Read Roman Urdu Geo ahbār 13 Bible Online

ahbār 13 - Roman Urdu Geo bible

ahbār 13

²“agar kisī kī jild meṅ sūjan yā papaṛī yā safed dāġh ho aur ḳhatrā hai ki wabāī jildī bīmārī ho to use imāmoṅ yānī hārūn yā us ke beṭoṅ ke pās le ānā hai.

³imām us jagah kā muāinā kare. agar us ke bāl safed ho gae hoṅ aur wuh jild meṅ dhaṅsī huī ho to wabāī bīmārī hai. jab imām ko yih mālūm ho to wuh use nāpāk qarār de.

⁴lekin ho saktā hai ki jild kī jagah safed to hai lekin jild meṅ dhaṅsī huī nahīṅ hai, na us ke bāl safed hue haiṅ. is sūrat meṅ imām us shaḳhs ko sāt din ke lie alāhidagī meṅ rakhe.

⁵sātweṅ din imām dubārā us kā muāinā kare. agar wuh dekhe ki muta'assirā jagah waisī hī hai aur phailī nahīṅ to wuh use mazīd sāt din alāhidagī meṅ rakhe.

⁶sātweṅ din wuh ek aur martabā us kā muāinā kare. agar us jagah kā rang dubārā sehhatmand jild ke rang kī mānind ho rahā ho aur phailī na ho to wuh use pāk qarār de. is kā matlab hai ki yih marz ām papaṛī se zyādā nahīṅ hai. marīz apne kapṛe dho le to wuh pāk ho jāegā.

⁷lekin agar is ke bād muta'assirā jagah phailne lage to wuh dubārā apne āp ko imām ko dikhāe.

⁸imām us kā muāinā kare. agar jagah wāqaī phail gaī ho to imām use nāpāk qarār de, kyūṅki yih wabāī jildī marz hai.

⁹agar kisī ke jism par wabāī jildī marz nazar āe to use imām ke pās lāyā jāe.

¹⁰imām us kā muāinā kare. agar muta'assirā jild meṅ safed sūjan ho, us ke bāl bhī safed ho gae hoṅ, aur us meṅ kachchā gosht maujūd ho

¹¹to is kā matlab hai ki wabāī jildī bīmārī purānī hai. imām us shaḳhs ko sāt din ke lie alāhidagī meṅ rakh kar intizār na kare balki use fauran nāpāk qarār de, kyūṅki yih us kī nāpākī kā sabūt hai.

¹²lekin agar bīmārī jaldī se phail gaī ho, yahāṅ tak ki sar se le kar pāoṅ tak pūrī jild muta'assir huī ho

¹³to imām yih dekh kar marīz ko pāk qarār de. chūṅki pūrī jild safed ho gaī hai is lie wuh pāk hai.

¹⁴lekin jab bhī kahīṅ kachchā gosht nazar āe us waqt wuh nāpāk ho jātā hai.

¹⁵imām yih dekh kar marīz ko nāpāk qarār de. kachchā gosht har sūrat meṅ nāpāk hai, kyūṅki is kā matlab hai ki wabāī jildī bīmārī lag gaī hai.

¹⁶agar kachche gosht kā yih zaḳhm bhar jāe aur muta'assirā jagah kī jild safed ho jāe to marīz imām ke pās jāe.

¹⁷agar imām dekhe ki wāqaī aisā hī huā hai aur muta'assirā jild safed ho gaī hai to wuh use pāk qarār de.

¹⁸agar kisī kī jild par phoṛā ho lekin wuh ṭhīk ho jāe

¹⁹aur us kī jagah safed sūjan yā surḳhī-māil safed dāġh nazar āe to marīz apne āp ko imām ko dikhāe.

²⁰agar wuh us kā muāinā karke dekhe ki muta'assirā jagah jild ke andar dhaṅsī huī hai aur us ke bāl safed ho gae haiṅ to wuh marīz ko nāpāk qarār de. kyūṅki is kā matlab hai ki jahāṅ pahle phoṛā thā wahāṅ wabāī jildī bīmārī paidā ho gaī hai.

