Read Roman Urdu Geo ahbār 7 Bible Online

ahbār 7 - Roman Urdu Geo bible

ahbār 7

¹qusūr kī qurbānī jo nihāyat muqaddas hai us ke bāre meṅ hidāyāt yih haiṅ:

²qusūr kī qurbānī wahīṅ zabah karnī hai jahāṅ bhasm hone wālī qurbānī zabah kī jātī hai. us kā ḳhūn qurbāngāh ke chār pahlū'oṅ par chhiṛkā jāe.

³us kī tamām charbī nikāl kar qurbāngāh par chaṛhānī hai yānī us kī dum, antaṛiyoṅ par kī charbī,

⁴gurde us charbī samet jo un par aur kamr ke qarīb hotī hai aur joṛkalejī. in chīzoṅ ko gurdoṅ ke sāth hī alag karnā hai.

⁵imām yih sab kuchh rab ko qurbāngāh par jalne wālī qurbānī ke taur par pesh kare. yih qusūr kī qurbānī hai.

⁶imāmoṅ ke ḳhāndānoṅ meṅ se tamām mard use khā sakte haiṅ. lekin use muqaddas jagah par khāyā jāe. yih nihāyat muqaddas hai.

⁷gunāh aur qusūr kī qurbānī ke lie ek hī usūl hai, jo imām qurbānī ko pesh karke kaffārā detā hai us ko us kā gosht miltā hai.

⁸is tarah jo imām kisī jānwar ko bhasm hone wālī qurbānī ke taur par chaṛhātā hai usī ko jānwar kī khāl miltī hai.

⁹aur isī tarah tanūr meṅ, kaṛāhī meṅ yā tawe par pakāī gaī ġhallā kī har nazar us imām ko miltī hai jis ne use pesh kiyā hai.

¹⁰lekin hārūn ke tamām beṭoṅ ko ġhallā kī bāqī nazareṅ barābar barābar miltī raheṅ, ḳhwāh un meṅ tel milāyā gayā ho yā wuh ḳhushk hoṅ.

¹¹salāmatī kī qurbānī jo rab ko pesh kī jātī hai us ke bāre meṅ zail kī hidāyāt haiṅ:

¹²agar koī is qurbānī se apnī shukrguzārī kā izhār karnā chāhe to wuh jānwar ke sāth beḳhamīrī roṭī jis meṅ tel ḍālā gayā ho, beḳhamīrī roṭī jis par tel lagāyā gayā ho aur roṭī jis meṅ behtarīn maidā aur tel milāyā gayā ho pesh kare.

¹³is ke ilāwā wuh ḳhamīrī roṭī bhī pesh kare.

¹⁴pesh karne wālā qurbānī kī har chīz kā ek hissā uṭhā kar rab ke lie maḳhsūs kare. yih us imām kā hissā hai jo jānwar kā ḳhūn qurbāngāh par chhiṛaktā hai.

¹⁵gosht usī din khāyā jāe jab jānwar ko zabah kiyā gayā ho. aglī subh tak kuchh nahīṅ bachnā chāhie.

¹⁶is qurbānī kā gosht sirf is sūrat meṅ agle din khāyā jā saktā hai jab kisī ne mannat mān kar yā apnī ḳhushī se use pesh kiyā hai.

¹⁷agar kuchh gosht tīsre din tak bach jāe to use jalānā hai.

¹⁸agar use tīsre din bhī khāyā jāe to rab yih qurbānī qabūl nahīṅ karegā. us kā koī fāidā nahīṅ hogā balki use nāpāk qarār diyā jāegā. jo bhī us se khāegā wuh qusūrwār ṭhahregā.

¹⁹agar yih gosht kisī nāpāk chīz se lag jāe to use nahīṅ khānā hai balki use jalāyā jāe. agar gosht pāk hai to har shaḳhs jo ḳhud pāk hai use khā saktā hai.

²⁰lekin agar nāpāk shaḳhs rab ko pesh kī gaī salāmatī kī qurbānī kā yih gosht khāe to use us kī qaum meṅ se miṭā ḍālnā hai.

²¹ho saktā hai ki kisī ne kisī nāpāk chīz ko chhū liyā hai chāhe wuh nāpāk shaḳhs, jānwar yā koī aur ghinaunī aur nāpāk chīz ho. agar aisā shaḳhs rab ko pesh kī gaī salāmatī kī qurbānī kā gosht khāe to use us kī qaum meṅ se miṭā ḍālnā hai.”

²²rab ne mūsā se kahā,

²³“isrāīliyoṅ ko batā denā ki gāy-bail aur bheṛ-bakriyoṅ kī charbī khānā tumhāre lie manā hai.

²⁴tum fitrī taur par mare hue jānwaroṅ aur phāṛe hue jānwaroṅ kī charbī dīgar kāmoṅ ke lie istemāl kar sakte ho, lekin use khānā manā hai.

²⁵jo bhī us charbī meṅ se khāe jo jalā kar rab ko pesh kī jātī hai use us kī qaum meṅ se miṭā ḍālnā hai.

²⁶jahāṅ bhī tum rahte ho wahāṅ parindoṅ yā dīgar jānwaroṅ kā ḳhūn khānā manā hai.

²⁷jo bhī ḳhūn khāe use us kī qaum meṅ se miṭāyā jāe.”

²⁸rab ne mūsā se kahā,

²⁹“isrāīliyoṅ ko batānā ki jo rab ko salāmatī kī qurbānī pesh kare wuh rab ke lie ek hissā maḳhsūs kare.

³⁰wuh jalne wālī yih qurbānī apne hāthoṅ se rab ko pesh kare. is ke lie wuh jānwar kī charbī aur sīnā rab ke sāmne pesh kare. sīnā hilāne wālī qurbānī ho.

³¹imām charbī ko qurbāngāh par jalā de jabki sīnā hārūn aur us ke beṭoṅ kā hissā hai.

³²qurbānī kī dahnī rān imām ko uṭhāne wālī qurbānī ke taur par dī jāe.

³³wuh us imām kā hissā hai jo salāmatī kī qurbānī kā ḳhūn aur charbī chaṛhātā hai.

³⁴isrāīliyoṅ kī salāmatī kī qurbāniyoṅ meṅ se maiṅ ne hilāne wālā sīnā aur uṭhāne wālī rān imāmoṅ ko dī hai. yih chīzeṅ hameshā ke lie isrāīliyoṅ kī taraf se imāmoṅ kā haq haiṅ.”

³⁵yih us din jalne wālī qurbāniyoṅ meṅ se hārūn aur us ke beṭoṅ kā hissā ban gaīṅ jab unheṅ maqdis meṅ rab kī ḳhidmat meṅ pesh kiyā gayā.

³⁶rab ne us din jab unheṅ tel se masah kiyā gayā hukm diyā thā ki isrāīlī yih hissā hameshā imāmoṅ ko diyā kareṅ.

³⁷ġharz yih hidāyāt tamām qurbāniyoṅ ke bāre meṅ haiṅ yānī bhasm hone wālī qurbānī, ġhallā kī nazar, gunāh kī qurbānī, qusūr kī qurbānī, imām ko maqdis meṅ ḳhidmat ke lie maḳhsūs karne kī qurbānī aur salāmatī kī qurbānī ke bāre meṅ.

³⁸rab ne mūsā ko yih hidāyāt sīnā pahāṛ par dīṅ, us din jab us ne isrāīliyoṅ ko hukm diyā ki wuh dasht-e-sīnā meṅ rab ko apnī qurbāniyāṅ pesh kareṅ.