Read Roman Urdu Geo yasāyāh 65 Bible Online

yasāyāh 65 - Roman Urdu Geo bible

yasāyāh 65

¹“jo mere bāre meṅ daryāft nahīṅ karte the unheṅ maiṅ ne mujhe ḍhūṅḍne kā mauqā diyā. jo mujhe talāsh nahīṅ karte the unheṅ maiṅ ne mujhe pāne kā mauqā diyā. maiṅ bolā, ‘maiṅ hāzir hūṅ, maiṅ hāzir hūṅ!’ hālāṅki jis qaum se maiṅ muḳhātib huā wuh merā nām nahīṅ pukārtī thī.

²din bhar maiṅ ne apne hāth phailāe rakhe tāki ek sarkash qaum kā istiqbāl karūṅ, hālāṅki yih log ġhalat rāh par chalte aur apne kajrau ḳhayālāt ke pīchhe paṛe rahte haiṅ.

³yih mutawātir aur mere rū-ba-rū hī mujhe nārāz karte haiṅ. kyūṅki yih bāġhoṅ meṅ qurbāniyāṅ chaṛhā kar īṅṭoṅ kī qurbāngāhoṅ par baḳhūr jalāte haiṅ.

⁴yih qabristān meṅ baiṭh kar ḳhufiyā ġhāroṅ meṅ rāt guzārte haiṅ. yih sūar kā gosht khāte haiṅ, un kī degoṅ meṅ qābil-e-ghin shorbā hotā hai.

⁵sāth sāth yih ek dūsre se kahte haiṅ, ‘mujh se dūr raho, qarīb mat ānā! kyūṅki maiṅ terī nisbat kahīṅ zyādā muqaddas hūṅ.’ is qism ke log merī nāk meṅ dhueṅ kī mānind haiṅ, ek āg jo din bhar jaltī rahtī hai.

⁶dekho, yih bāt mere sāmne hī qalamband huī hai ki maiṅ ḳhāmosh nahīṅ rahūṅgā balki pūrā pūrā ajr dūṅgā. maiṅ un kī jholī un ke ajr se bhar dūṅgā.”

⁷rab farmātā hai, “unheṅ na sirf un ke apne gunāhoṅ kī sazā milegī balki bāpdādā ke gunāhoṅ kī bhī. chūṅki unhoṅ ne pahāṛoṅ par baḳhūr kī qurbāniyāṅ chaṛhā kar merī tahqīr kī is lie maiṅ un kī jholī un kī harkatoṅ ke muāwaze se bhar dūṅgā.”

⁸rab farmātā hai, “jab tak angūr meṅ thoṛā sā ras bāqī ho log kahte haiṅ, ‘use zāe mat karnā, kyūṅki ab tak us meṅ kuchh na kuchh hai jo barkat kā bāis hai.’ maiṅ isrāīl ke sāth bhī aisā hī karūṅga. kyūṅki apne ḳhādimoṅ kī ḳhātir maiṅ sab ko nest nahīṅ karūṅga.

⁹maiṅ yāqūb aur yahūdāh ko aisī aulād baḳhsh dūṅgā jo mere pahāṛoṅ ko mīrās meṅ pāegī. tab pahāṛ mere barguzīdoṅ kī milkiyat hoṅge, aur mere ḳhādim un par baseṅge.

¹⁰wādī-e-shārūn meṅ bheṛ-bakriyāṅ chareṅgī, wādī-e-akūr meṅ gāy-bail ārām kareṅge. yih sab kuchh merī us qaum ko dastyāb hogā jo merī tālib rahegī.

¹¹lekin tum jo rab ko tark karke mere muqaddas pahāṛ ko bhūl gae ho, ḳhabardār! go is waqt tum ḳhushqismatī ke dewatā jad ke lie mez bichhāte aur taqdīr ke dewatā manāt ke lie mai kā bartan bhar dete ho,

¹²lekin tumhārī taqdīr aur hai. maiṅ ne tumhāre lie talwār kī taqdīr muqarrar kī hai. tum sab ko qasāī ke sāmne jhuknā paṛegā, kyūṅki jab maiṅ ne tumheṅ bulāyā to tum ne jawāb na diyā. jab maiṅ tum se hamkalām huā to tum ne na sunā balki wuh kuchh kiyā jo mujhe burā lagā. tum ne wuh kuchh iḳhtiyār kiyā jo mujhe nāpasand hai.”