²¹lekin agar imām dekhe ki muta'assirā jagah ke bāl safed nahīṅ haiṅ, wuh jild meṅ dhaṅsī huī nazar nahīṅ ātī aur us kā rang dubārā sehhatmand jild kī mānind ho rahā hai to wuh use sāt din ke lie alāhidagī meṅ rakhe.

²²agar is daurān bīmārī mazīd phail jāe to imām marīz ko nāpāk qarār de, kyūṅki is kā matlab hai ki wabāī jildī bīmārī lag gaī hai.

²³lekin agar dāġh na phaile to is kā matlab hai ki yih sirf us bhare hue zaḳhm kā nishān hai jo phoṛe se paidā huā thā. imām marīz ko pāk qarār de.

²⁴agar kisī kī jild par jalne kā zaḳhm lag jāe aur muta'assirā jagah par surḳhī-māil safed dāġh yā safed dāġh paidā ho jāe

²⁵to imām muta'assirā jagah kā muāinā kare. agar mālūm ho jāe ki muta'assirā jagah ke bāl safed ho gae haiṅ aur wuh jild meṅ dhaṅsī huī hai to is kā matlab hai ki choṭ kī jagah par wabāī jildī marz lag gayā hai. imām use nāpāk qarār de, kyūṅki wabāī jildī bīmārī lag gaī hai.

²⁶lekin agar imām ne mālūm kiyā hai ki dāġh meṅ bāl safed nahīṅ haiṅ, wuh jild meṅ dhaṅsā huā nazar nahīṅ ātā aur us kā rang sehhatmand jild kī mānind ho rahā hai to wuh marīz ko sāt din tak alāhidagī meṅ rakhe.

²⁷agar wuh sātweṅ din mālūm kare ki muta'assirā jagah phail gaī hai to wuh use nāpāk qarār de. kyūṅki is kā matlab hai ki wabāī jildī bīmārī lag gaī hai.

²⁸lekin agar dāġh phailā huā nazar nahīṅ ātā aur muta'assirā jild kā rang sehhatmand jild ke rang kī mānind ho gayā hai to is kā matlab hai ki yih sirf us bhare hue zaḳhm kā nishān hai jo jalne se paidā huā thā. imām marīz ko pāk qarār de.

²⁹agar kisī ke sar yā dāṛhī kī jild meṅ nishān nazar āe

³⁰to imām muta'assirā jagah kā muāinā kare. agar wuh dhaṅsī huī nazar āe aur us ke bāl rang ke lihāz se chamakte hue sone kī mānind aur bārīk hoṅ to imām marīz ko nāpāk qarār de. is kā matlab hai ki aisī wabāī jildī bīmārī sar yā dāṛhī kī jild par lag gaī hai jo ḳhārish paidā kartī hai.

³¹lekin agar imām ne mālūm kiyā ki muta'assirā jagah jild meṅ dhaṅsī huī nazar nahīṅ ātī agarche us ke bāloṅ kā rang badal gayā hai to wuh use sāt din ke lie alāhidagī meṅ rakhe.

³²sātweṅ din imām jild kī muta'assirā jagah kā muāinā kare. agar wuh phailī huī nazar nahīṅ ātī aur us ke bāloṅ kā rang chamakdār sone kī mānind nahīṅ hai, sāth hī wuh jagah jild meṅ dhaṅsī huī bhī dikhāī nahīṅ detī,

³³to marīz apne bāl munḍwāe. sirf wuh bāl rah jāeṅ jo muta'assirā jagah se nikalte haiṅ. imām marīz ko mazīd sāt din alāhidagī meṅ rakhe.

³⁴sātweṅ din wuh us kā muāinā kare. agar muta'assirā jagah nahīṅ phailī aur wuh jild meṅ dhaṅsī huī nazar nahīṅ ātī to imām use pāk qarār de. wuh apne kapṛe dho le to wuh pāk ho jāegā.

³⁵lekin agar is ke bād jild kī muta'assirā jagah phailnā shurū ho jāe

³⁶to imām dubārā us kā muāinā kare. agar wuh jagah wāqaī phailī huī nazar āe to marīz nāpāk hai, chāhe muta'assirā jagah ke bāloṅ kā rang chamakte sone kī mānind ho yā na ho.

³⁷lekin agar us ke ḳhayāl meṅ muta'assirā jagah phailī huī nazar nahīṅ ātī balki us meṅ se kāle rang ke bāl nikal rahe haiṅ to is kā matlab hai ki marīz kī sehhat bahāl ho gaī hai. imām use pāk qarār de.

