Read Roman Urdu Geo yasāyāh 54 Bible Online

yasāyāh 54 - Roman Urdu Geo bible

yasāyāh 54

¹rab farmātā hai, “ḳhushī ke nāre lagā, tū jo beaulād hai, jo bachche ko janm hī nahīṅ de saktī. buland āwāz se shādiyānā bajā, tū jise paidāish kā dard na huā. kyūṅki ab tark kī huī aurat ke bachche shādīshudā aurat ke bachchoṅ se zyādā haiṅ.

²apne ḳhaime ko baṛā banā, us ke parde har taraf bichhā! bachat mat karnā! ḳhaime ke rasse lambe lambe karke meḳheṅ mazbūtī se zamīn meṅ ṭhoṅk de.

³kyūṅki tū tezī se dāīṅ aur bāīṅ taraf phail jāegī, aur terī aulād dīgar qaumoṅ par qabzā karke tabāhshudā shahroṅ ko az sar-e-nau ābād karegī.

⁴mat ḍarnā, terī ruswāī nahīṅ hogī. sharmsār na ho, terī behurmatī nahīṅ hogī. ab tū apnī jawānī kī sharmindagī bhūl jāegī, tere zahan se bewā hone kī zillat utar jāegī.

⁵kyūṅki terā ḳhāliq terā shauhar hai, rabb-ul-afwāj us kā nām hai, aur terā chhuṛāne wālā isrāīl kā quddūs hai, jo pūrī duniyā kā ḳhudā kahlātā hai.”

⁶terā ḳhudā farmātā hai, “tū matrūkā aur dil se majrūh bīwī kī mānind hai, us aurat kī mānind jis ke shauhar ne use radd kiyā, go us kī shādī us waqt huī jab kuṅwārī hī thī. lekin ab maiṅ, rab ne tujhe bulāyā hai.

⁷ek hī lamhe ke lie maiṅ ne tujhe tark kiyā, lekin ab baṛe rahm se tujhe jamā karūṅga.

⁸maiṅ ne apne ġhazab kā pūrā zor tujh par nāzil karke pal bhar ke lie apnā chehrā tujh se chhupā liyā, lekin ab abadī shafqat se tujh par rahm karūṅga.” rab terā chhuṛāne wālā yih farmātā hai.

⁹“baṛe sailāb ke bād maiṅ ne nūh se qasam khāī thī ki āindā sailāb kabhī pūrī zamīn par nahīṅ āegā. isī tarah ab maiṅ qasam khā kar wādā kartā hūṅ ki āindā na maiṅ kabhī tujh se nārāz hūṅgā, na tujhe malāmat karūṅga.

¹⁰go pahāṛ haṭ jāeṅ aur pahāṛiyāṅ jumbish khāeṅ, lekin merī shafqat tujh par se kabhī nahīṅ haṭegī, merā salāmatī kā ahd kabhī nahīṅ hilegā.” yih rab kā farmān hai jo tujh par tars khātā hai.

¹¹“bechārī beṭī yarūshalam! shadīd tūfān tujh par se guzar gae haiṅ, aur koī nahīṅ hai jo tujhe tasallī de. dekh, maiṅ terī dīwāroṅ ke patthar mazbūt chūne se joṛ dūṅgā aur terī bunyādoṅ ko sang-e-lājaward [23] se rakh dūṅgā.

¹²maiṅ terī dīwāroṅ ko yāqūt, tere darwāzoṅ ko āb-e-bahr [24] aur terī tamām fasīl ko qīmtī jawāhir se tāmīr karūṅga.

¹³tere tamām farzand rab se tālīm pāeṅge, aur terī aulād kī salāmatī azīm hogī.

¹⁴tujhe insāf kī mazbūt bunyād par rakhā jāegā, chunāṅche dūsroṅ ke zulm se dūr rah, kyūṅki ḍarne kī zarūrat nahīṅ hogī. dahshatzadā na ho, kyūṅki dahshat khāne kā sabab tere qarīb nahīṅ āegā.

¹⁵agar koī tujh par hamlā kare bhī to yih merī taraf se nahīṅ hogā, is lie har hamlā-āwar shikast khāegā.

¹⁶dekh, maiṅ hī us lohār kā ḳhāliq hūṅ jo hawā de kar koeloṅ ko dahkā detā hai tāki kām ke lie mauzūṅ hathiyār banā le. aur maiṅ hī ne tabāh karne wāle ko ḳhalaq kiyā tāki wuh barbādī kā kām anjām de.

¹⁷chunāṅche jo bhī hathiyār tujh par hamlā karne ke lie tayyār ho jāe wuh nākām hogā, aur jo bhī zabān tujh par ilzām lagāe use tū mujrim sābit karegī. yihī rab ke ḳhādimoṅ kā maurūsī hissā hai, maiṅ hī un kī rāstbāzī barqarār rakhūṅgā.” rab ḳhud yih farmātā hai.