Read Roman Urdu Geo ahbār 6 Bible Online

ahbār 6 - Roman Urdu Geo bible

ahbār 6

¹rab ne mūsā se kahā,

²“ho saktā hai kisī ne gunāh karke be'īmānī kī hai, masalan us ne apne paṛosī kī koī chīz wāpas nahīṅ kī jo us ke sapurd kī gaī thī yā jo use girwī ke taur par milī thī, yā us ne us kī koī chīz chorī kī, yā us ne kisī se koī chīz chhīn lī,

³yā us ne kisī kī gumshudā chīz ke bāre meṅ jhūṭ bolā jab use mil gaī, yā us ne qasam khā kar jhūṭ bolā hai, yā is tarah kā koī aur gunāh kiyā hai.

⁴agar wuh is tarah kā gunāh karke qusūrwār ṭhahre to lāzim hai ki wuh wuhī chīz wāpas kare jo us ne chorī kī yā chhīn lī yā jo us ke sapurd kī gaī yā jo gumshudā ho kar us ke pās ā gaī hai

⁵yā jis ke bāre meṅ us ne qasam khā kar jhūṭ bolā hai. wuh us kā utnā hī wāpas karke 20 fīsad zyādā de. aur wuh yih sab kuchh us din wāpas kare jab wuh apnī qusūr kī qurbānī pesh kartā hai.

⁶qusūr kī qurbānī ke taur par wuh ek beaib aur qīmat ke lihāz se munāsib menḍhā imām ke pās le āe aur rab ko pesh kare. us kī qīmat maqdis kī sharh ke mutābiq muqarrar kī jāe.

⁷phir imām rab ke sāmne us kā kaffārā degā to use muāfī mil jāegī.”

⁸rab ne mūsā se kahā,

⁹“hārūn aur us ke beṭoṅ ko bhasm hone wālī qurbāniyoṅ ke bāre meṅ zail kī hidāyāt denā: bhasm hone wālī qurbānī pūrī rāt subh tak qurbāngāh kī us jagah par rahe jahāṅ āg jaltī hai. āg ko bujhne na denā.

¹⁰subh ko imām katān kā libās aur katān kā pājāmā pahan kar qurbānī se bachī huī rākh qurbāngāh ke pās zamīn par ḍāle.

¹¹phir wuh apne kapṛe badal kar rākh ko ḳhaimāgāh ke bāhar kisī pāk jagah par chhoṛ āe.

¹²qurbāngāh par āg jaltī rahe. wuh kabhī bhī na bujhe. har subh imām lakaṛiyāṅ chun kar us par bhasm hone wālī qurbānī tartīb se rakhe aur us par salāmatī kī qurbānī kī charbī jalā de.

¹³āg hameshā jaltī rahe. wuh kabhī na bujhne pāe.

¹⁴ġhallā kī nazar ke bāre meṅ hidāyāt yih haiṅ: hārūn ke beṭe use qurbāngāh ke sāmne rab ko pesh kareṅ.

¹⁵phir imām yādgār kā hissā yānī tel se milāyā gayā muṭṭhī bhar behtarīn maidā aur qurbānī kā tamām lubān le kar qurbāngāh par jalā de. is kī ḳhushbū rab ko pasand hai.

¹⁶hārūn aur us ke beṭe qurbānī kā bāqī hissā khā leṅ. lekin wuh use muqaddas jagah par yānī mulāqāt ke ḳhaime kī chārdīwārī ke andar khāeṅ, aur us meṅ ḳhamīr na ho.

¹⁷use pakāne ke lie us meṅ ḳhamīr na ḍālā jāe. maiṅ ne jalne wālī qurbāniyoṅ meṅ se yih hissā un ke lie muqarrar kiyā hai. yih gunāh kī qurbānī aur qusūr kī qurbānī kī tarah nihāyat muqaddas hai.

¹⁸hārūn kī aulād ke tamām mard use khāeṅ. yih usūl abad tak qāim rahe. jo bhī use chhuegā wuh maḳhsūs-o-muqaddas ho jāegā.”

¹⁹rab ne mūsā se kahā,

²⁰“jab hārūn aur us ke beṭoṅ ko imām kī zimmādārī uṭhāne ke lie maḳhsūs karke tel se masah kiyā jāegā to wuh ḍeṛh kilogrām behtarīn maidā pesh kareṅ. us kā ādhā hissā subh ko aur ādhā hissā shām ke waqt pesh kiyā jāe. wuh ġhallā kī yih nazar rozānā pesh kareṅ.

²¹use tel ke sāth milā kar tawe par pakānā hai. phir use ṭukṛe ṭukṛe karke ġhallā kī nazar ke taur par pesh karnā. us kī ḳhushbū rab ko pasand hai.

²²yih qurbānī hameshā hārūn kī nasl kā wuh ādmī pesh kare jise masah karke imām-e-āzam kā uhdā diyā gayā hai, aur wuh use pūre taur par rab ke lie jalā de.

²³imām kī ġhallā kī nazar hameshā pūre taur par jalānā. use na khānā.”

²⁴rab ne mūsā se kahā,

²⁵“hārūn aur us ke beṭoṅ ko gunāh kī qurbānī ke bāre meṅ zail kī hidāyāt denā: gunāh kī qurbānī ko rab ke sāmne wahīṅ zabah karnā hai jahāṅ bhasm hone wālī qurbānī zabah kī jātī hai. wuh nihāyat muqaddas hai.

²⁶use pesh karne wālā imām use muqaddas jagah par yānī mulāqāt ke ḳhaime kī chārdīwārī ke andar khāe.

²⁷jo bhī is qurbānī ke gosht ko chhū letā hai wuh maḳhsūs-o-muqaddas ho jātā hai. agar qurbānī ke ḳhūn ke chhīṅṭe kisī libās par paṛ jāeṅ to use muqaddas jagah par dhonā hai.

²⁸agar gosht ko hanḍiyā meṅ pakāyā gayā ho to us bartan ko bād meṅ toṛ denā hai. agar us ke lie pītal kā bartan istemāl kiyā gayā ho to use ḳhūb māṅjh kar pānī se sāf karnā.

²⁹imāmoṅ ke ḳhāndānoṅ meṅ se tamām mard use khā sakte haiṅ. yih khānā nihāyat muqaddas hai.

³⁰lekin gunāh kī har wuh qurbānī khāī na jāe jis kā ḳhūn mulāqāt ke ḳhaime meṅ is lie lāyā gayā hai ki maqdis meṅ kisī kā kaffārā diyā jāe. use jalānā hai.