Read Roman Urdu Geo yasāyāh 60 Bible Online

yasāyāh 60 - Roman Urdu Geo bible

yasāyāh 60

¹“uṭh, khaṛī ho kar chamak uṭh. kyūṅki terā nūr ā gayā hai, aur rab kā jalāl tujh par tulū huā hai.

²kyūṅki go zamīn par tārīkī chhāī huī hai aur aqwām ghane andhere meṅ rahtī haiṅ, lekin tujh par rab kā nūr tulū ho rahā hai, aur us kā jalāl tujh par zāhir ho rahā hai.

³aqwām tere nūr ke pās aur bādshāh us chamaktī damaktī raushnī ke pās āeṅge jo tujh par tulū hogī.

⁴apnī nazar uṭhā kar chāroṅ taraf deḳh! sab ke sab jamā ho kar tere pās ā rahe haiṅ. tere beṭe dūr dūr se pahuṅch rahe haiṅ, aur terī beṭiyoṅ ko god meṅ uṭhā kar qarīb lāyā jā rahā hai.

⁵us waqt tū yih dekh kar chamak uṭhegī. terā dil ḳhushī ke māre tezī se dhaṛakne lagegā aur kushādā ho jāegā. kyūṅki samundar ke ḳhazāne tere pās lāe jāeṅge, aqwām kī daulat tere pās pahuṅchegī.

⁶ūṅṭoṅ kā ġhol balki midiyān aur aifā ke jawān ūṅṭ tere mulk ko ḍhāṅp deṅge. wuh sone aur baḳhūr se lade hue aur rab kī hamd-o-sanā karte hue mulk-e-sabā se āeṅge.

⁷qīdār kī tamām bheṛ-bakriyāṅ tere hawāle kī jāeṅgī, aur nabāyot ke menḍhe terī ḳhidmat ke lie hāzir hoṅge. unheṅ merī qurbāngāh par chaṛhāyā jāegā aur maiṅ unheṅ pasand karūṅga. yūṅ maiṅ apne jalāl ke ghar ko shān-o-shaukat se ārāstā karūṅga.

⁸yih kaun haiṅ jo bādaloṅ kī tarah aur kābuk ke pās wāpas āne wāle kabūtaroṅ kī mānind uṛ kar ā rahe haiṅ?

⁹yih tarsīs ke zabardast bahrī jahāz haiṅ jo tere pās pahuṅch rahe haiṅ. kyūṅki jazīre mujh se ummīd rakhte haiṅ. yih jahāz tere beṭoṅ ko un kī sone-chāṅdī samet dūrdarāz ilāqoṅ se le kar ā rahe haiṅ. yūṅ rab tere ḳhudā ke nām aur isrāīl ke quddūs kī tāzīm hogī jis ne tujhe shān-o-shaukat se nawāzā hai.

¹⁰pardesī terī dīwāreṅ az sar-e-nau tāmīr kareṅge, aur un ke bādshāh terī ḳhidmat kareṅge. kyūṅki go maiṅ ne apne ġhazab meṅ tujhe sazā dī, lekin ab maiṅ apne fazl se tujh par rahm karūṅga.

¹¹terī fasīl ke darwāze hameshā khule raheṅge. unheṅ na din ko band kiyā jāegā, na rāt ko tāki aqwām kā māl-o-daulat aur un ke giriftār kie gae bādshāhoṅ ko shahr ke andar lāyā jā sake.

¹²kyūṅki jo qaum yā saltanat terī ḳhidmat karne se inkār kare wuh barbād ho jāegī, use pūre taur par tabāh kiyā jāegā.

¹³lubnān kī shān-o-shaukat tere sāmne hāzir hogī. jūnīpar, sanobar aur sarw ke daraḳht mil kar tere pās āeṅge tāki mere maqdis ko ārāstā kareṅ. yūṅ maiṅ apne pāoṅ kī chaukī ko jalāl dūṅgā.

¹⁴tujh par zulm karne wāloṅ ke beṭe jhuk jhuk kar tere huzūr āeṅge, terī tahqīr karne wāle tere pāoṅ ke sāmne aundhe muṅh ho jāeṅge. wuh tujhe ‘rab kā shahr’ aur ‘isrāīl ke quddūs kā siyyūn’ qarār deṅge.

¹⁵pahle tujhe tark kiyā gayā thā, log tujh se nafrat rakhte the, aur tujh meṅ se koī nahīṅ guzartā thā. lekin ab maiṅ tujhe abadī faḳhr kā bāis banā dūṅgā, aur tamām nasleṅ tujhe dekh kar ḳhush hoṅgī.

¹⁶tū aqwām kā dūdh piegī, aur bādshāh tujhe dūdh pilāeṅge. tab tū jān legī ki maiṅ rab terā najātdahindā hūṅ, ki maiṅ jo yāqūb kā zabardast sūrmā hūṅ terā chhuṛāne wālā hūṅ.

¹⁷maiṅ tere pītal ko sone meṅ, tere lohe ko chāṅdī meṅ, terī lakaṛī ko pītal meṅ aur tere patthar ko lohe meṅ badlūṅgā. maiṅ salāmatī ko terī muhāfiz aur rāstī ko terī nigarān banāūṅgā.

¹⁸ab se tere mulk meṅ na tashaddud kā zikr hogā, na barbādī-o-tabāhī kā. ab se terī chārdīwārī ‘najāt’ aur tere darwāze ‘hamd-o-sanā’ kahlāeṅge.

¹⁹āindā tujhe na din ke waqt sūraj, na rāt ke waqt chāṅd kī zarūrat hogī, kyūṅki rab hī terī abadī raushnī hogā, terā ḳhudā hī terī āb-o-tāb hogā.

²⁰āindā terā sūraj kabhī ġhurūb nahīṅ hogā, terā chāṅd kabhī nahīṅ ghaṭegā. kyūṅki rab terā abadī nūr hogā, aur mātam ke tere din ḳhatm ho jāeṅge.

²¹tab terī qaum ke tamām afrād rāstbāz hoṅge, aur mulk hameshā tak un kī milkiyat rahegā. kyūṅki wuh mere hāth se lagāī huī panīrī hoṅge, mere hāth kā kām jis se maiṅ apnā jalāl zāhir karūṅga.

²²tab sab se chhoṭe ḳhāndān kī tādād baṛh kar hazār afrād par mushtamil hogī, sab se kamzor kumbā tāqatwar qaum banegā. muqarrarā waqt par maiṅ, rab yih sab kuchh tezī se anjām dūṅgā.”