Read Roman Urdu Geo ahbār 20 Bible Online

ahbār 20 - Roman Urdu Geo bible

ahbār 20

¹rab ne mūsā se kahā,

²“isrāīliyoṅ ko batānā ki tum meṅ se jo bhī apne bachche ko malik dewatā ko qurbānī ke taur par pesh kare use sazā-e-maut denī hai. is meṅ koī farq nahīṅ ki wuh isrāīlī hai yā pardesī. jamā'at ke log use sangsār kareṅ.

³maiṅ ḳhud aise shaḳhs ke ḳhilāf ho jāūṅgā aur use us kī qaum meṅ se miṭā ḍālūṅgā. kyūṅki apne bachchoṅ ko malik ko pesh karne se us ne mere maqdis ko nāpāk kiyā aur mere nām ko dāġh lagāyā hai.

⁴agar jamā'at ke log apnī āṅkheṅ band karke aise shaḳhs kī harkateṅ nazarandāz kareṅ aur use sazā-e-maut na deṅ

⁵to phir maiṅ ḳhud aise shaḳhs aur us ke gharāne ke ḳhilāf khaṛā ho jāūṅgā. maiṅ use aur un tamām logoṅ ko qaum meṅ se miṭā ḍālūṅgā jinhoṅ ne us ke pīchhe lag kar malik dewatā ko sijdā karne se zinā kiyā hai.

⁶jo shaḳhs murdoṅ se rābitā karne aur ġhaibdānī karne wāloṅ kī taraf rujū kartā hai maiṅ us ke ḳhilāf ho jāūṅgā. un kī pairawī karne se wuh zinā kartā hai. maiṅ use us kī qaum meṅ se miṭā ḍālūṅgā.

⁷apne āp ko mere lie maḳhsūs-o-muqaddas rakho, kyūṅki maiṅ rab tumhārā ḳhudā hūṅ.

⁸merī hidāyāt māno aur un par amal karo. maiṅ rab hūṅ jo tumheṅ maḳhsūs-o-muqaddas kartā hūṅ.

⁹jis ne bhī apne bāp yā māṅ par lānat bhejī hai use sazā-e-maut dī jāe. is harkat se wuh apnī maut kā ḳhud zimmādār hai.

¹⁰agar kisī mard ne kisī kī bīwī ke sāth zinā kiyā hai to donoṅ ko sazā-e-maut denī hai.

¹¹jo mard apne bāp kī bīwī se hambistar huā hai us ne apne bāp kī behurmatī kī hai. donoṅ ko sazā-e-maut denī hai. wuh apnī maut ke ḳhud zimmādār haiṅ.

¹²agar koī mard apnī bahū se hambistar huā hai to donoṅ ko sazā-e-maut denī hai. jo kuchh unhoṅ ne kiyā hai wuh nihāyat sharmnāk hai. wuh apnī maut ke ḳhud zimmādār haiṅ.

¹³agar koī mard kisī dūsre mard se jinsī tālluqāt rakhe to donoṅ ko is ghinaunī harkat ke bāis sazā-e-maut denī hai. wuh apnī maut ke ḳhud zimmādār haiṅ.

¹⁴agar koī ādmī apnī bīwī ke ilāwā us kī māṅ se bhī shādī kare to yih ek nihāyat sharmnāk bāt hai. donoṅ ko jalā denā hai tāki tumhāre darmiyān koī aisī ḳhabīs bāt na rahe.

¹⁵jo mard kisī jānwar se jinsī tālluqāt rakhe use sazā-e-maut denā hai. us jānwar ko bhī mār diyā jāe.

¹⁶jo aurat kisī jānwar se jinsī tālluqāt rakhe use sazā-e-maut denī hai. us jānwar ko bhī mār diyā jāe. wuh apnī maut ke ḳhud zimmādār haiṅ.

¹⁷jis mard ne apnī bahan se shādī kī hai us ne sharmnāk harkat kī hai, chāhe wuh bāp kī beṭī ho yā māṅ kī. unheṅ isrāīlī qaum kī nazaroṅ se miṭāyā jāe. aise shaḳhs ne apnī bahan kī behurmatī kī hai. is lie use ḳhud apne qusūr ke natīje bardāsht karne paṛeṅge.

¹⁸agar koī mard māhwārī ke ayyām meṅ kisī aurat se hambistar huā hai to donoṅ ko un kī qaum meṅ se miṭānā hai. kyūṅki donoṅ ne aurat ke ḳhūn ke mambā se pardā uṭhāyā hai.

¹⁹apnī ḳhālā yā phūphī se hambistar na honā. kyūṅki jo aisā kartā hai wuh apnī qarībī rishtedār kī behurmatī kartā hai. donoṅ ko apne qusūr ke natīje bardāsht karne paṛeṅge.

²⁰jo apnī chachī yā tāī se hambistar huā hai us ne apne chachā yā tāyā kī behurmatī kī hai. donoṅ ko apne qusūr ke natīje bardāsht karne paṛeṅge. wuh beaulād mareṅge.

²¹jis ne apnī bhābī se shādī kī hai us ne ek najis harkat kī hai. us ne apne bhāī kī behurmatī kī hai. wuh beaulād raheṅge.

²²merī tamām hidāyāt aur ahkām ko māno aur un par amal karo. warnā jis mulk meṅ maiṅ tumheṅ le jā rahā hūṅ wuh tumheṅ ugal degā.

²³un qaumoṅ ke rasm-o-riwāj ke mutābiq zindagī na guzārnā jinheṅ maiṅ tumhāre āge se nikāl dūṅgā. mujhe is sabab se un se ghin āne lagī ki wuh yih sab kuchh karte the.

²⁴lekin tum se maiṅ ne kahā, ‘tum hī un kī zamīn par qabzā karoge. maiṅ hī use tumheṅ de dūṅgā, aisā mulk jis meṅ kasrat kā dūdh aur shahd hai.’ maiṅ rab tumhārā ḳhudā hūṅ, jis ne tum ko dīgar qaumoṅ meṅ se chun kar alag kar diyā hai.

²⁵is lie lāzim hai ki tum zamīn par chalne wāle jānwaroṅ aur parindoṅ meṅ pāk aur nāpāk kā imtiyāz karo. apne āp ko nāpāk jānwar khāne se qābil-e-ghin na banānā, chāhe wuh zamīn par chalte yā reṅgte haiṅ, chāhe hawā meṅ uṛte haiṅ. maiṅ hī ne unheṅ tumhāre lie nāpāk qarār diyā hai.

²⁶tumheṅ mere lie maḳhsūs-o-muqaddas honā hai, kyūṅki maiṅ quddūs hūṅ, aur maiṅ ne tumheṅ dīgar qaumoṅ meṅ se chun kar apne lie alag kar liyā hai.

²⁷tum meṅ se jo murdoṅ se rābitā yā ġhaibdānī kartā hai use sazā-e-maut denī hai, ḳhwāh aurat ho yā mard. unheṅ sangsār karnā. wuh apnī maut ke ḳhud zimmādār haiṅ.”