³⁸agar kisī mard yā aurat kī jild par safed dāġh paidā ho jāeṅ

³⁹to imām un kā muāinā kare. agar un kā safed rang halkā sā ho to yih sirf bezarar papaṛī hai. marīz pāk hai.

⁴⁰agar kisī mard kā sar māthe kī taraf yā pīchhe kī taraf ganjā hai to wuh pāk hai.

⁴¹

⁴²lekin agar us jagah jahāṅ wuh ganjā hai surḳhī-māil safed dāġh ho to is kā matlab hai ki wahāṅ wabāī jildī bīmārī lag gaī hai.

⁴³imām us kā muāinā kare. agar ganjī jagah par surḳhī-māil safed sūjan ho jo wabāī jildī bīmārī kī mānind nazar āe

⁴⁴to marīz ko wabāī jildī bīmārī lag gaī hai. imām use nāpāk qarār de.

⁴⁵wabāī jildī bīmārī kā marīz phaṭe kapṛe pahne. us ke bāl bikhre raheṅ. wuh apnī mūṅchhoṅ ko kisī kapṛe se chhupāe aur pukārtā rahe, ‘nāpāk, nāpāk.’

⁴⁶jis waqt tak wabāī jildī bīmārī lagī rahe wuh nāpāk hai. wuh is daurān ḳhaimāgāh ke bāhar jā kar tanhāī meṅ rahe.

⁴⁷ho saktā hai ki ūn yā katān ke kisī libās par phaphūṅdī lag gaī hai,

⁴⁸yā ki phaphūṅdī ūn yā katān ke kisī kapṛe ke ṭukṛe yā kisī chamṛe yā chamṛe kī kisī chīz par lag gaī hai.

⁴⁹agar phaphūṅdī kā rang harā yā lāl sā ho to wuh phailne wālī phaphūṅdī hai, aur lāzim hai ki use imām ko dikhāyā jāe.

⁵⁰imām us kā muāinā karke use sāt din ke lie alāhidagī meṅ rakhe.

⁵¹sātweṅ din wuh dubārā us kā muāinā kare. agar phaphūṅdī phail gaī ho to is kā matlab hai ki wuh nuqsāndeh hai. muta'assirā chīz nāpāk hai.

⁵²imām use jalā de, kyūṅki yih phaphūṅdī nuqsāndeh hai. lāzim hai ki use jalā diyā jāe.

⁵³lekin agar in sāt dinoṅ ke bād phaphūṅdī phailī huī nazar nahīṅ ātī

⁵⁴to imām hukm de ki muta'assirā chīz ko dhulwāyā jāe. phir wuh use mazīd sāt din ke lie alāhidagī meṅ rakhe.

⁵⁵is ke bād wuh dubārā us kā muāinā kare. agar wuh mālūm kare ki phaphūṅdī to phailī huī nazar nahīṅ ātī lekin us kā rang waise kā waisā hai to wuh nāpāk hai. use jalā denā, chāhe phaphūṅdī muta'assirā chīz ke sāmne wāle hisse yā pichhle hisse meṅ lagī ho.

⁵⁶lekin agar mālūm ho jāe ki phaphūṅdī kā rang māṅd paṛ gayā hai to imām kapṛe yā chamṛe meṅ se muta'assirā jagah phāṛ kar nikāl de.

⁵⁷to bhī ho saktā hai ki phaphūṅdī dubārā usī kapṛe yā chamṛe par nazar āe. is kā matlab hai ki wuh phail rahī hai aur use jalā denā lāzim hai.

⁵⁸lekin agar phaphūṅdī dhone ke bād ġhāib ho jāe to use ek aur dafā dhonā hai. phir muta'assirā chīz pāk hogī.

⁵⁹isī tarah phaphūṅdī se nipaṭnā hai, chāhe wuh ūn yā katān ke kisī libās ko lag gaī ho, chāhe ūn yā katān ke kisī ṭukṛe yā chamṛe kī kisī chīz ko lag gaī ho. in hī usūloṅ ke taht faislā karnā hai ki muta'assirā chīz pāk hai yā nāpāk.”