Read Roman Urdu Geo yasāyāh 7 Bible Online

yasāyāh 7 - Roman Urdu Geo bible

yasāyāh 7

¹jab āḳhaz bin yūtām bin uzziyāh, yahūdāh kā bādshāh thā to shām kā bādshāh razīn aur isrāīl kā bādshāh fiqah bin ramaliyāh yarūshalam ke sāth laṛne ke lie nikle. lekin wuh shahr par qabzā karne meṅ nākām rahe.

²jab dāūd ke shāhī gharāne ko ittilā milī ki shām kī fauj ne ifrāīm ke ilāqe meṅ apnī lashkargāh lagāī hai to āḳhaz bādshāh aur us kī qaum laraz uṭhe. un ke dil āṅdhī ke jhoṅkoṅ se hilne wāle daraḳhtoṅ kī tarah thartharāne lage.

³tab rab yasāyāh se hamkalām huā, “apne beṭe shayār-yāshūb [3] ko apne sāth le kar āḳhaz bādshāh se milne ke lie nikal jā. wuh us nāle ke sire ke pās rukā huā hai jo pānī ko ūpar wāle tālāb tak pahuṅchātā hai (yih tālāb us rāste par hai jo dhobiyoṅ ke ghāṭ tak le jātā hai).

⁴use batā ki muhtāt rah kar sukūn kā dāman mat chhoṛ. mat ḍar. terā dil razīn, shām aur bin ramaliyāh kā taish dekh kar himmat na hāre. yih bas jalī huī lakaṛī ke do bache hue ṭukṛe haiṅ jo ab tak kuchh dhuāṅ chhoṛ rahe haiṅ.

⁵beshak shām aur isrāīl ke bādshāhoṅ ne tere ḳhilāf bure mansūbe bāndhe haiṅ, aur wuh kahte haiṅ,

⁶‘āo ham yahūdāh par hamlā kareṅ. ham wahāṅ dahshat phailā kar us par fath pāeṅ aur phir tābiel ke beṭe ko us kā bādshāh banāeṅ.’

⁷lekin rab qādir-e-mutlaq farmātā hai ki un kā mansūbā nākām ho jāegā. bāt nahīṅ banegī!

⁸kyūṅki shām kā sar damishq aur damishq kā sar mahz razīn hai. jahāṅ tak mulk-e-isrāīl kā tālluq hai, 65 sāl ke andar andar wuh chaknāchūr ho jāegā, aur qaum nest-o-nābūd ho jāegī.

⁹isrāīl kā sar sāmariyya aur sāmariyya kā sar mahz ramaliyāh kā beṭā hai. agar īmān meṅ qāim na raho, to ḳhud qāim nahīṅ rahoge.”

¹⁰rab āḳhaz bādshāh se ek bār phir hamkalām huā,

¹¹“is kī tasdīq ke lie rab apne ḳhudā se koī ilāhī nishān māṅg le, ḳhwāh āsmān par ho yā pātāl meṅ.”

¹²lekin āḳhaz ne inkār kiyā, “nahīṅ, maiṅ nishān māṅg kar rab ko nahīṅ āzmāūṅgā.”

¹³tab yasāyāh ne kahā, “phir merī bāt suno, ai dāūd ke ḳhāndān! kyā yih kāfī nahīṅ ki tum insān ko thakā do? kyā lāzim hai ki allāh ko bhī thakāne par musir raho?

¹⁴chalo, phir rab apnī hī taraf se tumheṅ nishān degā. nishān yih hogā ki kuṅwārī ummīd se ho jāegī. jab beṭā paidā hogā to us kā nām immānūel [4] rakhegī.

¹⁵jis waqt bachchā itnā baṛā hogā ki ġhalat kām radd karne aur achchhā kām chunane kā ilm rakhegā us waqt se bālāī aur shahd khāegā.

¹⁶kyūṅki is se pahle ki laṛkā ġhalat kām radd karne aur achchhā kām chunane kā ilm rakhe wuh mulk wīrān-o-sunsān ho jāegā jis ke donoṅ bādshāhoṅ se tū dahshat khātā hai.

¹⁷rab tujhe bhī tere ābāī ḳhāndān aur qaum samet baṛī musībat meṅ ḍālegā. kyūṅki wuh asūr ke bādshāh ko tumhāre ḳhilāf bhejegā. us waqt tumheṅ aise mushkil dinoṅ kā sāmnā karnā paṛegā ki isrāīl ke yahūdāh se alag ho jāne se le kar āj tak nahīṅ guzare.”

¹⁸us din rab sīṭī bajā kar dushman ko bulāegā. kuchh makkhiyoṅ ke ġhol kī tarah daryā-e-nīl kī dūrdarāz shāḳhoṅ se āeṅge, aur kuchh shahd kī makkhiyoṅ kī tarah asūr se rawānā ho kar mulk par dhāwā bol deṅge.

¹⁹har jagah wuh ṭik jāeṅge, gahrī ghāṭiyoṅ aur chaṭānoṅ kī darāṛoṅ meṅ, tamām kāṅṭedār jhāṛiyoṅ meṅ aur har johaṛ ke pās.

²⁰us din qādir-e-mutlaq daryā-e-furāt ke parlī taraf ek ustrā kirāe par le kar tum par chalāegā. yānī asūr ke bādshāh ke zarī'e wuh tumhāre sar aur ṭāṅgoṅ ko munḍwāegā. hāṅ, wuh tumhārī dāṛhī-mūṅchh kā bhī safāyā karegā.

²¹us din jo ādmī ek jawān gāy aur do bheṛ-bakriyāṅ rakh sake wuh ḳhushqismat hogā.

²²to bhī wuh itnā dūdh deṅgī ki wuh bālāī khātā rahegā. hāṅ, jo bhī mulk meṅ bāqī rah gayā hogā wuh bālāī aur shahd khāegā.

²³us din jahāṅ jahāṅ hāl meṅ angūr ke hazār paude chāṅdī ke hazār sikkoṅ ke lie bikte haiṅ wahāṅ kāṅṭedār jhāṛiyāṅ aur ūṅṭkaṭāre hī ugeṅge.

²⁴pūrā mulk kāṅṭedār jhāṛiyoṅ aur ūṅṭkaṭāroṅ ke sabab se itnā janglī hogā ki log tīr aur kamān le kar us meṅ shikār khelne ke lie jāeṅge.

²⁵jin bulandiyoṅ par is waqt khetībāṛī kī jātī hai wahāṅ log kāṅṭedār paudoṅ aur ūṅṭkaṭāroṅ kī wajah se jā nahīṅ sakeṅge. gāy-bail un par chareṅge, aur bheṛ-bakriyāṅ sab kuchh pāoṅ tale raundeṅgī.