Read Roman Urdu Geo ahbār 18 Bible Online

ahbār 18 - Roman Urdu Geo bible

ahbār 18

¹rab ne mūsā se kahā,

²“isrāīliyoṅ ko batānā ki maiṅ rab tumhārā ḳhudā hūṅ.

³misriyoṅ kī tarah zindagī na guzārnā jin meṅ tum rahte the. mulk-e-kan'ān ke logoṅ kī tarah bhī zindagī na guzārnā jin ke pās maiṅ tumheṅ le jā rahā hūṅ. un ke rasm-o-riwāj na apnānā.

⁴mere hī ahkām par amal karo aur merī hidāyāt ke mutābiq chalo. maiṅ rab tumhārā ḳhudā hūṅ.

⁵merī hidāyāt aur ahkām ke mutābiq chalnā, kyūṅki jo yūṅ karegā wuh jītā rahegā. maiṅ rab hūṅ.

⁶tum meṅ se koī bhī apnī qarībī rishtedār se hambistar na ho. maiṅ rab hūṅ.

⁷apnī māṅ se hambistar na honā, warnā tere bāp kī behurmatī ho jāegī. wuh terī māṅ hai, is lie us se hambistar na honā.

⁸apne bāp kī kisī bhī bīwī se hambistar na honā, warnā tere bāp kī behurmatī ho jāegī.

⁹apnī bahan se hambistar na honā, chāhe wuh tere bāp yā terī māṅ kī beṭī ho, chāhe wuh tere hī ghar meṅ yā kahīṅ aur paidā huī ho.

¹⁰apnī potī yā nawāsī se hambistar na honā, warnā terī apnī behurmatī ho jāegī.

¹¹apne bāp kī bīwī kī beṭī se hambistar na honā. wuh terī bahan hai.

¹²apnī phūphī se hambistar na honā. wuh tere bāp kī qarībī rishtedār hai.

¹³apnī ḳhālā se hambistar na honā. wuh terī māṅ kī qarībī rishtedār hai.

¹⁴apne bāp ke bhāī kī bīwī se hambistar na honā, warnā tere bāp ke bhāī kī behurmatī ho jāegī. us kī bīwī terī chachī hai.

¹⁵apnī bahū se hambistar na honā. wuh tere beṭe kī bīwī hai.

¹⁶apnī bhābī se hambistar na honā, warnā tere bhāī kī behurmatī ho jāegī.

¹⁷agar terā jinsī tālluq kisī aurat se ho to us kī beṭī, potī yā nawāsī se hambistar honā manā hai, kyūṅki wuh us kī qarībī rishtedār haiṅ. aisā karnā baṛī sharmnāk harkat hai.

¹⁸apnī bīwī ke jīte jī us kī bahan se shādī na karnā.

¹⁹kisī aurat se us kī māhwārī ke dinoṅ meṅ hambistar na honā. is daurān wuh nāpāk hai.

²⁰kisī dūsre mard kī bīwī se hambistar na honā, warnā tū apne āp ko nāpāk karegā.

²¹apne kisī bhī bachche ko malik dewatā ko qurbānī ke taur par pesh karke jalā denā manā hai. aisī harkat se tū apne ḳhudā ke nām ko dāġh lagāegā. maiṅ rab hūṅ.

²²mard dūsre mard ke sāth jinsī tālluqāt na rakhe. aisī harkat qābil-e-ghin hai.

²³kisī jānwar se jinsī tālluqāt na rakhnā, warnā tū nāpāk ho jāegā. auratoṅ ke lie bhī aisā karnā manā hai. yih baṛī sharmnāk harkat hai.

²⁴aisī harkatoṅ se apne āp ko nāpāk na karnā. kyūṅki jo qaumeṅ maiṅ tumhāre āge mulk se nikālūṅgā wuh isī tarah nāpāk hotī rahīṅ.

²⁵mulk ḳhud bhī nāpāk huā. is lie maiṅ ne use us ke qusūr ke sabab se sazā dī, aur natīje meṅ us ne apne bāshindoṅ ko ugal diyā.

²⁶lekin tum merī hidāyāt aur ahkām ke mutābiq chalo. na desī aur na pardesī aisī koī ghinaunī harkat kareṅ.

²⁷kyūṅki yih tamām qābil-e-ghin bāteṅ un se huīṅ jo tum se pahle is mulk meṅ rahte the. yūṅ mulk nāpāk huā.

²⁸lihāzā agar tum bhī mulk ko nāpāk karoge to wuh tumheṅ isī tarah ugal degā jis tarah us ne tum se pahle maujūd qaumoṅ ko ugal diyā.

²⁹jo bhī mazkūrā ghinaunī harkatoṅ meṅ se ek kare use us kī qaum meṅ se miṭāyā jāe.

³⁰mere ahkām ke mutābiq chalte raho aur aise qābil-e-ghin rasm-o-riwāj na apnānā jo tumhāre āne se pahle rāij the. in se apne āp ko nāpāk na karnā. maiṅ rab tumhārā ḳhudā hūṅ.”