Read Roman Urdu Geo ahbār 14 Bible Online

ahbār 14 - Roman Urdu Geo bible

ahbār 14

²“agar koī shaḳhs jildī bīmārī se shifā pāe aur use pāk-sāf karānā hai to use imām ke pās lāyā jāe

³jo ḳhaimāgāh ke bāhar jā kar us kā muāinā kare. agar wuh dekhe ki marīz kī sehhat wāqaī bahāl ho gaī hai

⁴to imām us ke lie do zindā aur pāk parinde, deodār kī lakaṛī, qirmizī rang kā dhāgā aur zūfā mangwāe.

⁵imām ke hukm par parindoṅ meṅ se ek ko tāzā pānī se bhare hue miṭṭī ke bartan ke ūpar zabah kiyā jāe.

⁶imām zindā parinde ko deodār kī lakaṛī, qirmizī rang ke dhāge aur zūfā ke sāth zabah kie gae parinde ke us ḳhūn meṅ ḍubo de jo miṭṭī ke bartan ke pānī meṅ ā gayā hai.

⁷wuh pānī se milāyā huā ḳhūn sāt bār pāk hone wāle shaḳhs par chhiṛak kar use pāk qarār de, phir zindā parinde ko khule maidān meṅ chhoṛ de.

⁸jo apne āp ko pāk-sāf karā rahā hai wuh apne kapṛe dhoe, apne tamām bāl munḍwāe aur nahā le. is ke bād wuh pāk hai. ab wuh ḳhaimāgāh meṅ dāḳhil ho saktā hai agarche wuh mazīd sāt din apne ḍere meṅ nahīṅ jā saktā.

⁹sātweṅ din wuh dubārā apne sar ke bāl, apnī dāṛhī, apne abrū aur bāqī tamām bāl munḍwāe. wuh apne kapṛe dhoe aur nahā le. tab wuh pāk hai.

¹⁰āṭhweṅ din wuh do bheṛ ke nar bachche aur ek yaksālā bheṛ chun le jo beaib hoṅ. sāth hī wuh ġhallā kī nazar ke lie tel ke sāth milāyā gayā sāṛhe 4 kilogrām behtarīn maidā aur 300 milīliṭar tel le.

¹¹phir jis imām ne use pāk qarār diyā wuh use in qurbāniyoṅ samet mulāqāt ke ḳhaime ke darwāze par rab ko pesh kare.

¹²bheṛ kā ek nar bachchā aur 300 milīliṭar tel qusūr kī qurbānī ke lie hai. imām unheṅ hilāne wālī qurbānī ke taur par rab ke sāmne hilāe.

¹³phir wuh bheṛ ke is bachche ko ḳhaime ke darwāze par zabah kare jahāṅ gunāh kī qurbāniyāṅ aur bhasm hone wālī qurbāniyāṅ zabah kī jātī haiṅ. gunāh kī qurbāniyoṅ kī tarah qusūr kī yih qurbānī imām kā hissā hai aur nihāyat muqaddas hai.

¹⁴imām ḳhūn meṅ se kuchh le kar pāk hone wāle ke dahne kān kī lau par aur us ke dahne hāth aur dahne pāoṅ ke angūṭhoṅ par lagāe.

¹⁵ab wuh 300 milīliṭar tel meṅ se kuchh le kar apne bāeṅ hāth kī hathelī par ḍāle.

¹⁶apne dahne hāth ke angūṭhe ke sāth wālī unglī is tel meṅ ḍubo kar wuh use sāt bār rab ke sāmne chhiṛke.

¹⁷wuh apnī hathelī par ke tel meṅ se kuchh aur le kar pāk hone wāle ke dahne kān kī lau par aur us ke dahne hāth aur dahne pāoṅ ke angūṭhoṅ par lagā de yānī un jaghoṅ par jahāṅ wuh qusūr kī qurbānī kā ḳhūn lagā chukā hai.

