Read Roman Urdu Geo yasāyāh 64 Bible Online

yasāyāh 64 - Roman Urdu Geo bible

yasāyāh 64

¹kāsh tū āsmān ko phāṛ kar utar āe, ki pahāṛ tere sāmne thartharāeṅ.

²kāsh tū ḍāliyoṅ ko bhaṛkā dene wālī āg yā pānī ko ek dam ubālne wālī ātish kī tarah nāzil ho tāki tere dushman terā nām jān leṅ aur qaumeṅ tere sāmne laraz uṭheṅ!

³kyūṅki qadīm zamāne meṅ jab tū ḳhaufnāk aur ġhairmutawaqqe kām kiyā kartā thā to yūṅ hī nāzil huā, aur pahāṛ yūṅ hī tere sāmne kāṅpne lage.

⁴qadīm zamāne se hī kisī ne tere siwā kisī aur ḳhudā ko na dekhā na sunā hai. sirf tū hī aisā ḳhudā hai jo un kī madad kartā hai jo tere intizār meṅ rahte haiṅ.

⁵tū un se miltā hai jo ḳhushī se rāst kām karte, jo terī rāhoṅ par chalte hue tujhe yād karte haiṅ! afsos, tū ham se nārāz huā, kyūṅki ham shurū se terā gunāh karke tujh se bewafā rahe haiṅ. to phir ham kis tarah bach jāeṅge?

⁶ham sab nāpāk ho gae haiṅ, hamāre tamām nām-nihād rāst kām gande chīthaṛoṅ kī mānind haiṅ. ham sab pattoṅ kī tarah murjhā gae haiṅ, aur hamāre gunāh hameṅ hawā ke jhoṅkoṅ kī tarah uṛā kar le jā rahe haiṅ.

⁷koī nahīṅ jo terā nām pukāre yā tujh se lipaṭne kī koshish kare. kyūṅki tū ne apnā chehrā ham se chhupā kar hameṅ hamāre qusūroṅ ke hawāle chhoṛ diyā hai.

⁸ai rab, tāham tū hī hamārā bāp, hamārā kumhār hai. ham sab miṭṭī hī haiṅ jise tere hāth ne tashkīl diyā hai.

⁹ai rab, had se zyādā ham se nārāz na ho! hamāre gunāh tujhe hameshā tak yād na raheṅ. zarā is kā lihāz kar ki ham sab terī qaum haiṅ.

¹⁰tere muqaddas shahr wīrān ho gae haiṅ, yahāṅ tak ki siyyūn bhī bayābān hī hai, yarūshalam wīrān-o-sunsān hai.

¹¹hamārā muqaddas aur shāndār ghar jahāṅ hamāre bāpdādā terī satāish karte the nazar-e-ātish ho gayā hai, jo kuchh bhī ham azīz rakhte the wuh khanḍar ban gayā hai.

¹²ai rab, kyā tū in wāqiāt ke bāwujūd bhī apne āp ko ham se dūr rakhegā? kyā tū ḳhāmosh rah kar hameṅ had se zyādā past hone degā?.