Read Roman Urdu Geo ahbār 19 Bible Online

ahbār 19 - Roman Urdu Geo bible

ahbār 19

¹rab ne mūsā se kahā,

²“isrāīliyoṅ kī pūrī jamā'at ko batānā ki muqaddas raho, kyūṅki maiṅ rab tumhārā ḳhudā quddūs hūṅ.

³tum meṅ se har ek apne māṅ-bāp kī izzat kare. hafte ke din kām na karnā. maiṅ rab tumhārā ḳhudā hūṅ.

⁴na butoṅ kī taraf rujū karnā, na apne lie dewatā ḍhālnā. maiṅ hī rab tumhārā ḳhudā hūṅ.

⁵jab tum rab ko salāmatī kī qurbānī pesh karte ho to use yūṅ chaṛhāo ki tum manzūr ho jāo.

⁶us kā gosht usī din yā agle din khāyā jāe. jo bhī tīsre din tak bach jātā hai use jalānā hai.

⁷agar koī use tīsre din khāe to use ilm honā chāhie ki yih qurbānī nāpāk hai aur rab ko pasand nahīṅ hai.

⁸aise shaḳhs ko apne qusūr kī sazā uṭhānī paṛegī, kyūṅki us ne us chīz kī muqaddas hālat ḳhatm kī hai jo rab ke lie maḳhsūs kī gaī thī. use us kī qaum meṅ se miṭāyā jāe.

⁹kaṭāī ke waqt apnī fasal pūre taur par na kāṭnā balki khet ke kināroṅ par kuchh chhoṛ denā. is tarah jo kuchh kaṭāī karte waqt khet meṅ bach jāe use chhoṛnā.

¹⁰angūr ke bāġhoṅ meṅ bhī jo kuchh angūr toṛte waqt bach jāe use chhoṛ denā. jo angūr zamīn par gir jāeṅ unheṅ uṭhā kar na le jānā. unheṅ ġharīboṅ aur pardesiyoṅ ke lie chhoṛ denā. maiṅ rab tumhārā ḳhudā hūṅ.

¹¹chorī na karnā, jhūṭ na bolnā, ek dūsre ko dhokā na denā.

¹²mere nām kī qasam khā kar dhokā na denā, warnā tum mere nām ko dāġh lagāoge. maiṅ rab hūṅ.

¹³ek dūsre ko na dabānā aur na lūṭnā. kisī kī mazdūrī usī din kī shām tak de denā aur use aglī subh tak roke na rakhnā.

¹⁴bahre ko na kosnā, na andhe ke rāste meṅ koī chīz rakhnā jis se wuh ṭhokar khāe. is meṅ bhī apne ḳhudā kā ḳhauf mānanā. maiṅ rab hūṅ.

¹⁵adālat meṅ kisī kī haqtalfī na karnā. faislā karte waqt kisī kī bhī jānibdārī na karnā, chāhe wuh ġharīb yā asar-o-rasūḳh wālā ho. insāf se apne paṛosī kī adālat kar.

¹⁶apnī qaum meṅ idhar udhar phirte hue kisī par buhtān na lagānā. koī bhī aisā kām na karnā jis se kisī kī jān ḳhatre meṅ paṛ jāe. maiṅ rab hūṅ.

¹⁷dil meṅ apne bhāī se nafrat na karnā. agar kisī kī sarzanish karnī hai to rū-ba-rū karnā, warnā tū us ke sabab se qusūrwār ṭhahregā.

¹⁸intiqām na lenā. apnī qaum ke kisī shaḳhs par der tak terā ġhussā na rahe balki apne paṛosī se waisī muhabbat rakhnā jaisī tū apne āp se rakhtā hai. maiṅ rab hūṅ.

¹⁹merī hidāyāt par amal karo. do muḳhtalif qism ke jānwaroṅ ko milāp na karne denā. apne khet meṅ do qism ke bīj na bonā. aisā kapṛā na pahnanā jo do muḳhtalif qism ke dhāgoṅ kā bunā huā ho.

²⁰agar koī ādmī kisī launḍī se jis kī mangnī kisī aur se ho chukī ho hambistar ho jāe aur launḍī ko ab tak na paisoṅ se na waise hī āzād kiyā gayā ho to munāsib sazā dī jāe. lekin unheṅ sazā-e-maut na dī jāe, kyūṅki use ab tak āzād nahīṅ kiyā gayā.

²¹qusūrwār ādmī mulāqāt ke ḳhaime ke darwāze par ek menḍhā le āe tāki wuh rab ko qusūr kī qurbānī ke taur par pesh kiyā jāe.

²²imām is qurbānī se rab ke sāmne us ke gunāh kā kaffārā de. yūṅ us kā gunāh muāf kiyā jāegā.

²³jab mulk-e-kan'ān meṅ dāḳhil hone ke bād tum phaldār daraḳht lagāoge to pahle tīn sāl un kā phal na khānā balki use mamnūs [2] samajhnā.

²⁴chauthe sāl un kā tamām phal ḳhushī ke muqaddas nazarāne ke taur par rab ke lie maḳhsūs kiyā jāe.

²⁵pāṅchweṅ sāl tum un kā phal khā sakte ho. yūṅ tumhārī fasal baṛhāī jāegī. maiṅ rab tumhārā ḳhudā hūṅ.

²⁶aisā gosht na khānā jis meṅ ḳhūn ho. fāl yā shugūn na nikālnā.

²⁷apne sar ke bāl gol shakl meṅ na kaṭwānā, na apnī dāṛhī ko tarāshnā.

²⁸apne āp ko murdoṅ ke sabab se kāṭ kar zaḳhmī na karnā, na apnī jild par nuqūsh gudwānā. maiṅ rab hūṅ.

²⁹apnī beṭī ko kasbī na banānā, warnā us kī muqaddas hālat jātī rahegī aur mulk zinākārī ke bāis harāmkārī se bhar jāegā.

³⁰hafte ke din ārām karnā aur mere maqdis kā ehtirām karnā. maiṅ rab hūṅ.

³¹aise logoṅ ke pās na jānā jo murdoṅ se rābitā karte haiṅ, na ġhaibdānoṅ kī taraf rujū karnā, warnā tum un se nāpāk ho jāoge. maiṅ rab tumhārā ḳhudā hūṅ.

³²būṛhe logoṅ ke sāmne uṭh kar khaṛā ho jānā, buzurgoṅ kī izzat karnā aur apne ḳhudā kā ehtirām karnā. maiṅ rab hūṅ.

³³jo pardesī tumhāre mulk meṅ tumhāre darmiyān rahtā hai use na dabānā.

³⁴us ke sāth aisā sulūk kar jaisā apne hamwatanoṅ ke sāth kartā hai. jis tarah tū apne āp se muhabbat rakhtā hai usī tarah us se bhī muhabbat rakhnā. yād rahe ki tum ḳhud misr meṅ pardesī the. maiṅ rab tumhārā ḳhudā hūṅ.

³⁵nāinsāfī na karnā. na adālat meṅ, na lambāī nāpte waqt, na tolte waqt aur na kisī chīz kī miqdār nāpte waqt.

³⁶sahīh tarāzū, sahīh bāṭ aur sahīh paimānā istemāl karnā. maiṅ rab tumhārā ḳhudā hūṅ jo tumheṅ misr se nikāl lāyā hūṅ.

³⁷merī tamām hidāyāt aur tamām ahkām māno aur un par amal karo. maiṅ rab hūṅ.”