Read Roman Urdu Geo yasāyāh 44 Bible Online

yasāyāh 44 - Roman Urdu Geo bible

yasāyāh 44

¹lekin ab sun, ai yāqūb mere ḳhādim! merī bāt par tawajjuh de, ai isrāīl jise maiṅ ne chun liyā hai.

²rab jis ne tujhe banāyā aur māṅ ke peṭ se hī tashkīl de kar terī madad kartā āyā hai wuh farmātā hai, ‘ai yāqūb mere ḳhādim, mat ḍar! ai yasūrūn jise maiṅ ne chun liyā hai, ḳhauf na khā.

³kyūṅki maiṅ pyāsī zamīn par pānī ḍālūṅgā aur ḳhushkī par nadiyāṅ bahne dūṅgā. maiṅ apnā rūh terī aulād par nāzil karūṅga, apnī barkat tere bachchoṅ ko baḳhshūṅgā.

⁴tab wuh pānī ke darmiyān kī hariyālī kī tarah phūṭ nikleṅge, nahroṅ par safedā ke daraḳhtoṅ kī tarah phaleṅ phūleṅge.’

⁵ek kahegā, ‘maiṅ rab kā hūṅ,’ dūsrā yāqūb kā nām le kar pukāregā aur tīsrā apne hāth par ‘rab kā bandā’ likh kar isrāīl kā ezāzī nām rakhegā.”

⁶rabb-ul-afwāj jo isrāīl kā bādshāh aur chhuṛāne wālā hai farmātā hai, “maiṅ awwal aur āḳhir hūṅ. mere siwā koī aur ḳhudā nahīṅ hai.

⁷kaun merī mānind hai? wuh āwāz de kar batāe aur apne dalāil pesh kare. wuh tartīb se sab kuchh sunāe jo us qadīm waqt se huā hai jab maiṅ ne apnī qaum ko qāim kiyā. wuh āne wālī bātoṅ kā elān karke batāe ki āindā kyā kuchh pesh āegā.

⁸ghabrā kar dahshatzadā na ho. kyā maiṅ ne bahut der pahle tujhe ittilā nahīṅ dī thī ki yih kuchh pesh āegā? tum ḳhud mere gawāh ho. kyā mere siwā koī aur ḳhudā hai? hargiz nahīṅ! aur koī chaṭān nahīṅ hai, maiṅ kisī aur ko nahīṅ jāntā.”

⁹but banāne wāle sab hech hī haiṅ, aur jo chīzeṅ unheṅ pyārī lagtī haiṅ wuh befāidā haiṅ. un ke gawāh na dekh aur na jān sakte haiṅ, lihāzā āḳhirkār sharmindā ho jāeṅge.

¹⁰yih kis tarah ke log haiṅ jo apne lie dewatā banāte aur befāidā but ḍhāl lete haiṅ?

¹¹un ke tamām sāthī sharmindā ho jāeṅge. āḳhir but banāne wāle insān hī to haiṅ. āo, wuh sab jamā ho kar ḳhudā ke huzūr khaṛe ho jāeṅ. kyūṅki wuh dahshat khā kar saḳht sharmindā ho jāeṅge.

¹²lohār auzār le kar use jalte hue koeloṅ meṅ istemāl kartā hai. phir wuh apne hathauṛe se ṭhoṅk ṭhoṅk kar but ko tashkīl detā hai. pūre zor se kām karte karte wuh tāqat ke jawāb dene tak bhūkā ho jātā, pānī na pīne kī wajah se niḍhāl ho jātā hai.

¹³jab but ko lakaṛī se banānā hai to kārīgar fīte se nāp kar painsil se lakaṛī par ḳhākā khaiṅchtā hai. parkār bhī kām ā jātā hai. phir kārīgar lakaṛī ko chhurī se tarāsh tarāsh kar ādmī kī shakl banātā hai. yūṅ shāndār ādmī kā mujassamā kisī ke ghar meṅ lagne ke lie tayyār ho jātā hai.

¹⁴kārīgar but banāne ke lie deodār kā daraḳht kāṭ letā hai. kabhī kabhī wuh balūt yā kisī aur qism kā daraḳht chun kar use jangal ke dīgar daraḳhtoṅ ke bīch meṅ ugne detā hai. yā wuh sanobar [21] kā daraḳht lagātā hai, aur bārish use phalne phūlne detī hai.

¹⁵dhyān do ki insān lakaṛī ko īṅdhan ke lie bhī istemāl kartā, kuchh le kar āg tāptā, kuchh jalā kar roṭī pakātā hai. bāqī hisse se wuh but banā kar use sijdā kartā, dewatā kā mujassamā tayyār karke us ke sāmne jhuk jātā hai.