¹³is lie rab qādir-e-mutlaq farmātā hai, “mere ḳhādim khānā khāeṅge, lekin tum bhūke rahoge. mere ḳhādim pānī pieṅge, lekin tum pyāse rahoge. mere ḳhādim masrūr hoṅge, lekin tum sharmsār hoge.

¹⁴mere ḳhādim ḳhushī ke māre shādiyānā bajāeṅge, lekin tum ranjīdā ho kar ro paṛoge, tum māyūs ho kar wāwailā karoge.

¹⁵āḳhirkār tumhārā nām hī mere barguzīdoṅ ke pās bāqī rahegā, aur wuh bhī sirf lānat ke taur par istemāl hogā. qasam khāte waqt wuh kaheṅge, ‘rab qādir-e-mutlaq tumheṅ isī tarah qatl kare.’ lekin mere ḳhādimoṅ kā ek aur nām rakhā jāegā.

¹⁶mulk meṅ jo bhī apne lie barkat māṅge yā qasam khāe wuh wafādār ḳhudā kā nām legā. kyūṅki guzarī musībatoṅ kī yādeṅ miṭ jāeṅgī, wuh merī āṅkhoṅ se chhup jāeṅgī.

¹⁷kyūṅki maiṅ nayā āsmān aur naī zamīn ḳhalaq karūṅga. tab guzarī chīzeṅ yād nahīṅ āeṅgī, un kā ḳhayāl tak nahīṅ āegā.

¹⁸chunāṅche ḳhush-o-ḳhurram ho! jo kuchh maiṅ ḳhalaq karūṅga us kī hameshā tak ḳhushī manāo! kyūṅki dekho, maiṅ yarūshalam ko shādmānī kā bāis aur us ke bāshindoṅ ko ḳhushī kā sabab banāūṅgā.

¹⁹maiṅ ḳhud bhī yarūshalam kī ḳhushī manāūṅgā aur apnī qaum se lutfandoz hūṅgā. āindā us meṅ ronā aur wāwailā sunāī nahīṅ degā.

²⁰wahāṅ koī bhī paidāish ke thoṛe dinoṅ bād faut nahīṅ hogā, koī bhī waqt se pahle nahīṅ maregā. jo sau sāl kā hogā use jawān samjhā jāegā, aur jo sau sāl kī umr se pahle hī faut ho jāe use malaūn samjhā jāegā.

²¹log ghar banā kar un meṅ baseṅge, wuh angūr ke bāġh lagā kar un kā phal khāeṅge.

²²āindā aisā nahīṅ hogā ki ghar banāne ke bād koī aur us meṅ base, ki bāġh lagāne ke bād koī aur us kā phal khāe. kyūṅki merī qaum kī umr daraḳhtoṅ jaisī darāz hogī, aur mere barguzīdā apne hāthoṅ ke kām se lutfandoz hoṅge.

²³na un kī mehnat-mashaqqat rāygāṅ jāegī, na un ke bachche achānak tashaddud kā nishānā ban kar mareṅge. kyūṅki wuh rab kī mubārak nasl hoṅge, wuh ḳhud aur un kī aulād bhī.

²⁴is se pahle ki wuh āwāz deṅ maiṅ jawāb dūṅgā, wuh abhī bol rahe hoṅge ki maiṅ un kī sunūṅgā.”

²⁵rab farmātā hai, “bheṛiyā aur lelā mil kar chareṅge, sherbabar bail kī tarah bhūsā khāegā, aur sāṅp kī ḳhurāk ḳhāk hī hogī. mere pūre muqaddas pahāṛ par na ġhalat kām kiyā jāegā, na kisī ko nuqsān pahuṅchegā.”