Read Roman Urdu Geo yasāyāh 8 Bible Online

yasāyāh 8 - Roman Urdu Geo bible

yasāyāh 8

¹rab mujh se hamkalām huā, “ek baṛā taḳhtā le kar us par sāf alfāz meṅ likh de, ‘jald hī lūṭ-khasūṭ, sur'at se ġhāratgarī’.”

²maiṅ ne ūriyāh imām aur zakariyāh bin yabarakiyāh kī maujūdagī meṅ aisā hī likh diyā, kyūṅki donoṅ motabar gawāh the.

³us waqt jab maiṅ apnī bīwī nabiyā ke pās gayā to wuh ummīd se huī. beṭā paidā huā, aur rab ne mujhe hukm diyā, “is kā nām ‘jald hī lūṭ-khasūṭ, sur'at se ġhāratgarī’ rakh.

⁴kyūṅki is se pahle ki laṛkā ‘abbū’ yā ‘ammī’ kah sake damishq kī daulat aur sāmariyya kā māl-o-asbāb chhīn liyā gayā hogā, asūr ke bādshāh ne sab kuchh lūṭ liyā hogā.”

⁵ek bār phir rab mujh se hamkalām huā,

⁶“yih log yarūshalam meṅ ārām se bahne wāle shiloḳh nāle kā pānī mustarad karke razīn aur fiqah bin ramaliyāh se ḳhush haiṅ.

⁷is lie rab un par daryā-e-furāt kā zabardast sailāb lāegā, asūr kā bādshāh apnī tamām shān-o-shaukat ke sāth un par ṭūṭ paṛegā. us kī tamām daryāī shāḳheṅ apne kināroṅ se nikal kar

⁸sailāb kī sūrat meṅ yahūdāh par se guzareṅgī. ai immānūel, pānī parinde kī tarah apne paroṅ ko phailā kar tere pūre mulk ko ḍhāṅp legā, aur log gale tak us meṅ ḍūb jāeṅge.”

⁹ai qaumo, beshak jang ke nāre lagāo. tum phir bhī chaknāchūr ho jāogī. ai dūrdarāz mamālik ke tamām bāshindo, dhyān do! beshak jang ke lie tayyāriyāṅ karo. tum phir bhī pāsh pāsh ho jāoge. kyūṅki jang ke lie tayyāriyāṅ karne ke bāwujūd bhī tumheṅ kuchlā jāegā.

¹⁰jo bhī mansūbā tum bāndho, bāt nahīṅ banegī. āpas meṅ jo bhī faislā karo, tum nākām ho jāoge, kyūṅki allāh hamāre sāth hai. [5]

¹¹jis waqt rab ne mujhe mazbūtī se pakaṛ liyā us waqt us ne mujhe is qaum kī rāhoṅ par chalne se ḳhabardār kiyā. us ne farmāyā,

¹²“har bāt ko sāzish mat samajhnā jo yih qaum sāzish samajhtī hai. jis se yih log ḍarte haiṅ us se na ḍarnā, na dahshat khānā

¹³balki rabb-ul-afwāj se ḍaro. usī se dahshat khāo aur usī ko quddūs māno.

¹⁴tab wuh isrāīl aur yahūdāh kā maqdis hogā, ek aisā patthar jo ṭhokar kā bāis banegā, ek chaṭān jo ṭhes lagne kā sabab hogī. yarūshalam ke bāshinde us ke phande aur jāl meṅ ulajh jāeṅge.

¹⁵un meṅ se bahut sāre ṭhokar khāeṅge. wuh gir kar pāsh pāsh ho jāeṅge aur phande meṅ phaṅs kar pakaṛe jāeṅge.”

¹⁶mujhe mukāshafe ko lifāfe meṅ ḍāl kar mahfūz rakhnā hai, apne shāgirdoṅ ke darmiyān hī allāh kī hidāyat par muhr lagānī hai.

¹⁷maiṅ ḳhud rab ke intizār meṅ rahūṅgā jis ne apne chehre ko yāqūb ke gharāne se chhupā liyā hai. usī se maiṅ ummīd rakhūṅgā.

¹⁸ab maiṅ hāzir hūṅ, maiṅ aur wuh bachche jo allāh ne mujhe die haiṅ, ham isrāīl meṅ ilāhī aur mojizānā nishān haiṅ jin se rabb-ul-afwāj jo koh-e-siyyūn par sukūnat kartā hai logoṅ ko āgāh kar rahā hai.

¹⁹log tumheṅ mashwarā dete haiṅ, “jāo, murdoṅ se rābitā karne wāloṅ aur qismat kā hāl batāne wāloṅ se patā karo, un se jo bārīk āwāzeṅ nikālte aur buṛbuṛāte hue jawāb dete haiṅ.” lekin un se kaho, “kyā munāsib nahīṅ ki qaum apne ḳhudā se mashwarā kare? ham zindoṅ kī ḳhātir mardoṅ se bāt kyūṅ kareṅ?”

²⁰allāh kī hidāyat aur mukāshafā kī taraf rujū karo! jo inkār kare us par subh kī raushnī kabhī nahīṅ chamkegī.

²¹aise log māyūs aur fāqākash hālat meṅ mulk meṅ māre māre phireṅge. aur jab bhūke marne ko hoṅge to jhuṅjhlā kar apne bādshāh aur apne ḳhudā par lānat kareṅge. wuh ūpar āsmān

²²aur nīche zamīn kī taraf dekheṅge, lekin jahāṅ bhī nazar paṛe wahāṅ musībat, andherā aur haulnāk tārīkī hī dikhāī degī. unheṅ tārīkī hī tārīkī meṅ ḍāl diyā jāegā.