Read Roman Urdu Geo yasāyāh 48 Bible Online

yasāyāh 48 - Roman Urdu Geo bible

yasāyāh 48

¹ai yāqūb ke gharāne, suno! tum jo isrāīl kahlāte aur yahūdāh ke qabīle ke ho, dhyān do! tum jo rab ke nām kī qasam khā kar isrāīl ke ḳhudā ko yād karte ho, agarche tumhārī bāt na sachchāī, na insāf par mabnī hai, ġhaur karo!

²hāṅ tawajjuh do, tum jo muqaddas shahr ke log kahlāte aur isrāīl ke ḳhudā par etimād karte ho, suno ki allāh jis kā nām rabb-ul-afwāj hai kyā farmātā hai.

³jo kuchh pesh āyā hai us kā elān maiṅ ne baṛī der pahle kiyā. mere hī muṅh se us kī peshgoī sādir huī, maiṅ hī ne us kī ittilā dī. phir achānak hī maiṅ use amal meṅ lāyā aur wuh wuqūpazīr huā.

⁴maiṅ jāntā thā ki tū kitnā ziddī hai. tere gale kī naseṅ lohe jaisī belchak aur terī peshānī pītal jaisī saḳht hai.

⁵yih jān kar maiṅ ne baṛī der pahle in bātoṅ kī peshgoī kī. un ke pesh āne se pahle maiṅ ne tujhe un kī ḳhabar dī tāki tū dāwā na kar sake, ‘mere but ne yih kuchh kiyā, mere tarāshe aur ḍhāle gae dewatā ne is kā hukm diyā.’

⁶ab jab tū ne yih sun liyā hai to sab kuchh par ġhaur kar. tū kyūṅ in bātoṅ ko mānane ke lie tayyār nahīṅ? ab se maiṅ tujhe naī naī bāteṅ batāūṅgā, aisī poshīdā bāteṅ jo tujhe ab tak mālūm na thīṅ.

⁷yih kisī qadīm zamāne meṅ wujūd meṅ nahīṅ āīṅ balki abhī abhī āj hī tere ilm meṅ āī haiṅ. kyūṅki maiṅ nahīṅ chāhtā thā ki tū kahe, ‘mujhe pahle se is kā ilm thā.’

⁸chunāṅche na yih bāteṅ tere kān tak pahuṅchī haiṅ, na tū in kā ilm rakhtā hai, balki qadīm zamāne se hī terā kān yih sun nahīṅ saktā thā. kyūṅki maiṅ jāntā thā ki tū sarāsar bewafā hai, ki paidāish se hī namak-harām kahlātā hai.

⁹to bhī maiṅ apne nām kī ḳhātir apnā ġhazab nāzil karne se bāz rahtā, apnī tamjīd kī ḳhātir apne āp ko tujhe nest-o-nābūd karne se roke rakhtā hūṅ.

¹⁰dekh, maiṅ ne tujhe pāk-sāf kar diyā hai, lekin chāṅdī ko sāf karne kī kuṭhālī meṅ nahīṅ balki musībat kī bhaṭṭī meṅ. usī meṅ maiṅ ne tujhe āzmāyā hai.

¹¹apnī ḳhātir, hāṅ apnī hī ḳhātir maiṅ yih sab kuchh kartā hūṅ, aisā na ho ki mere nām kī behurmatī ho jāe. kyūṅki maiṅ ijāzat nahīṅ dūṅgā ki kisī aur ko wuh jalāl diyā jāe jis kā sirf maiṅ haqdār hūṅ.

¹²ai yāqūb kī aulād, merī sun! ai mere barguzīdā isrāīl, dhyān de! maiṅ hī wuhī hūṅ. maiṅ hī awwal-o-āḳhir hūṅ.

¹³mere hī hāth ne zamīn kī bunyād rakhī, mere hī dahne hāth ne āsmān ko ḳhaime kī tarah tān liyā. jab maiṅ āwāz detā hūṅ to sab mil kar khaṛe ho jāte haiṅ.

¹⁴āo, sab jamā ho kar suno! butoṅ meṅ se kis ne is kī peshgoī kī? kisī ne nahīṅ! jis ādmī ko rab pyār kartā hai wuh bābal ke ḳhilāf us kī marzī pūrī karegā, bābliyoṅ par us kī quwwat kā izhār karegā.

¹⁵maiṅ, hāṅ maiṅ hī ne yih farmāyā. maiṅ hī use bulā kar yahāṅ lāyā hūṅ, is lie wuh zarūr kāmyāb hogā.

¹⁶mere qarīb ā kar suno! shurū se maiṅ ne alāniyā bāt kī, jab se yih pesh āyā maiṅ hāzir hūṅ.” aur ab rab qādir-e-mutlaq aur us ke rūh ne mujhe bhejā hai.

¹⁷rab jo terā chhuṛāne wālā aur isrāīl kā quddūs hai farmātā hai, “maiṅ rab terā ḳhudā hūṅ. maiṅ tujhe wuh kuchh sikhātā hūṅ jo mufīd hai aur tujhe un rāhoṅ par chalne detā hūṅ jin par tujhe chalnā hai.

¹⁸kāsh tū mere ahkām par dhyān detā! tab terī salāmatī bahte daryā jaisī aur terī rāstbāzī samundar kī maujoṅ jaisī hotī.

¹⁹terī aulād ret kī mānind hotī, tere peṭ kā phal ret ke zarroṅ jaisā anginat hotā. is kā imkān hī na hotā ki terā nām-o-nishān mere sāmne se miṭ jāe.”

²⁰bābal se nikal jāo! bābliyoṅ ke bīch meṅ se hijrat karo! ḳhushī ke nāre lagā lagā kar elān karo, duniyā kī intihā tak ḳhushḳhabrī phailāte jāo ki rab ne iwazānā de kar apne ḳhādim yāqūb ko chhuṛāyā hai.

²¹unheṅ pyās na lagī jab us ne unheṅ registān meṅ se guzarne diyā. us ke hukm par patthar meṅ se pānī bah niklā. jab us ne chaṭān ko chīr ḍālā to pānī phūṭ niklā.

²²lekin rab farmātā hai ki bedīn salāmatī nahīṅ pāeṅge.