Read Roman Urdu Geo ahbār 16 Bible Online

ahbār 16 - Roman Urdu Geo bible

ahbār 16

¹jab hārūn ke do beṭe rab ke qarīb ā kar halāk hue to is ke bād rab mūsā se hamkalām huā.

²us ne kahā, “apne bhāī hārūn ko batānā ki wuh sirf muqarrarā waqt par parde ke pīchhe muqaddastarīn kamre meṅ dāḳhil ho kar ahd ke sandūq ke ḍhakne ke sāmne khaṛā ho jāe, warnā wuh mar jāegā. kyūṅki maiṅ ḳhud us ḍhakne ke ūpar bādal kī sūrat meṅ zāhir hotā hūṅ.

³aur jab bhī wuh dāḳhil ho to gunāh kī qurbānī ke lie ek jawān bail aur bhasm hone wālī qurbānī ke lie ek menḍhā pesh kare.

⁴pahle wuh nahā kar imām ke katān ke muqaddas kapṛe pahan le yānī zerjāmā, us ke nīche pājāmā, phir kamarband aur pagaṛī.

⁵isrāīl kī jamā'at hārūn ko gunāh kī qurbānī ke lie do bakre aur bhasm hone wālī qurbānī ke lie ek menḍhā de.

⁶pahle hārūn apne aur apne gharāne ke lie jawān bail ko gunāh kī qurbānī ke taur par chaṛhāe.

⁷phir wuh donoṅ bakroṅ ko mulāqāt ke ḳhaime ke darwāze par rab ke sāmne le āe.

⁸wahāṅ wuh qur'ā ḍāl kar ek ko rab ke lie chune aur dūsre ko azāzel ke lie.

⁹jo bakrā rab ke lie hai use wuh gunāh kī qurbānī ke taur par pesh kare.

¹⁰dūsrā bakrā jo qur'e ke zarī'e azāzel ke lie chunā gayā use zindā hālat meṅ rab ke sāmne khaṛā kiyā jāe tāki wuh jamā'at kā kaffārā de. wahāṅ se use registān meṅ azāzel ke pās bhejā jāe.

¹¹lekin pahle hārūn jawān bail ko gunāh kī qurbānī ke taur par chaṛhā kar apnā aur apne gharāne kā kaffārā de. use zabah karne ke bād

¹²wuh baḳhūr kī qurbāngāh se jalte hue koeloṅ se bharā huā bartan le kar apnī donoṅ muṭṭhiyāṅ bārīk ḳhushbūdār baḳhūr se bhar le aur muqaddastarīn kamre meṅ dāḳhil ho jāe.

¹³wahāṅ wuh rab ke huzūr baḳhūr ko jalte hue koeloṅ par ḍāl de. is se paidā hone wālā dhuāṅ ahd ke sandūq kā ḍhaknā chhupā degā tāki hārūn mar na jāe.

¹⁴ab wuh jawān bail ke ḳhūn meṅ se kuchh le kar apnī unglī se ḍhakne ke sāmne wāle hisse par chhiṛke, phir kuchh apnī unglī se sāt bār us ke sāmne zamīn par chhiṛke.

¹⁵is ke bād wuh us bakre ko zabah kare jo qaum ke lie gunāh kī qurbānī hai. wuh us kā ḳhūn muqaddastarīn kamre meṅ le āe aur use bail ke ḳhūn kī tarah ahd ke sandūq ke ḍhakne par aur sāt bār us ke sāmne zamīn par chhiṛke.

¹⁶yūṅ wuh muqaddastarīn kamre kā kaffārā degā jo isrāīliyoṅ kī nāpākiyoṅ aur tamām gunāhoṅ se muta'assir hotā rahtā hai. is se wuh mulāqāt ke pūre ḳhaime kā bhī kaffārā degā jo ḳhaimāgāh ke darmiyān hone ke bāis isrāīliyoṅ kī nāpākiyoṅ se muta'assir hotā rahtā hai.

¹⁷jitnā waqt hārūn apnā, apne gharāne kā aur isrāīl kī pūrī jamā'at kā kaffārā dene ke lie muqaddastarīn kamre meṅ rahegā is daurān kisī dūsre ko mulāqāt ke ḳhaime meṅ ṭhaharne kī ijāzat nahīṅ hai.

