Read Roman Urdu Geo yasāyāh 62 Bible Online

yasāyāh 62 - Roman Urdu Geo bible

yasāyāh 62

¹siyyūn kī ḳhātir maiṅ ḳhāmosh nahīṅ rahūṅgā, yarūshalam kī ḳhātir tab tak ārām nahīṅ karūṅga jab tak us kī rāstī tulū-e-subh kī tarah na chamke aur us kī najāt mash'al kī tarah na bhaṛke.

²aqwām terī rāstī dekheṅgī, tamām bādshāh terī shān-o-shaukat kā mushāhadā kareṅge. us waqt tujhe nayā nām milegā, aisā nām jo rab kā apnā muṅh muta'ayyin karegā.

³tū rab ke hāth meṅ shāndār tāj aur apne ḳhudā ke hāth meṅ shāhī kulāh hogī.

⁴āindā log tujhe na kabhī ‘matrūkā’ na tere mulk ko ‘wīrān-o-sunsān’ qarār deṅge balki tū merā lutf aur terā mulk byāhī kahlāegā. kyūṅki rab tujh se lutfandoz hogā, aur terā mulk shādīshudā hogā.

⁵jis tarah jawān ādmī kuṅwārī se shādī kartā hai usī tarah tere farzand tujhe byāh leṅge. aur jis tarah dūlhā dulhan ke bāis ḳhushī manātā hai usī tarah terā ḳhudā tere sabab se ḳhushī manāegā.

⁶ai yarūshalam, maiṅ ne terī fasīl par pahredār lagāe haiṅ jo din rāt āwāz deṅ. unheṅ ek lamhe ke lie bhī ḳhāmosh rahne kī ijāzat nahīṅ hai. ai rab ko yād dilāne wālo, us waqt tak na ḳhud ārām karo,

⁷na rab ko ārām karne do jab tak wuh yarūshalam ko az sar-e-nau qāim na kar le. jab pūrī duniyā shahr kī tārīf karegī tab hī tum sukūn kā sāṅs le sakte ho.

⁸rab ne apne dāeṅ hāth aur zor-āwar bāzū kī qasam khā kar wādā kiyā hai, “āindā na maiṅ terā ġhallā tere dushmanoṅ ko khilāūṅgā, na baṛī mehnat se banāī gaī terī mai ko ajnabiyoṅ ko pilāūṅgā.

⁹kyūṅki āindā fasal kī kaṭāī karne wāle hī rab kī satāish karte hue use khāeṅge, aur angūr chunane wāle hī mere maqdis ke sahnoṅ meṅ ā kar un kā ras pieṅge.”

¹⁰dāḳhil ho jāo, shahr ke darwāzoṅ meṅ dāḳhil ho jāo! qaum ke lie rāstā tayyār karo! rāstā banāo, rāstā banāo! use pattharoṅ se sāf karo! tamām aqwām ke ūpar jhanḍā gāṛ do!

¹¹kyūṅki rab ne duniyā kī intihā tak elān kiyā hai, “siyyūn beṭī ko batāo ki dekh, terī najāt āne wālī hai. dekh, us kā ajr us ke pās hai, us kā in'ām us ke āge āge chal rahā hai.”

¹²tab wuh ‘muqaddas qaum’ aur ‘wuh qaum jise rab ne iwazānā de kar chhuṛāyā hai’ kahlāeṅge. ai yarūshalam beṭī, tū ‘marġhūn’ aur ‘ġhairmatrūkā shahr’ kahlāegī.