Read Roman Urdu Geo ahbār 21 Bible Online

ahbār 21 - Roman Urdu Geo bible

ahbār 21

¹rab ne mūsā se kahā, “hārūn ke beṭoṅ ko jo imām haiṅ batā denā ki imām apne āp ko kisī isrāīlī kī lāsh ke qarīb jāne se nāpāk na kare

²siwāe apne qarībī rishtedāroṅ ke yānī māṅ, bāp, beṭā, beṭī, bhāī

³aur jo ġhairshādīshudā bahan us ke ghar meṅ rahtī hai.

⁴wuh apnī qaum meṅ kisī aur ke bāis apne āp ko nāpāk na kare, warnā us kī muqaddas hālat jātī rahegī.

⁵imām apne sar ko na munḍwāeṅ. wuh na apnī dāṛhī ko tarāsheṅ aur na kāṭne se apne āp ko zaḳhmī kareṅ.

⁶wuh apne ḳhudā ke lie maḳhsūs-o-muqaddas raheṅ aur apne ḳhudā ke nām ko dāġh na lagāeṅ. chūṅki wuh rab ko jalne wālī qurbāniyāṅ yānī apne ḳhudā kī roṭī pesh karte haiṅ is lie lāzim hai ki wuh muqaddas raheṅ.

⁷imām zinākār aurat, mandir kī kasbī yā talāqyāftā aurat se shādī na kareṅ, kyūṅki wuh apne rab ke lie maḳhsūs-o-muqaddas haiṅ.

⁸imām ko muqaddas samajhnā, kyūṅki wuh tere ḳhudā kī roṭī ko qurbāngāh par chaṛhātā hai. wuh tere lie muqaddas ṭhahre kyūṅki maiṅ rab quddūs hūṅ. maiṅ hī tumheṅ muqaddas kartā hūṅ.

⁹kisī imām kī jo beṭī zinākārī se apnī muqaddas hālat ko ḳhatm kar detī hai wuh apne bāp kī muqaddas hālat ko bhī ḳhatm kar detī hai. use jalā diyā jāe.

¹⁰imām-e-āzam ke sar par masah kā tel unḍelā gayā hai aur use imām-e-āzam ke muqaddas kapṛe pahnane kā iḳhtiyār diyā gayā hai. is lie wuh ranj ke ālam meṅ apne bāloṅ ko bikharne na de, na kabhī apne kapṛoṅ ko phāṛe.

¹¹wuh kisī lāsh ke qarīb na jāe, chāhe wuh us ke bāp yā māṅ kī lāsh kyūṅ na ho, warnā wuh nāpāk ho jāegā.

¹²jab tak koī lāsh us ke ghar meṅ paṛī rahe wuh maqdis ko chhoṛ kar apne ghar na jāe, warnā wuh maqdis ko nāpāk karegā. kyūṅki use us ke ḳhudā ke tel se maḳhsūs kiyā gayā hai. maiṅ rab hūṅ.

¹³imām-e-āzam ko sirf kuṅwārī se shādī kī ijāzat hai.

¹⁴wuh bewā, talāqyāftā aurat, mandir kī kasbī yā zinākār aurat se shādī na kare balki sirf apne qabīle kī kuṅwārī se,

¹⁵warnā us kī aulād maḳhsūs-o-muqaddas nahīṅ hogī. kyūṅki maiṅ rab hūṅ jo use apne lie maḳhsūs-o-muqaddas kartā hūṅ.”

¹⁶rab ne mūsā se yih bhī kahā,

¹⁷“hārūn ko batānā ki terī aulād meṅ se koī bhī jis ke jism meṅ nuqs ho mere huzūr ā kar apne ḳhudā kī roṭī na chaṛhāe. yih usūl āne wālī nasloṅ ke lie bhī aṭal hai.

¹⁸kyūṅki koī bhī māzūr mere huzūr na āe, na andhā, na langaṛā, na wuh jis kī nāk chirī huī ho yā jis ke kisī azu meṅ kamī beshī ho,

¹⁹na wuh jis kā pāoṅ yā hāth ṭūṭā huā ho,

²⁰na kubaṛā, na baunā, na wuh jis kī āṅkh meṅ nuqs ho yā jise wabāī jildī bīmārī ho yā jis ke ḳhusye kuchle hue hoṅ.

²¹hārūn imām kī koī bhī aulād jis ke jism meṅ nuqs ho mere huzūr ā kar rab ko jalne wālī qurbāniyāṅ pesh na kare. chūṅki us meṅ nuqs hai is lie wuh mere huzūr ā kar apne ḳhudā kī roṭī na chaṛhāe.

²²use allāh kī muqaddas balki muqaddastarīn qurbāniyoṅ meṅ se bhī imāmoṅ kā hissā khāne kī ijāzat hai.

²³lekin chūṅki us meṅ nuqs hai is lie wuh muqaddastarīn kamre ke darwāze ke parde ke qarīb na jāe, na qurbāngāh ke pās āe. warnā wuh merī muqaddas chīzoṅ ko nāpāk karegā. kyūṅki maiṅ rab hūṅ jo unheṅ apne lie maḳhsūs-o-muqaddas kartā hūṅ.”

²⁴mūsā ne yih hidāyāt hārūn, us ke beṭoṅ aur tamām isrāīliyoṅ ko dīṅ.