Read Roman Urdu Geo yasāyāh 63 Bible Online

yasāyāh 63 - Roman Urdu Geo bible

yasāyāh 63

¹yih kaun hai jo adom se ā rahā hai, jo surḳh surḳh kapṛe pahne busrā shahr se pahuṅch rahā hai? yih kaun hai jo rob se mulabbas baṛī tāqat ke sāth āge baṛh rahā hai? “maiṅ hī hūṅ, wuh jo insāf se boltā, jo baṛī qudrat se tujhe bachātā hai.”

²tere kapṛe kyūṅ itne lāl haiṅ? lagtā hai ki terā libās hauz meṅ angūr kuchalne se surḳh ho gayā hai.

³“maiṅ angūroṅ ko akelā hī kuchaltā rahā hūṅ, aqwām meṅ se koī mere sāth nahīṅ thā. maiṅ ne ġhusse meṅ ā kar unheṅ kuchlā, taish meṅ unheṅ raundā. un ke ḳhūn kī chhīṅṭeṅ mere kapṛoṅ par paṛ gaīṅ, merā sārā libās ālūdā huā.

⁴kyūṅki merā dil intiqām lene par tulā huā thā, apnī qaum kā iwazānā dene kā sāl ā gayā thā.

⁵maiṅ ne apne irdgird nazar dauṛāī, lekin koī nahīṅ thā jo merī madad kartā. maiṅ hairān thā ki kisī ne bhī merā sāth na diyā. chunāṅche mere apne bāzū ne merī madad kī, aur mere taish ne mujhe sahārā diyā.

⁶ġhusse meṅ ā kar maiṅ ne aqwām ko pāmāl kiyā, taish meṅ unheṅ madhosh karke un kā ḳhūn zamīn par girā diyā.”

⁷maiṅ rab kī mehrbāniyāṅ sunāūṅgā, us ke qābil-e-tārīf kāmoṅ kī tamjīd karūṅga. jo kuchh rab ne hamāre lie kiyā, jo muta'addid bhalāiyāṅ us ne apne rahm aur baṛe fazl se isrāīl ko dikhāī haiṅ un kī satāish karūṅga.

⁸us ne farmāyā, “yaqīnan yih merī qaum ke haiṅ, aise farzand jo bewafā nahīṅ hoṅge.” yih kah kar wuh un kā najātdahindā ban gayā,

⁹wuh un kī tamām musībat meṅ sharīk huā, aur us ke huzūr ke farishte ne unheṅ chhuṭkārā diyā. wuh unheṅ pyār kartā, un par tars khātā thā, is lie us ne iwazānā de kar unheṅ chhuṛāyā. hāṅ, qadīm zamāne se āj tak wuh unheṅ uṭhāe phirtā rahā.

¹⁰lekin wuh sarkash hue, unhoṅ ne us ke quddūs rūh ko dukh pahuṅchāyā. tab wuh muṛ kar un kā dushman ban gayā. ḳhud wuh un se laṛne lagā.

¹¹phir us kī qaum ko wuh qadīm zamānā yād āyā jab mūsā apnī qaum ke darmiyān thā, aur wuh pukār uṭhe, “wuh kahāṅ hai jo apnī bheṛ-bakriyoṅ ko un ke gallābānoṅ samet samundar meṅ se nikāl lāyā? wuh kahāṅ hai jis ne apne rūh-ul-quds ko un ke darmiyān nāzil kiyā,

¹²jis kī jalālī qudrat mūsā ke dāeṅ hāth hāzir rahī tāki us ko sahārā de? wuh kahāṅ hai jis ne pānī ko isrāīliyoṅ ke sāmne taqsīm karke apne lie abadī shohrat paidā kī

¹³aur unheṅ gahrāiyoṅ meṅ se guzarne diyā? us waqt wuh khule maidān meṅ chalne wāle ghoṛe kī tarah ārām se guzare aur kahīṅ bhī ṭhokar na khāī.

¹⁴jis tarah gāy-bail ārām ke lie wādī meṅ utarte haiṅ usī tarah unheṅ rab ke rūh se ārām aur sukūn hāsil huā.” isī tarah tū ne apnī qaum kī rāhnumāī kī tāki tere nām ko jalāl mile.

¹⁵ai allāh, āsmān se ham par nazar ḍāl, bulandiyoṅ par apnī muqaddas aur shāndār sukūnatgāh se deḳh! is waqt terī ġhairat aur qudrat kahāṅ hai? ham terī narmī aur mehrbāniyoṅ se mahrūm rah gae haiṅ!

¹⁶tū to hamārā bāp hai. kyūṅki ibrāhīm hameṅ nahīṅ jāntā aur isrāīl hameṅ nahīṅ pahchāntā, lekin tū, rab hamārā bāp hai, qadīm zamāne se hī terā nām ‘hamārā chhuṛāne wālā’ hai.

¹⁷ai rab, tū hameṅ apnī rāhoṅ se kyūṅ bhaṭakne detā hai? tū ne hamāre diloṅ ko itnā saḳht kyūṅ kar diyā ki ham terā ḳhauf nahīṅ mān sakte? hamārī ḳhātir wāpas ā! kyūṅki ham tere ḳhādim, terī maurūsī milkiyat ke qabīle haiṅ.

¹⁸terā maqdis thoṛī hī der ke lie terī qaum kī milkiyat rahā, lekin ab hamāre muḳhālifoṅ ne use pāoṅ tale raund ḍālā hai.

¹⁹lagtā hai ki ham kabhī terī hukūmat ke taht nahīṅ rahe, ki ham par kabhī tere nām kā ṭhappā nahīṅ lagā thā.