Read Roman Urdu Geo yasāyāh 61 Bible Online

yasāyāh 61 - Roman Urdu Geo bible

yasāyāh 61

¹rab qādir-e-mutlaq kā rūh mujh par hai, kyūṅki rab ne mujhe tel se masah karke ġharīboṅ ko ḳhushḳhabrī sunāne kā iḳhtiyār diyā hai. us ne mujhe shikastādiloṅ kī marham-paṭṭī karne ke lie aur yih elān karne ke lie bhejā hai ki qaidiyoṅ ko rihāī milegī aur zanjīroṅ meṅ jakaṛe hue āzād ho jāeṅge,

²ki bahālī kā sāl aur hamāre ḳhudā ke intiqām kā din ā gayā hai. us ne mujhe bhejā hai ki maiṅ tamām mātam karne wāloṅ ko tasallī dūṅ

³aur siyyūn ke sogwāroṅ ko dilāsā de kar rākh ke bajāe shāndār tāj, mātam ke bajāe ḳhushī kā tel aur shikastā rūh ke bajāe hamd-o-sanā kā libās muhayyā karūṅ. tab wuh ‘rāstī ke daraḳht’ kahlāeṅge, aise paude jo rab ne apnā jalāl zāhir karne ke lie lagāe haiṅ.

⁴wuh qadīm khanḍarāt ko az sar-e-nau tāmīr karke der se barbād hue maqāmoṅ ko bahāl kareṅge. wuh un tabāhshudā shahroṅ ko dubārā qāim kareṅge jo nasl-dar-nasl wīrān-o-sunsān rahe haiṅ.

⁵ġhairmulkī khaṛe ho kar tumhārī bheṛ-bakriyoṅ kī gallābānī kareṅge, pardesī tumhāre khetoṅ aur bāġhoṅ meṅ kām kareṅge.

⁶us waqt tum ‘rab ke imām’ kahlāoge, log tumheṅ ‘hamāre ḳhudā ke ḳhādim’ qarār deṅge. tum aqwām kī daulat se lutfandoz hoge, un kī shān-o-shaukat apnā kar us par faḳhr karoge.

⁷tumhārī sharmindagī nahīṅ rahegī balki tum izzat kā dugnā hissā pāoge, tumhārī ruswāī nahīṅ rahegī balki tum shāndār hissā milne ke bāis shādiyānā bajāoge. kyūṅki tumheṅ watan meṅ dugnā hissā milegā, aur abadī ḳhushī tumhārī mīrās hogī.

⁸kyūṅki rab farmātā hai, “mujhe insāf pasand hai. maiṅ ġhāratgarī aur kajrawī se nafrat rakhtā hūṅ. maiṅ apne logoṅ ko wafādārī se un kā ajr dūṅgā, maiṅ un ke sāth abadī ahd bāndhūṅgā.

⁹un kī nasl aqwām meṅ aur un kī aulād dīgar ummatoṅ meṅ mashhūr hogī. jo bhī unheṅ dekhe wuh jān legā ki rab ne unheṅ barkat dī hai.”

¹⁰maiṅ rab se nihāyat hī shādmān hūṅ, merī jān apne ḳhudā kī tārīf meṅ ḳhushī ke gīt gātī hai. kyūṅki jis tarah dūlhā apnā sar imām kī sī pagaṛī se sajātā aur dulhan apne āp ko apne zewarāt se ārāstā kartī hai usī tarah allāh ne mujhe najāt kā libās pahnā kar rāstī kī chādar meṅ lapeṭā hai.

¹¹kyūṅki jis tarah zamīn apnī hariyālī ko nikalne detī aur bāġh apne bījoṅ ko phūṭne detā hai usī tarah rab qādir-e-mutlaq aqwām ke sāmne apnī rāstī aur satāish phūṭne degā.