Read Roman Urdu Geo ahbār 5 Bible Online

ahbār 5 - Roman Urdu Geo bible

ahbār 5

¹ho saktā hai ki kisī ne yūṅ gunāh kiyā ki us ne koī jurm dekhā yā wuh us ke bāre meṅ kuchh jāntā hai. to bhī jab gawāhoṅ ko qasam ke lie bulāyā jātā hai to wuh gawāhī dene ke lie sāmne nahīṅ ātā. is sūrat meṅ wuh qusūrwār ṭhahartā hai.

²ho saktā hai ki kisī ne ġhairirādī taur par kisī nāpāk chīz ko chhū liyā hai, ḳhwāh wuh kisī janglī jānwar, maweshī yā reṅgne wāle jānwar kī lāsh kyūṅ na ho. is sūrat meṅ wuh nāpāk hai aur qusūrwār ṭhahartā hai.

³ho saktā hai ki kisī ne ġhairirādī taur par kisī shaḳhs kī nāpākī ko chhū liyā hai yānī us kī koī aisī chīz jis se wuh nāpāk ho gayā hai. jab use mālūm ho jātā hai to wuh qusūrwār ṭhahartā hai.

⁴ho saktā hai ki kisī ne beparwāī se kuchh karne kī qasam khāī hai, chāhe wuh achchhā kām thā yā ġhalat. jab wuh jān letā hai ki us ne kyā kiyā hai to wuh qusūrwār ṭhahartā hai.

⁵jo is tarah ke kisī gunāh kī binā par qusūrwār ho, lāzim hai ki wuh apnā gunāh taslīm kare.

⁶phir wuh gunāh kī qurbānī ke taur par ek bheṛ yā bakrī pesh kare. yūṅ imām us kā kaffārā degā.

⁷agar qusūrwār shaḳhs ġhurbat ke bāis bheṛ yā bakrī na de sake to wuh rab ko do qumriyāṅ yā do jawān kabūtar pesh kare, ek gunāh kī qurbānī ke lie aur ek bhasm hone wālī qurbānī ke lie.

⁸wuh unheṅ imām ke pās le āe. imām pahle gunāh kī qurbānī ke lie parindā pesh kare. wuh us kī gardan maroṛ ḍāle lekin aise ki sar judā na ho jāe.

⁹phir wuh us ke ḳhūn meṅ se kuchh qurbāngāh ke ek pahlū par chhiṛke. bāqī ḳhūn wuh yūṅ nikalne de ki wuh qurbāngāh ke pāe par ṭapke. yih gunāh kī qurbānī hai.

¹⁰phir imām dūsre parinde ko qawāid ke mutābiq bhasm hone wālī qurbānī ke taur par pesh kare. yūṅ imām us ādmī kā kaffārā degā aur use muāfī mil jāegī.

¹¹agar wuh shaḳhs ġhurbat ke bāis do qumriyāṅ yā do jawān kabūtar bhī na de sake to phir wuh gunāh kī qurbānī ke lie ḍeṛh kilogrām behtarīn maidā pesh kare. wuh us par na tel unḍele, na lubān rakhe, kyūṅki yih ġhallā kī nazar nahīṅ balki gunāh kī qurbānī hai.

¹²wuh use imām ke pās le āe jo yādgār kā hissā yānī muṭṭhī bhar un qurbāniyoṅ ke sāth jalā de jo rab ke lie jalāī jātī haiṅ. yih gunāh kī qurbānī hai.

¹³yūṅ imām us ādmī kā kaffārā degā aur use muāfī mil jāegī. ġhallā kī nazar kī tarah bāqī maidā imām kā hissā hai.”

¹⁴rab ne mūsā se kahā,

¹⁵“agar kisī ne be'īmānī karke ġhairirādī taur par rab kī maḳhsūs aur muqaddas chīzoṅ ke silsile meṅ gunāh kiyā ho, aisā shaḳhs qusūr kī qurbānī ke taur par rab ko beaib aur qīmat ke lihāz se munāsib menḍhā yā bakrā pesh kare. us kī qīmat maqdis kī sharh ke mutābiq muqarrar kī jāe.

¹⁶jitnā nuqsān maqdis ko huā hai utnā hī wuh de. is ke ilāwā wuh mazīd 20 fīsad adā kare. wuh use imām ko de de aur imām jānwar ko qusūr kī qurbānī ke taur par pesh karke us kā kaffārā de. yūṅ use muāfī mil jāegī.

¹⁷agar koī ġhairirādī taur par gunāh karke rab ke kisī hukm se tajāwuz kare to wuh qusūrwār hai, aur wuh us kā zimmādār ṭhahregā.

¹⁸wuh qusūr kī qurbānī ke taur par imām ke pās ek beaib aur qīmat ke lihāz se munāsib menḍhā le āe. us kī qīmat maqdis kī sharh ke mutābiq muqarrar kī jāe. phir imām yih qurbānī us gunāh ke lie chaṛhāe jo qusūrwār shaḳhs ne ġhairirādī taur par kiyā hai. yūṅ use muāfī mil jāegī.

¹⁹yih qusūr kī qurbānī hai, kyūṅki wuh rab kā gunāh karke qusūrwār ṭhahrā hai.”