¹⁸imām apnī hathelī par kā bāqī tel pāk hone wāle ke sar par ḍāl kar rab ke sāmne us kā kaffārā de.

¹⁹is ke bād imām gunāh kī qurbānī chaṛhā kar pāk hone wāle kā kaffārā de. āḳhir meṅ wuh bhasm hone wālī qurbānī kā jānwar zabah kare.

²⁰wuh use ġhallā kī nazar ke sāth qurbāngāh par chaṛhā kar us kā kaffārā de. tab wuh pāk hai.

²¹agar shifāyāb shaḳhs ġhurbat ke bāis yih qurbāniyāṅ nahīṅ chaṛhā saktā to phir wuh qusūr kī qurbānī ke lie bheṛ kā sirf ek nar bachchā le āe. kāfī hai ki kaffārā dene ke lie yihī rab ke sāmne hilāyā jāe. sāth sāth ġhallā kī nazar ke lie ḍeṛh kilogrām behtarīn maidā tel ke sāth milā kar pesh kiyā jāe aur 300 milīliṭar tel.

²²is ke ilāwā wuh do qumriyāṅ yā do jawān kabūtar pesh kare, ek ko gunāh kī qurbānī ke lie aur dūsre ko bhasm hone wālī qurbānī ke lie.

²³āṭhweṅ din wuh unheṅ mulāqāt ke ḳhaime ke darwāze par imām ke pās aur rab ke sāmne le āe tāki wuh pāk-sāf ho jāe.

²⁴imām bheṛ ke bachche ko 300 milīliṭar tel samet le kar hilāne wālī qurbānī ke taur par rab ke sāmne hilāe.

²⁵wuh qusūr kī qurbānī ke lie bheṛ ke bachche ko zabah kare aur us ke ḳhūn meṅ se kuchh le kar pāk hone wāle ke dahne kān kī lau par aur us ke dahne hāth aur dahne pāoṅ ke angūṭhoṅ par lagāe.

²⁶ab wuh 300 milīliṭar tel meṅ se kuchh apne bāeṅ hāth kī hathelī par ḍāle

²⁷aur apne dahne hāth ke angūṭhe ke sāth wālī unglī is tel meṅ ḍubo kar use sāt bār rab ke sāmne chhiṛak de.

²⁸wuh apnī hathelī par ke tel meṅ se kuchh aur le kar pāk hone wāle ke dahne kān kī lau par aur us ke dahne hāth aur dahne pāoṅ ke angūṭhoṅ par lagā de yānī un jaghoṅ par jahāṅ wuh qusūr kī qurbānī kā ḳhūn lagā chukā hai.

²⁹apnī hathelī par kā bāqī tel wuh pāk hone wāle ke sar par ḍāl de tāki rab ke sāmne us kā kaffārā de.

³⁰is ke bād wuh shifāyāb shaḳhs kī gunjāish ke mutābiq do qumriyāṅ yā do jawān kabūtar chaṛhāe,

³¹ek ko gunāh kī qurbānī ke lie aur dūsre ko bhasm hone wālī qurbānī ke lie. sāth hī wuh ġhallā kī nazar pesh kare. yūṅ imām rab ke sāmne us kā kaffārā detā hai.

³²yih usūl aise shaḳhs ke lie hai jo wabāī jildī bīmārī se shifā pā gayā hai lekin apnī ġhurbat ke bāis pāk ho jāne ke lie pūrī qurbānī pesh nahīṅ kar saktā.”

³³rab ne mūsā aur hārūn se kahā,

³⁴“jab tum mulk-e-kan'ān meṅ dāḳhil hoge jo maiṅ tumheṅ dūṅgā to wahāṅ aise makān hoṅge jin meṅ maiṅ ne phaphūṅdī phailne dī hai.

³⁵aise ghar kā mālik jā kar imām ko batāe ki maiṅ ne apne ghar meṅ phaphūṅdī jaisī koī chīz dekhī hai.

