā hūṅ. tujhe chhuṛāne ke lie maiṅ iwazānā ke taur par misr detā, terī jagah ethūpiyā aur sibā adā kartā hūṅ.

⁴tū merī nazar meṅ qīmtī aur azīz hai, tū mujhe pyārā hai, is lie maiṅ tere badle meṅ log aur terī jān ke iwaz qaumeṅ adā kartā hūṅ.

⁵chunāṅche mat ḍarnā, kyūṅki maiṅ tere sāth hūṅ. maiṅ terī aulād ko mashriq aur maġhrib se jamā karke wāpas lāūṅgā.

⁶shimāl ko maiṅ hukm dūṅgā, ‘mujhe do!’ aur junūb ko, ‘unheṅ mat roknā!’ mere beṭe-beṭiyoṅ ko duniyā kī intihā se wāpas le āo,

⁷un sab ko jo merā nām rakhte haiṅ aur jinheṅ maiṅ ne apne jalāl kī ḳhātir ḳhalaq kiyā, jinheṅ maiṅ ne tashkīl de kar banāyā hai.”

⁸us qaum ko nikāl lāo jo āṅkheṅ rakhne ke bāwujūd dekh nahīṅ saktī, jo kān rakhne ke bāwujūd sun nahīṅ saktī.

⁹tamām ġhairqaumeṅ jamā ho jāeṅ, tamām ummateṅ ikaṭṭhī ho jāeṅ. un meṅ se kaun is kī peshgoī kar saktā, kaun māzī kī bāteṅ sunā saktā hai? wuh apne gawāhoṅ ko pesh kareṅ jo unheṅ durust sābit kareṅ, tāki log sun kar kaheṅ, “un kī bāt bilkul sahīh hai.”

¹⁰lekin rab farmātā hai, “ai isrāīlī qaum, tum hī mere gawāh ho, tum hī mere ḳhādim ho jise maiṅ ne chun liyā tāki tum jān lo, mujh par īmān lāo aur pahchān lo ki maiṅ hī hūṅ. na mujh se pahle koī ḳhudā wujūd meṅ āyā, na mere bād koī āegā.

¹¹maiṅ, sirf maiṅ rab hūṅ, aur mere siwā koī aur najātdahindā nahīṅ hai.

¹²maiṅ hī ne is kā elān karke tumheṅ chhuṭkārā diyā, maiṅ hī tumheṅ apnā kalām pahuṅchātā rahā. aur yih tumhāre darmiyān ke kisī ajnabī mābūd se kabhī nahīṅ huā balki sirf mujh hī se. tum hī mere gawāh ho ki maiṅ hī ḳhudā hūṅ.” yih rab kā farmān hai.

¹³“azal se maiṅ wuhī hūṅ. koī nahīṅ hai jo mere hāth se chhuṛā sake. jab maiṅ kuchh amal meṅ lātā hūṅ to kaun ise badal saktā hai?”

¹⁴rab jo tumhārā chhuṛāne wālā aur isrāīl kā quddūs hai farmātā hai, “tumhārī ḳhātir maiṅ bābal ke ḳhilāf fauj bhej kar tamām kunḍe tuṛwā dūṅgā. tab bābal kī shādmānī giryā-o-zārī meṅ badal jāegī.

¹⁵maiṅ rab hūṅ, tumhārā quddūs jo isrāīl kā ḳhāliq aur tumhārā bādshāh hai.”

¹⁶rab farmātā hai, “maiṅ hī ne samundar meṅ se guzarne kī rāh aur gahre pānī meṅ se rāstā banā diyā.

¹⁷mere kahne par misr kī fauj apne sūrmāoṅ, rathoṅ aur ghoṛoṅ samet laṛne ke lie nikal āī. ab wuh mil kar samundar kī tah meṅ paṛe hue haiṅ aur dubārā kabhī nahīṅ uṭheṅge. wuh battī kī tarah bujh gae.

¹⁸lekin māzī kī bāteṅ chhoṛ do, jo kuchh guzar gayā hai us par dhyān na do.

¹⁹kyūṅki dekho, maiṅ ek nayā kām wujūd meṅ lā rahā hūṅ jo abhī phūṭ nikalne ko hai. kyā yih tumheṅ nazar nahīṅ ā rahā? maiṅ registān meṅ rāstā aur bayābān meṅ nahreṅ banā rahā hūṅ.

²⁰janglī jānwar, gīdaṛ aur uqābī ullū merā ehtirām kareṅge, kyūṅki maiṅ registān meṅ pānī muhayyā karūṅga, bayābān meṅ nahreṅ banāūṅgā tāki apnī barguzīdā qaum ko pānī pilāūṅ.

²¹jo qaum maiṅ ne apne lie tashkīl dī hai wuh mere kām sunā kar merī tamjīd kare.

²²ai yāqūb kī aulād, ai isrāīl, bāt yih nahīṅ ki tū ne mujh se faryād kī, ki tū merī marzī daryāft karne ke lie koshāṅ rahā.

²³kyūṅki na tū ne mere lie apnī bheṛ-bakriyāṅ bhasm kīṅ, na apnī zabah kī qurbāniyoṅ se merā ehtirām kiyā. na maiṅ ne ġhallā kī nazaroṅ se tujh par bojh ḍālā, na baḳhūr kī qurbānī se tang kiyā.

²⁴tū ne na mere lie qīmtī masālā ḳharīdā, na mujhe apnī qurbāniyoṅ kī charbī se ḳhush kiyā. is ke baraks tū ne apne gunāhoṅ se mujh par bojh ḍālā aur apnī burī harkatoṅ se mujhe tang kiyā.

²⁵tāham maiṅ, hāṅ maiṅ hī apnī ḳhātir tere jarāim ko miṭā detā aur tere gunāhoṅ ko zahan se nikāl detā hūṅ.

²⁶jā, kachahrī meṅ mere ḳhilāf muqaddamā dāir kar! ā, ham donoṅ adālat meṅ hāzir ho jāeṅ! apnā muāmalā pesh kar tāki tū bequsūr sābit ho.

²⁷shurū meṅ tere ḳhāndān ke bānī ne gunāh kiyā, aur us waqt se le kar āj tak tere numāinde mujh se bewafā hote āe haiṅ.

²⁸is lie maiṅ maqdis ke buzurgoṅ ko yūṅ ruswā karūṅga ki un kī muqaddas hālat jātī rahegī, maiṅ yāqūb kī aulād isrāīl ko mukammal tabāhī aur lān-tān ke lie maḳhsūs karūṅga.