Read Roman Urdu Geo yasāyāh 53 Bible Online

yasāyāh 53 - Roman Urdu Geo bible

yasāyāh 53

¹lekin kaun hamāre paiġhām par īmān lāyā? aur rab kī qudrat kis par zāhir huī?

²us ke sāmne wuh koṅpal kī tarah phūṭ niklā, us tāzā aur mulāim shigūphe kī tarah jo ḳhushk zamīn meṅ chhupī huī jaṛ se nikal kar phalne phūlne lagtī hai. na wuh ḳhūbsūrat thā, na shāndār. ham ne use dekhā to us kī shakl-o-sūrat meṅ kuchh nahīṅ thā jo hameṅ pasand ātā.

³use haqīr aur mardūd samjhā jātā thā. dukh aur bīmāriyāṅ us kī sāthī rahīṅ, aur log yahāṅ tak us kī tahqīr karte the ki use dekh kar apnā muṅh pher lete the. ham us kī kuchh qadar nahīṅ karte the.

⁴lekin us ne hamārī hī bīmāriyāṅ uṭhā līṅ, hamārā hī dukh bhugat liyā. to bhī ham samjhe ki yih us kī munāsib sazā hai, ki allāh ne ḳhud use mār kar ḳhāk meṅ milā diyā hai.

⁵lekin use hamāre hī jarāim ke sabab se chhedā gayā, hamāre hī gunāhoṅ kī ḳhātir kuchlā gayā. use sazā milī tāki hameṅ salāmatī hāsil ho, aur usī ke zaḳhmoṅ se hameṅ shifā milī.

⁶ham sab bheṛ-bakriyoṅ kī tarah āwārā phir rahe the, har ek ne apnī apnī rāh iḳhtiyār kī. lekin rab ne use ham sab ke qusūr kā nishānā banāyā.

⁷us par zulm huā, lekin us ne sab kuchh bardāsht kiyā aur apnā muṅh na kholā, us bheṛ kī tarah jise zabah karne ke lie le jāte haiṅ. jis tarah lelā bāl katarne wāloṅ ke sāmne ḳhāmosh rahtā hai usī tarah us ne apnā muṅh na kholā.

⁸use zulm aur adālat ke hāth se chhīn liyā gayā. ab kaun us kī nasl kā ḳhayāl karegā? kyūṅki us kā zindoṅ ke mulk se tālluq kaṭ gayā hai. apnī qaum ke jurm ke sabab se wuh sazā kā nishānā ban gayā.

⁹muqarrar yih huā ki us kī qabr bedīnoṅ ke pās ho, ki wuh marte waqt ek amīr ke pās dafnāyā jāe, go na us ne tashaddud kiyā, na us ke muṅh meṅ fareb thā.

¹⁰lekin rab hī kī marzī thī ki use kuchlā jāe. usī ne use dukh kā nishānā banāyā. aur go rab us kī jān ke zarī'e kaffārā degā to bhī wuh apne farzandoṅ ko dekhegā. rab us ke dinoṅ meṅ izāfā karegā, aur wuh rab kī marzī ko pūrā karne meṅ kāmyāb hogā.

¹¹itnī taqlīf bardāsht karne ke bād use phal nazar āegā, aur wuh ser ho jāegā. apne ilm se merā rāst ḳhādim bahutoṅ kā insāf qāim karegā, kyūṅki wuh un ke gunāhoṅ ko apne ūpar uṭhā kar dūr kar degā.

¹²is lie maiṅ use baṛoṅ meṅ hissā dūṅgā, aur wuh zor-āwaroṅ ke sāth lūṭ kā māl taqsīm karegā. kyūṅki us ne apnī jān ko maut ke hawāle kar diyā, aur use mujrimoṅ meṅ shumār kiyā gayā. hāṅ, us ne bahutoṅ kā gunāh uṭhā kar dūr kar diyā aur mujrimoṅ kī shafā'at kī.