¹⁶wuh lakaṛī kā ādhā hissā jalā kar us par apnā gosht bhūntā, phir jī bhar kar khānā khātā hai. sāth sāth wuh āg seṅk kar kahtā hai, “wāh, āg kī garmī kitnī achchhī lag rahī hai, ab garmī mahsūs ho rahī hai.”

¹⁷lekin bāqī lakaṛī se wuh apne lie dewatā kā but banātā hai jis ke sāmne wuh jhuk kar pūjā kartā hai. us se wuh iltimās kartā hai, “mujhe bachā, kyūṅki tū merā dewatā hai.”

¹⁸yih log kuchh nahīṅ jānte, kuchh nahīṅ samajhte. un kī āṅkhoṅ aur diloṅ par pardā paṛā hai, is lie na wuh dekh sakte, na samajh sakte haiṅ.

¹⁹wuh is par ġhaur nahīṅ karte, unheṅ fahm aur samajh tak nahīṅ ki socheṅ, “maiṅ ne lakaṛī kā ādhā hissā āg meṅ jhoṅk kar us ke koeloṅ par roṭī pakāī aur gosht bhūn liyā. yih chīzeṅ khāne ke bād maiṅ bāqī lakaṛī se qābil-e-ghin but kyūṅ banāūṅ, lakaṛī ke ṭukṛe ke sāmne kyūṅ jhuk jāūṅ?”

²⁰jo yūṅ rākh meṅ mulawwas ho jāe us ne dhokā khāyā, us ke dil ne use fareb diyā hai. wuh apnī jān chhuṛā kar nahīṅ mān saktā ki jo but maiṅ dahne hāth meṅ thāme hue hūṅ wuh jhūṭ hai.

²¹“ai yāqūb kī aulād, ai isrāīl, yād rakh ki tū merā ḳhādim hai. maiṅ ne tujhe tashkīl diyā, tū merā hī ḳhādim hai. ai isrāīl, maiṅ tujhe kabhī nahīṅ bhūlūṅgā.

²²maiṅ ne tere jarāim aur gunāhoṅ ko miṭā ḍālā hai, wuh dhūp meṅ dhund yā tez hawā se bikhre bādaloṅ kī tarah ojhal ho gae haiṅ. ab mere pās wāpas ā, kyūṅki maiṅ ne iwazānā de kar tujhe chhuṛāyā hai.”

²³ai āsmān, ḳhushī ke nāre lagā, kyūṅki rab ne sab kuchh kiyā hai. ai zamīn kī gahrāiyo, shādiyānā bajāo! ai pahāṛo aur janglo, apne tamām daraḳhtoṅ samet ḳhushī ke gīt gāo, kyūṅki rab ne iwazānā de kar yāqūb ko chhuṛāyā hai, isrāīl meṅ us ne apnā jalāl zāhir kiyā hai.

²⁴rab terā chhuṛāne wālā jis ne tujhe māṅ ke peṭ se hī tashkīl diyā farmātā hai, “maiṅ rab hūṅ. maiṅ hī sab kuchh wujūd meṅ lāyā, maiṅ ne akele hī āsmān ko zamīn ke ūpar tān liyā aur zamīn ko bichhāyā.

²⁵maiṅ hī qismat kā hāl batāne wāloṅ ke ajīb-o-ġharīb nishān nākām hone detā, fāl kholne wāloṅ ko ahmaq sābit kartā aur dānāoṅ ko pīchhe haṭā kar un ke ilm kī hamāqat zāhir kartā hūṅ.

²⁶maiṅ hī apne ḳhādim kā kalām pūrā hone detā aur apne paiġhambaroṅ kā mansūbā takmīl tak pahuṅchātā hūṅ, maiṅ hī yarūshalam ke bāre meṅ farmātā hūṅ, ‘wuh dubārā ābād ho jāegā,’ aur yahūdāh ke shahroṅ ke bāre meṅ, ‘wuh nae sire se tāmīr ho jāeṅge, maiṅ un ke khanḍarāt dubārā khaṛe karūṅga.’

²⁷maiṅ hī gahre samundar ko hukm detā hūṅ, ‘sūkh jā, maiṅ terī gahrāiyoṅ ko ḳhushk kartā hūṅ.’

²⁸aur maiṅ hī ne ḳhoras ke bāre meṅ farmāyā, ‘yih merā gallābān hai! yihī merī marzī pūrī karke kahegā ki yarūshalam dubārā tāmīr kiyā jāe, rab ke ghar kī bunyād nae sire se rakhī jāe’!”