³⁶tab imām hukm de ki ghar kā muāinā karne se pahle ghar kā pūrā sāmān nikālā jāe. warnā agar ghar ko nāpāk qarār diyā jāe to sāmān ko bhī nāpāk qarār diyā jāegā. is ke bād imām andar jā kar makān kā muāinā kare.

³⁷wuh dīwāroṅ ke sāth lagī huī phaphūṅdī kā muāinā kare. agar muta'assirā jagheṅ harī yā lāl sī hoṅ aur dīwār ke andar dhaṅsī huī nazar āeṅ

³⁸to phir imām ghar se nikal kar sāt din ke lie tālā lagāe.

³⁹sātweṅ din wuh wāpas ā kar makān kā muāinā kare. agar phaphūṅdī phailī huī nazar āe

⁴⁰to wuh hukm de ki muta'assirā pattharoṅ ko nikāl kar ābādī ke bāhar kisī nāpāk jagah par phaiṅkā jāe.

⁴¹nīz wuh hukm de ki andar kī dīwāroṅ ko kuredā jāe aur kuredī huī miṭṭī ko ābādī ke bāhar kisī nāpāk jagah par phaiṅkā jāe.

⁴²phir log nae patthar lagā kar ghar ko nae gāre se plastar kareṅ.

⁴³lekin agar is ke bāwujūd phaphūṅdī dubārā paidā ho jāe

⁴⁴to imām ā kar dubārā us kā muāinā kare. agar wuh dekhe ki phaphūṅdī ghar meṅ phail gaī hai to is kā matlab hai ki phaphūṅdī nuqsāndeh hai, is lie ghar nāpāk hai.

⁴⁵lāzim hai ki use pūre taur par ḍhā diyā jāe aur sab kuchh yānī us ke patthar, lakaṛī aur plastar ko ābādī ke bāhar kisī nāpāk jagah par phaiṅkā jāe.

⁴⁶agar imām ne kisī ghar kā muāinā karke tālā lagā diyā hai aur phir bhī koī us ghar meṅ dāḳhil ho jāe to wuh shām tak nāpāk rahegā.

⁴⁷jo aise ghar meṅ soe yā khānā khāe lāzim hai ki wuh apne kapṛe dho le.

⁴⁸lekin agar ghar ko nae sire se plastar karne ke bād imām ā kar us kā dubārā muāinā kare aur dekhe ki phaphūṅdī dubārā nahīṅ niklī to is kā matlab hai ki phaphūṅdī ḳhatm ho gaī hai. wuh use pāk qarār de.

⁴⁹use gunāh se pāk-sāf karāne ke lie wuh do parinde, deodār kī lakaṛī, qirmizī rang kā dhāgā aur zūfā le le.

⁵⁰wuh parindoṅ meṅ se ek ko tāzā pānī se bhare hue miṭṭī ke bartan ke ūpar zabah kare.

⁵¹is ke bād wuh deodār kī lakaṛī, zūfā, qirmizī rang kā dhāgā aur zindā parindā le kar us tāzā pānī meṅ ḍubo de jis ke sāth zabah kie hue parinde kā ḳhūn milāyā gayā hai aur is pānī ko sāt bār ghar par chhiṛak de.

⁵²in chīzoṅ se wuh ghar ko gunāh se pāk-sāf kartā hai.

⁵³āḳhir meṅ wuh zindā parinde ko ābādī ke bāhar khule maidān meṅ chhoṛ de. yūṅ wuh ghar kā kaffārā degā, aur wuh pāk-sāf ho jāegā.

⁵⁴lāzim hai ki har qism kī wabāī bīmārī se aise nipṭo jaise bayān kiyā gayā hai, chāhe wuh wabāī jildī bīmāriyāṅ hoṅ (masalan ḳhārish, sūjan, papaṛī yā safed daġh), chāhe kapṛoṅ yā gharoṅ meṅ phaphūṅdī ho.

⁵⁵

⁵⁶

⁵⁷in usūloṅ ke taht faislā karnā hai ki koī shaḳhs yā chīz pāk hai yā nāpāk.”