Read Roman Urdu Geo yasāyāh 59 Bible Online

yasāyāh 59 - Roman Urdu Geo bible

yasāyāh 59

¹yaqīnan rab kā bāzū chhoṭā nahīṅ ki wuh bachā na sake, us kā kān bahrā nahīṅ ki sun na sake.

²haqīqat meṅ tumhāre bure kāmoṅ ne tumheṅ us se alag kar diyā, tumhāre gunāhoṅ ne us kā chehrā tum se chhupāe rakhā, is lie wuh tumhārī nahīṅ suntā.

³kyūṅki tumhāre hāth ḳhūnālūdā, tumhārī ungliyāṅ gunāh se nāpāk haiṅ. tumhāre hoṅṭ jhūṭ bolte aur tumhārī zabān sharīr bāteṅ phusphusātī hai.

⁴adālat meṅ koī munsifānā muqaddamā nahīṅ chalātā, koī sachche dalāil pesh nahīṅ kartā. log sachchāī se ḳhālī bātoṅ par etibār karke jhūṭ bolte haiṅ, wuh badkārī se hāmilā ho kar bedīnī ko janm dete haiṅ.

⁵wuh zahrīle sāṅpoṅ ke anḍoṅ par baiṭh jāte haiṅ tāki bachche nikleṅ. jo un ke anḍe khāe wuh mar jātā hai, aur agar un ke anḍe dabāe to zahrīlā sāṅp nikal ātā hai. yih log makaṛī ke jāle tān lete haiṅ, aisā kapṛā jo pahnane ke lie bekār hai. apne hāthoṅ ke banāe hue is kapṛe se wuh apne āp ko ḍhāṅp nahīṅ sakte. un ke āmāl bure hī haiṅ, un ke hāth tashaddud hī karte haiṅ.

⁷jahāṅ bhī ġhalat kām karne kā mauqā mile wahāṅ un ke pāoṅ bhāg kar pahuṅch jāte haiṅ. wuh bequsūr ko qatl karne ke lie tayyār rahte haiṅ. un ke ḳhayālāt sharīr hī haiṅ, apne pīchhe wuh tabāhī-o-barbādī chhoṛ jāte haiṅ.

⁸na wuh salāmatī kī rāh jānte haiṅ, na un ke rāstoṅ meṅ insāf pāyā jātā hai. kyūṅki unhoṅ ne unheṅ ṭeṛhā-meṛhā banā rakhā hai, aur jo bhī un par chale wuh salāmatī ko nahīṅ jāntā.

⁹isī lie insāf ham se dūr hai, rāstī ham tak pahuṅchtī nahīṅ. ham raushnī ke intizār meṅ rahte haiṅ, lekin afsos, andherā hī andherā nazar ātā hai. ham āb-o-tāb kī ummīd rakhte haiṅ, lekin afsos, jahāṅ bhī chalte haiṅ wahāṅ ghanī tārīkī chhāī rahtī hai.

¹⁰ham andhoṅ kī tarah dīwār ko hāth se chhū chhū kar rāstā mālūm karte haiṅ, āṅkhoṅ se mahrūm logoṅ kī tarah ṭaṭol ṭaṭol kar āge baṛhte haiṅ. dopahar ke waqt bhī ham ṭhokar khā khā kar yūṅ phirte haiṅ jaise dhundalkā ho. go ham tanāwar logoṅ ke darmiyān rahte haiṅ, lekin ḳhud murdoṅ kī mānind haiṅ.

¹¹ham sab niḍhāl hālat meṅ rīchhoṅ kī tarah ġhurrāte, kabūtaroṅ kī mānind ġhūṅ ġhūṅ karte haiṅ. ham insāf ke intizār meṅ rahte haiṅ, lekin besūd. ham najāt kī ummīd rakhte haiṅ, lekin wuh ham se dūr hī rahtī hai.

¹²kyūṅki hamāre muta'addid jarāim tere sāmne haiṅ, aur hamāre gunāh hamāre ḳhilāf gawāhī dete haiṅ. hameṅ mutawātir apne jarāim kā ehsās hai, ham apne gunāhoṅ se ḳhūb wāqif haiṅ.

¹³ham mānte haiṅ ki rab se bewafā rahe balki us kā inkār bhī kiyā hai. ham ne apnā muṅh apne ḳhudā se pher kar zulm aur dhoke kī bāteṅ phailāī haiṅ. hamāre diloṅ meṅ jhūṭ kā bīj baṛhte baṛhte muṅh meṅ se niklā.

¹⁴natīje meṅ insāf pīchhe haṭ gayā, aur rāstī dūr khaṛī rahtī hai. sachchāī chauk meṅ ṭhokar khā kar gir gaī hai, aur diyānatdārī dāḳhil hī nahīṅ ho saktī.

¹⁵chunāṅche sachchāī kahīṅ bhī pāī nahīṅ jātī, aur ġhalat kām se gurez karne wāle ko lūṭā jātā hai. yih sab kuchh rab ko nazar āyā, aur wuh nāḳhush thā ki insāf nahīṅ hai.

¹⁶us ne dekhā ki koī nahīṅ hai, wuh hairān huā ki mudāḳhalat karne wālā koī nahīṅ hai. tab us ke zor-āwar bāzū ne us kī madad kī, aur us kī rāstī ne us ko sahārā diyā.

¹⁷rāstī ke zirābaktar se mulabbas ho kar us ne sar par najāt kā ḳhod rakhā, intiqām kā libās pahan kar us ne ġhairat kī chādar oṛh lī.

¹⁸har ek ko wuh us kā munāsib muāwazā degā. wuh muḳhālifoṅ par apnā ġhazab nāzil karegā aur dushmanoṅ se badlā legā balki jazīroṅ ko bhī un kī harkatoṅ kā ajr degā.

¹⁹tab insān maġhrib meṅ rab ke nām kā ḳhauf māneṅge aur mashriq meṅ use jalāl deṅge. kyūṅki wuh rab kī phūṅk se chalāe hue zordār sailāb kī tarah un par ṭūṭ paṛegā.

²⁰rab farmātā hai, “chhuṛāne wālā koh-e-siyyūn par āegā. wuh yāqūb ke un farzandoṅ ke pās āegā jo apne gunāhoṅ ko chhoṛ kar wāpas āeṅge.”

²¹rab farmātā hai, “jahāṅ tak merā tālluq hai, un ke sāth merā yih ahd hai: merā rūh jo tujh par ṭhahrā huā hai aur mere alfāz jo maiṅ ne tere muṅh meṅ ḍāle haiṅ wuh ab se abad tak na tere muṅh se, na terī aulād ke muṅh se aur na terī aulād kī aulād se haṭeṅge.” yih rab kā farmān hai.