Read Roman Urdu Geo ahbār 10 Bible Online

ahbār 10 - Roman Urdu Geo bible

ahbār 10

¹hārūn ke beṭe nadab aur abīhū ne apne apne baḳhūrdān le kar un meṅ jalte hue koele ḍāle. un par baḳhūr ḍāl kar wuh rab ke sāmne āe tāki use pesh kareṅ. lekin yih āg nājāiz thī. rab ne yih pesh karne kā hukm nahīṅ diyā thā.

²achānak rab ke huzūr se āg niklī jis ne unheṅ bhasm kar diyā. wahīṅ rab ke sāmne wuh mar gae.

³mūsā ne hārūn se kahā, “ab wuhī huā hai jo rab ne farmāyā thā ki jo mere qarīb haiṅ un se maiṅ apnī quddūsiyat zāhir karūṅga, maiṅ tamām qaum ke sāmne hī apne jalāl kā izhār karūṅga.” hārūn ḳhāmosh rahā.

⁴mūsā ne hārūn ke chachā uzzī'el ke beṭoṅ mīsāel aur ilsafan ko bulā kar kahā, “idhar āo aur apne rishtedāroṅ ko maqdis ke sāmne se uṭhā kar ḳhaimāgāh ke bāhar le jāo.”

⁵wuh āe aur mūsā ke hukm ke ain mutābiq unheṅ un ke zerjāmoṅ samet uṭhā kar ḳhaimāgāh ke bāhar le gae.

⁶mūsā ne hārūn aur us ke dīgar beṭoṅ ilīazar aur itamar se kahā, “mātam kā izhār na karo. na apne bāl bikharne do, na apne kapṛe phāṛo. warnā tum mar jāoge aur rab pūrī jamā'at se nārāz ho jāegā. lekin tumhāre rishtedār aur bāqī tamām isrāīlī zarūr in kā mātam kareṅ jin ko rab ne āg se halāk kar diyā hai.

⁷mulāqāt ke ḳhaime ke darwāze ke bāhar na niklo warnā tum mar jāoge, kyūṅki tumheṅ rab ke tel se masah kiyā gayā hai.” chunāṅche unhoṅ ne aisā hī kiyā.

⁸rab ne hārūn se kahā,

⁹“jab bhī tujhe yā tere beṭoṅ ko mulāqāt ke ḳhaime meṅ dāḳhil honā hai to mai yā koī aur nashā-āwar chīz pīnā manā hai, warnā tum mar jāoge. yih usūl āne wālī nasloṅ ke lie bhī abad tak anmiṭ hai.

¹⁰yih bhī lāzim hai ki tum muqaddas aur ġhairmuqaddas chīzoṅ meṅ, pāk aur nāpāk chīzoṅ meṅ imtiyāz karo.

¹¹tumheṅ isrāīliyoṅ ko tamām pābandiyāṅ sikhānī haiṅ jo maiṅ ne tumheṅ mūsā kī mārifat batāī haiṅ.”

¹²mūsā ne hārūn aur us ke bache hue beṭoṅ ilīazar aur itamar se kahā, “ġhallā kī nazar kā jo hissā rab ke sāmne jalāyā nahīṅ jātā use apne lie le kar beḳhamīrī roṭī pakānā aur qurbāngāh ke pās hī khānā. kyūṅki wuh nihāyat muqaddas hai.

¹³use muqaddas jagah par khānā, kyūṅki wuh rab kī jalne wālī qurbāniyoṅ meṅ se tumhāre aur tumhāre beṭoṅ kā hissā hai. kyūṅki mujhe is kā hukm diyā gayā hai.

¹⁴jo sīnā hilāne wālī qurbānī aur dahnī rān uṭhāne wālī qurbānī ke taur par pesh kī gaī hai, wuh tum aur tumhāre beṭe-beṭiyāṅ khā sakte haiṅ. unheṅ muqaddas jagah par khānā hai. isrāīliyoṅ kī salāmatī kī qurbāniyoṅ meṅ se yih ṭukṛe tumhārā hissā haiṅ.

¹⁵lekin pahle imām rān aur sīne ko jalne wālī qurbāniyoṅ kī charbī ke sāth pesh kareṅ. wuh unheṅ hilāne wālī qurbānī ke taur par rab ke sāmne hilāeṅ. rab farmātā hai ki yih ṭukṛe abad tak tumhāre aur tumhāre beṭoṅ kā hissā haiṅ.”

¹⁶mūsā ne daryāft kiyā ki us bakre ke gosht kā kyā huā jo gunāh kī qurbānī ke taur par chaṛhāyā gayā thā. use patā chalā ki wuh bhī jal gayā thā. yih sun kar use hārūn ke beṭoṅ ilīazar aur itamar par ġhussā āyā. us ne pūchhā,

¹⁷“tum ne gunāh kī qurbānī kā gosht kyūṅ nahīṅ khāyā? tumheṅ use muqaddas jagah par khānā thā. yih ek nihāyat muqaddas hissā hai jo rab ne tumheṅ diyā tāki tum jamā'at kā qusūr dūr karke rab ke sāmne logoṅ kā kaffārā do.

¹⁸chūṅki is bakre kā ḳhūn maqdis meṅ na lāyā gayā is lie tumheṅ us kā gosht maqdis meṅ khānā thā jis tarah maiṅ ne tumheṅ hukm diyā thā.”

¹⁹hārūn ne mūsā ko jawāb de kar kahā, “dekheṅ, āj logoṅ ne apne lie gunāh kī qurbānī aur bhasm hone wālī qurbānī rab ko pesh kī hai jabki mujh par yih āfat guzarī hai. agar maiṅ āj gunāh kī qurbānī se khātā to kyā yih rab ko achchhā lagtā?”

²⁰yih bāt mūsā ko achchhī lagī.