Read Roman Urdu Geo yasāyāh 47 Bible Online

yasāyāh 47 - Roman Urdu Geo bible

yasāyāh 47

¹ai kuṅwārī bābal beṭī, utar jā! ḳhāk meṅ baiṭh jā! ai bābliyoṅ kī beṭī, zamīn par baiṭh jā jahāṅ taḳht nahīṅ hai! ab se log tujh se nahīṅ kaheṅge, ‘ai merī nāz-parwardā, ai merī lāḍlī!’

²ab chakkī le kar āṭā pīs! apnā niqāb haṭā, apne libās kā dāman uṭhā, apnī ṭāṅgoṅ ko uriyāṅ karke nadiyāṅ pār kar.

³terī barahnagī sab par zāhir hogī, sab terī sharmsār hālat dekheṅge. kyūṅki maiṅ badlā le kar kisī ko nahīṅ chhoṛūṅgā.”

⁴jis ne iwazānā de kar hameṅ chhuṛāyā hai wuhī yih farmātā hai, wuh jis kā nām rabb-ul-afwāj hai aur jo isrāīl kā quddūs hai.

⁵“ai bābliyoṅ kī beṭī, chupke se baiṭh jā! tārīkī meṅ chhup jā! āindā tū ‘mamālik kī malikā’ nahīṅ kahlāegī.

⁶jab mujhe apnī qaum par ġhussā āyā to maiṅ ne use yūṅ ruswā kiyā ki us kī muqaddas hālat jātī rahī, go wuh merā maurūsī hissā thī. us waqt maiṅ ne unheṅ tere hawāle kar diyā, lekin tū ne un par rahm na kiyā balki būṛhoṅ kī gardan par bhī apnā bhārī jūā rakh diyā.

⁷tū bolī, ‘maiṅ abad tak malikā hī rahūṅgī!’ tū ne sanjīdagī se dhyān na diyā, na is ke anjām par ġhaur kiyā.

⁸ab sun, ai ayyāsh, tū jo apne āp ko mahfūz samajh kar kahtī hai, ‘maiṅ hī hūṅ, mere siwā koī aur nahīṅ hai. maiṅ na kabhī bewā, na kabhī beaulād hūṅgī.’

⁹maiṅ farmātā hūṅ ki ek hī din aur ek hī lamhe meṅ tū beaulād bhī banegī aur bewā bhī. tere sāre zabardast jādūmantar ke bāwujūd yih āfat pūre zor se tujh par āegī.

¹⁰tū ne apnī badkārī par etimād karke sochā, ‘koī nahīṅ mujhe deḳhtā.’ lekin terī ‘hikmat’ aur ‘ilm’ tujhe ġhalat rāh par lāyā hai. un kī binā par tū ne dil meṅ kahā, ‘maiṅ hī hūṅ, mere siwā koī aur nahīṅ hai.’

¹¹ab tujh par aisī āfat āegī jise tere jādūmantar dūr karne nahīṅ pāeṅge, tū aisī musībat meṅ phaṅs jāegī jis se nipaṭ nahīṅ sakegī. achānak hī tujh par tabāhī nāzil hogī, aur tū us ke lie tayyār hī nahīṅ hogī.

¹²ab khaṛī ho jā, apne jādū-ṭone kā pūrā ḳhazānā khol kar sab kuchh istemāl meṅ lā jo tū ne jawānī se baṛī mehnat-mashaqqat ke sāth apnā liyā hai. shāyad fāidā ho, shāyad tū logoṅ ko ḍarā kar bhagā sake.

¹³lekin dūsroṅ ke beshumār mashware bekār haiṅ, unhoṅ ne tujhe sirf thakā diyā hai. ab tere najūmī khaṛe ho jāeṅ, jo sitāroṅ ko dekh dekh kar har mahīne peshgoiyāṅ karte haiṅ wuh sāmne ā kar tujhe us se bachāeṅ jo tujh par āne wālā hai.

¹⁴yaqīnan wuh āg meṅ jalne wālā bhūsā hī haiṅ jo apnī jān ko sholoṅ se bachā nahīṅ sakte. aur yih koeloṅ kī āg nahīṅ hogī jis ke sāmne insān baiṭh kar āg tāp sake.

¹⁵yihī un sab kā hāl hai jin par tū ne mehnat kī hai aur jo terī jawānī se tere sāth tijārat karte rahe haiṅ. har ek laṛkhaṛāte hue apnī apnī rāh iḳhtiyār karegā, aur ek bhī nahīṅ hogā jo tujhe bachāe.