Read Roman Urdu Geo yasāyāh 52 Bible Online

yasāyāh 52 - Roman Urdu Geo bible

yasāyāh 52

¹ai siyyūn, uṭh, jāg uṭh. apnī tāqat se mulabbas ho jā! ai muqaddas shahr yarūshalam, apne shāndār kapṛe se ārāstā ho jā! āindā kabhī bhī ġhairmaḳhtūn yā nāpāk shaḳhs tujh meṅ dāḳhil nahīṅ hogā.

²ai yarūshalam, apne āp se gard jhāṛ kar khaṛī ho jā aur taḳht par baiṭh jā. ai giriftār kī huī siyyūn beṭī, apnī gardan kī zanjīroṅ ko khol kar un se āzād ho jā!

³kyūṅki rab farmātā hai, “tumheṅ muft meṅ bechā gayā, aur ab tumheṅ paise die baġhair chhuṛāyā jāegā.”

⁴kyūṅki rab qādir-e-mutlaq farmātā hai, “qadīm zamāne meṅ merī qaum misr chalī gaī tāki wahāṅ pardes meṅ rahe. bād meṅ asūr ne bilāwajah us par zulm kiyā hai.”

⁵rab farmātā hai, “ab jo ziyādatī merī qaum se ho rahī hai us kā mere sāth kyā wāstā hai?” rab farmātā hai, “merī qaum to muft meṅ chhīn lī gaī hai, aur us par hukūmat karne wāle sheḳhī mār kar pūrā din mere nām par kufr bakte haiṅ.

⁶chunāṅche merī qaum mere nām ko jān legī, us din wuh pahchān legī ki maiṅ hī wuhī hūṅ jo farmātā hai, ‘maiṅ hāzir hūṅ’!”

⁷us ke qadam kitne pyāre haiṅ jo pahāṛoṅ par chalte hue ḳhushḳhabrī sunātā hai. kyūṅki wuh amn-o-amān, ḳhushī kā paiġhām aur najāt kā elān karegā, wuh siyyūn se kahegā, “terā ḳhudā bādshāh hai!”

⁸sun! tere pahredār āwāz buland kar rahe haiṅ, wuh mil kar ḳhushī ke nāre lagā rahe haiṅ. kyūṅki jab rab koh-e-siyyūn par wāpas āegā to wuh apnī āṅkhoṅ se is kā mushāhadā kareṅge.

⁹ai yarūshalam ke khanḍarāt, shādiyānā bajāo, ḳhushī ke gīt gāo! kyūṅki rab ne apnī qaum ko tasallī dī hai, us ne iwazānā de kar yarūshalam ko chhuṛāyā hai.

¹⁰rab apnī muqaddas qudrat tamām aqwām par zāhir karegā, duniyā kī intihā tak sab hamāre ḳhudā kī najāt dekheṅge.

¹¹jāo, chale jāo! wahāṅ se nikal jāo! kisī bhī nāpāk chīz ko na chhūnā. jo rab kā sāmān uṭhāe chal rahe haiṅ wuh wahāṅ se nikal kar pāk-sāf raheṅ.

¹²lekin lāzim nahīṅ ki tum bhāg kar rawānā ho jāo. tumheṅ achānak farār hone kī zarūrat nahīṅ hogī, kyūṅki rab tumhāre āge bhī chalegā aur tumhāre pīchhe bhī. yūṅ isrāīl kā ḳhudā donoṅ taraf se tumhārī hifāzat karegā.

¹³dekho, merā ḳhādim kāmyāb hogā. wuh sarbuland, mumtāz aur bahut sarfarāz hogā.

¹⁴tujhe dekh kar bahutoṅ ke roṅgṭe khaṛe ho gae. kyūṅki us kī shakl itnī ḳharāb thī, us kī sūrat kisī bhī insān se kahīṅ zyādā bigaṛī huī thī.

¹⁵lekin ab bahut sī qaumeṅ use dekh kar hakkā-bakkā ho jāeṅgī, bādshāh dam-ba-ḳhud rah jāeṅge. kyūṅki jo kuchh unheṅ nahīṅ batāyā gayā use wuh dekheṅge, aur jo kuchh unhoṅ ne nahīṅ sunā us kī unheṅ samajh āegī.