¹⁸phir wuh muqaddastarīn kamre se nikal kar ḳhaime meṅ rab ke sāmne paṛī qurbāngāh kā kaffārā de. wuh bail aur bakre ke ḳhūn meṅ se kuchh le kar use qurbāngāh ke chāroṅ sīṅgoṅ par lagāe.

¹⁹kuchh ḳhūn wuh apnī unglī se sāt bār us par chhiṛak de. yūṅ wuh use isrāīliyoṅ kī nāpākiyoṅ se pāk karke maḳhsūs-o-muqaddas karegā.

²⁰muqaddastarīn kamre, mulāqāt ke ḳhaime aur qurbāngāh kā kaffārā dene ke bād hārūn zindā bakre ko sāmne lāe.

²¹wuh apne donoṅ hāth us ke sar par rakhe aur isrāīliyoṅ ke tamām qusūr yānī un ke tamām jarāim aur gunāhoṅ kā iqrār karke unheṅ bakre ke sar par ḍāl de. phir wuh use registān meṅ bhej de. is ke lie wuh bakre ko ek ādmī ke sapurd kare jise yih zimmādārī dī gaī hai.

²²bakrā apne āp par un kā tamām qusūr uṭhā kar kisī wīrān jagah meṅ le jāegā. wahāṅ sāth wālā ādmī use chhoṛ āe.

²³is ke bād hārūn mulāqāt ke ḳhaime meṅ jāe aur katān ke wuh kapṛe jo us ne muqaddastarīn kamre meṅ dāḳhil hone se peshtar pahan lie the utār kar wahīṅ chhoṛ de.

²⁴wuh muqaddas jagah par nahā kar apnī ḳhidmat ke ām kapṛe pahan le. phir wuh bāhar ā kar apne aur apnī qaum ke lie bhasm hone wālī qurbānī pesh kare tāki apnā aur apnī qaum kā kaffārā de.

²⁵is ke ilāwā wuh gunāh kī qurbānī kī charbī qurbāngāh par jalā de.

²⁶jo ādmī azāzel ke lie bakre ko registān meṅ chhoṛ āyā hai wuh apne kapṛe dho kar nahā le. is ke bād wuh ḳhaimāgāh meṅ ā saktā hai.

²⁷jis bail aur bakre ko gunāh kī qurbānī ke lie pesh kiyā gayā aur jin kā ḳhūn kaffārā dene ke lie muqaddastarīn kamre meṅ lāyā gayā, lāzim hai ki un kī khāleṅ, gosht aur gobar ḳhaimāgāh ke bāhar jalā diyā jāe.

²⁸yih chīzeṅ jalāne wālā bād meṅ apne kapṛe dho kar nahā le. phir wuh ḳhaimāgāh meṅ ā saktā hai.

²⁹lāzim hai ki sātweṅ mahīne ke dasweṅ din isrāīlī aur un ke darmiyān rahne wāle pardesī apnī jān ko dukh deṅ aur kām na kareṅ. yih usūl tumhāre lie abad tak qāim rahe.

³⁰is din tumhārā kaffārā diyā jāegā tāki tumheṅ pāk kiyā jāe. tab tum rab ke sāmne apne tamām gunāhoṅ se pāk ṭhahroge.

³¹pūrā din ārām karo aur apnī jān ko dukh do. yih usūl abad tak qāim rahe.

³²is din imām-e-āzam tumhārā kaffārā de, wuh imām jise us ke bāp kī jagah masah kiyā gayā aur iḳhtiyār diyā gayā hai. wuh katān ke muqaddas kapṛe pahan kar

³³muqaddastarīn kamre, mulāqāt ke ḳhaime, qurbāngāh, imāmoṅ aur jamā'at ke tamām logoṅ kā kaffārā de.

³⁴lāzim hai ki sāl meṅ ek dafā isrāīliyoṅ ke tamām gunāhoṅ kā kaffārā diyā jāe. yih usūl tumhāre lie abad tak qāim rahe.” sab kuchh waise hī kiyā gayā jaisā rab ne mūsā ko hukm diyā thā.