Read Roman Urdu Geo ahbār 24 Bible Online

ahbār 24 - Roman Urdu Geo bible

ahbār 24

¹rab ne mūsā se kahā,

²“isrāīliyoṅ ko hukm de ki wuh tere pās kūṭe hue zaitūnoṅ kā ḳhālis tel le āeṅ tāki muqaddas kamre ke shamādān ke charāġh mutawātir jalte raheṅ.

³hārūn unheṅ musalsal, shām se le kar subh tak rab ke huzūr saṅbhāle yānī wahāṅ jahāṅ wuh muqaddastarīn kamre ke parde ke sāmne paṛe haiṅ, us parde ke sāmne jis ke pīchhe ahd kā sandūq hai. yih usūl abad tak qāim rahe.

⁴wuh ḳhālis sone ke shamādān par lage charāġhoṅ kī dekh-bhāl yūṅ kare ki yih hameshā rab ke sāmne jalte raheṅ.

⁵bārah roṭiyāṅ pakānā. har roṭī ke lie 3 kilogrām behtarīn maidā istemāl kiyā jāe.

⁶unheṅ do qatāroṅ meṅ rab ke sāmne ḳhālis sone kī mez par rakhnā.

⁷har qatār par ḳhālis lubān ḍālnā. yih lubān roṭī ke lie yādgārī kī qurbānī hai jise bād meṅ rab ke lie jalānā hai.

⁸har hafte ko rab ke sāmne tāzā roṭiyāṅ isī tartīb se mez par rakhnī haiṅ. yih isrāīliyoṅ ke lie abadī ahd kī lāzimī shart hai.

⁹mez kī roṭiyāṅ hārūn aur us ke beṭoṅ kā hissā haiṅ, aur wuh unheṅ muqaddas jagah par khāeṅ, kyūṅki wuh jalne wālī qurbāniyoṅ kā muqaddastarīn hissā haiṅ. yih abad tak un kā haq rahegā.”

¹⁰ḳhaimāgāh meṅ ek ādmī thā jis kā bāp misrī aur māṅ isrāīlī thī. māṅ kā nām salūmīt thā. wuh dibrī kī beṭī aur dān ke qabīle kī thī. ek din yih ādmī ḳhaimāgāh meṅ kisī isrāīlī se jhagaṛne lagā. laṛte laṛte us ne rab ke nām par kufr bak kar us par lānat bhejī. yih sun kar log use mūsā ke pās le āe.

¹²wahāṅ unhoṅ ne use pahre meṅ biṭhā kar rab kī hidāyat kā intizār kiyā.

¹³tab rab ne mūsā se kahā,

¹⁴“lānat karne wāle ko ḳhaimāgāh ke bāhar le jāo. jinhoṅ ne us kī yih bāteṅ sunī haiṅ wuh sab apne hāth us ke sar par rakheṅ. phir pūrī jamā'at use sangsār kare.

¹⁵isrāīliyoṅ se kahnā ki jo bhī apne ḳhudā par lānat bheje use apne qusūr ke natīje bardāsht karne paṛeṅge.

¹⁶jo bhī rab ke nām par kufr bake use sazā-e-maut dī jāe. pūrī jamā'at use sangsār kare. jis ne rab ke nām par kufr bakā ho use zarūr sazā-e-maut denī hai, ḳhwāh desī ho yā pardesī.

¹⁷jis ne kisī ko mār ḍālā hai use sazā-e-maut dī jāe.

¹⁸jis ne kisī ke jānwar ko mār ḍālā hai wuh us kā muāwazā de. jān ke badle jān dī jāe.

¹⁹agar kisī ne kisī ko zaḳhmī kar diyā hai to wuhī kuchh us ke sāth kiyā jāe jo us ne dūsre ke sāth kiyā hai.

²⁰agar dūsre kī koī haḍḍī ṭūṭ jāe to us kī wuhī haḍḍī toṛī jāe. agar dūsre kī āṅkh zāe ho jāe to us kī āṅkh zāe kar dī jāe. agar dūsre kā dāṅt ṭūṭ jāe to us kā wuhī dāṅt toṛā jāe. jo bhī zaḳhm us ne dūsre ko pahuṅchāyā wuhī zaḳhm use pahuṅchāyā jāe.

²¹jis ne kisī jānwar ko mār ḍālā hai wuh us kā muāwazā de, lekin jis ne kisī insān ko mār diyā hai use sazā-e-maut denī hai.

²²desī aur pardesī ke lie tumhārā ek hī qānūn ho. maiṅ rab tumhārā ḳhudā hūṅ.”

²³phir mūsā ne isrāīliyoṅ se bāt kī, aur unhoṅ ne rab par lānat bhejne wāle ko ḳhaimāgāh se bāhar le jā kar use sangsār kiyā. unhoṅ ne waisā hī kiyā jaisā rab ne mūsā ko hukm diyā thā.