Read Roman Urdu Geo ahbār 1 Bible Online

ahbār 1 - Roman Urdu Geo bible

ahbār 1

¹rab ne mulāqāt ke ḳhaime meṅ se mūsā ko bulā kar kahā

²ki isrāīliyoṅ ko ittilā de, “agar tum meṅ se koī rab ko qurbānī pesh karnā chāhe to wuh apne gāy-bailoṅ yā bheṛ-bakriyoṅ meṅ se jānwar chun le.

³agar wuh apne gāy-bailoṅ meṅ se bhasm hone wālī qurbānī chaṛhānā chāhe to wuh beaib bail chun kar use mulāqāt ke ḳhaime ke darwāze par pesh kare tāki rab use qabūl kare.

⁴qurbānī pesh karne wālā apnā hāth jānwar ke sar par rakhe to yih qurbānī maqbūl ho kar us kā kaffārā degī.

⁵qurbānī pesh karne wālā bail ko wahāṅ rab ke sāmne zabah kare. phir hārūn ke beṭe jo imām haiṅ us kā ḳhūn rab ko pesh karke use darwāze par kī qurbāngāh ke chār pahlū'oṅ par chhiṛkeṅ.

⁶is ke bād qurbānī pesh karne wālā khāl utār kar jānwar ke ṭukṛe ṭukṛe kare.

⁷imām qurbāngāh par āg lagā kar us par tartīb se lakaṛiyāṅ chuneṅ.

⁸us par wuh jānwar ke ṭukṛe sar aur charbī samet rakheṅ.

⁹lāzim hai ki qurbānī pesh karne wālā pahle jānwar kī antaṛiyāṅ aur pinḍliyāṅ dhoe, phir imām pūre jānwar ko qurbāngāh par jalā de. is jalne wālī qurbānī kī ḳhushbū rab ko pasand hai.

¹⁰agar bhasm hone wālī qurbānī bheṛ-bakriyoṅ meṅ se chunī jāe to wuh beaib nar ho.

¹¹pesh karne wālā use rab ke sāmne qurbāngāh kī shimālī simt meṅ zabah kare. phir hārūn ke beṭe jo imām haiṅ us kā ḳhūn qurbāngāh ke chār pahlū'oṅ par chhiṛkeṅ.

¹²is ke bād pesh karne wālā jānwar ke ṭukṛe ṭukṛe kare aur imām yih ṭukṛe sar aur charbī samet qurbāngāh kī jaltī huī lakaṛiyoṅ par tartīb se rakhe.

¹³lāzim hai ki qurbānī pesh karne wālā pahle jānwar kī antaṛiyāṅ aur pinḍliyāṅ dhoe, phir imām pūre jānwar ko rab ko pesh karke qurbāngāh par jalā de. is jalne wālī qurbānī kī ḳhushbū rab ko pasand hai.

¹⁴agar bhasm hone wālī qurbānī parindā ho to wuh qumrī yā jawān kabūtar ho.

¹⁵imām use qurbāngāh ke pās le āe aur us kā sar maroṛ kar qurbāngāh par jalā de. wuh us kā ḳhūn yūṅ nikalne de ki wuh qurbāngāh kī ek taraf se nīche ṭapke.

¹⁶wuh us kā poṭā aur jo us meṅ hai dūr karke qurbāngāh kī mashriqī simt meṅ phaiṅk de, wahāṅ jahāṅ rākh phaiṅkī jātī hai.

¹⁷use pesh karte waqt imām us ke par pakaṛ kar parinde ko phāṛ ḍāle, lekin yūṅ ki wuh bilkul ṭukṛe ṭukṛe na ho jāe. phir imām use qurbāngāh par jaltī huī lakaṛiyoṅ par jalā de. is jalne wālī qurbānī kī ḳhushbū rab ko pasand hai.