Read Roman Urdu Geo ahbār 8 Bible Online

ahbār 8 - Roman Urdu Geo bible

ahbār 8

¹rab ne mūsā se kahā,

²“hārūn aur us ke beṭoṅ ko mere huzūr le ānā. nīz imāmoṅ ke libās, masah kā tel, gunāh kī qurbānī ke lie jawān bail, do menḍhe aur beḳhamīrī roṭiyoṅ kī ṭokrī le ānā.

³phir pūrī jamā'at ko ḳhaime ke darwāze par jamā karnā.”

⁴mūsā ne aisā hī kiyā. jab pūrī jamā'at ikaṭṭhī ho gaī to

⁵us ne un se kahā, “ab maiṅ wuh kuchh kartā hūṅ jis kā hukm rab ne diyā hai.”

⁶mūsā ne hārūn aur us ke beṭoṅ ko sāmne lā kar ġhusl karāyā.

⁷us ne hārūn ko katān kā zerjāmā pahnā kar kamarband lapeṭā. phir us ne choġhā pahnāyā jis par us ne bālāposh ko mahārat se bune hue paṭke se bāndhā.

⁸is ke bād us ne sīne kā kīsā lagā kar us meṅ donoṅ qur'e banām ūrīm aur tummīm rakhe.

⁹phir us ne hārūn ke sar par pagaṛī rakhī jis ke sāmne wāle hisse par us ne muqaddas tāj yānī sone kī taḳhtī lagā dī. sab kuchh us hukm ke ain mutābiq huā jo rab ne mūsā ko diyā thā.

¹⁰is ke bād mūsā ne masah ke tel se maqdis ko aur jo kuchh us meṅ thā masah karke use maḳhsūs-o-muqaddas kiyā.

¹¹us ne yih tel sāt bār jānwar chaṛhāne kī qurbāngāh aur us ke sāmān par chhiṛak diyā. isī tarah us ne sāt bār dhone ke hauz aur us ḍhāṅche par tel chhiṛak diyā jis par hauz rakhā huā thā. yūṅ yih chīzeṅ maḳhsūs-o-muqaddas huīṅ.

¹²us ne hārūn ke sar par masah kā tel unḍel kar use masah kiyā. yūṅ wuh maḳhsūs-o-muqaddas huā.

¹³phir mūsā ne hārūn ke beṭoṅ ko sāmne lā kar unheṅ zerjāme pahnāe, kamarband lapeṭe aur un ke saroṅ par pagaṛiyāṅ bāndhīṅ. sab kuchh us hukm ke ain mutābiq huā jo rab ne mūsā ko diyā thā.

¹⁴ab mūsā ne gunāh kī qurbānī ke lie jawān bail ko pesh kiyā. hārūn aur us ke beṭoṅ ne apne hāth us ke sar par rakhe.

¹⁵mūsā ne use zabah karke us ke ḳhūn meṅ se kuchh le kar apnī unglī se qurbāngāh ke sīṅgoṅ par lagā diyā tāki wuh gunāhoṅ se pāk ho jāe. bāqī ḳhūn us ne qurbāngāh ke pāe par unḍel diyā. yūṅ us ne use maḳhsūs-o-muqaddas karke us kā kaffārā diyā.

¹⁶mūsā ne antaṛiyoṅ par kī tamām charbī, joṛkalejī aur donoṅ gurde un kī charbī samet le kar qurbāngāh par jalā die.

¹⁷lekin bail kī khāl, gosht aur antaṛiyoṅ ke gobar ko us ne ḳhaimāgāh ke bāhar le jā kar jalā diyā. sab kuchh us hukm ke mutābiq huā jo rab ne mūsā ko diyā thā.

¹⁸is ke bād us ne bhasm hone wālī qurbānī ke lie pahlā menḍhā pesh kiyā. hārūn aur us ke beṭoṅ ne apne hāth us ke sar par rakh die.

¹⁹mūsā ne use zabah karke us kā ḳhūn qurbāngāh ke chār pahlū'oṅ par chhiṛak diyā.

²⁰us ne menḍhe ko ṭukṛe ṭukṛe karke sar, ṭukṛe aur charbī jalā dī.

²¹us ne antaṛiyāṅ aur pinḍliyāṅ pānī se sāf karke pūre menḍhe ko qurbāngāh par jalā diyā. sab kuchh us hukm ke ain mutābiq huā jo rab ne mūsā ko diyā thā. rab ke lie jalne wālī yih qurbānī bhasm hone wālī qurbānī thī, aur us kī ḳhushbū rab ko pasand thī.

²²is ke bād mūsā ne dūsre menḍhe ko pesh kiyā. is qurbānī kā maqsad imāmoṅ ko maqdis meṅ ḳhidmat ke lie maḳhsūs karnā thā. hārūn aur us ke beṭoṅ ne apne hāth menḍhe ke sar par rakh die.

²³mūsā ne use zabah karke us ke ḳhūn meṅ se kuchh le kar hārūn ke dahne kān kī lau par aur us ke dahne hāth aur dahne pāoṅ ke angūṭhoṅ par lagāyā.

²⁴yihī us ne hārūn ke beṭoṅ ke sāth bhī kiyā. us ne unheṅ sāmne lā kar un ke dahne kān kī lau par aur un ke dahne hāth aur dahne pāoṅ ke angūṭhoṅ par ḳhūn lagāyā. bāqī ḳhūn us ne qurbāngāh ke chār pahlū'oṅ par chhiṛak diyā.

²⁵us ne menḍhe kī charbī, dum, antaṛiyoṅ par kī sārī charbī, joṛkalejī, donoṅ gurde un kī charbī samet aur dahnī rān alag kī.

²⁶phir wuh rab ke sāmne paṛī beḳhamīrī roṭiyoṅ kī ṭokrī meṅ se ek sādā roṭī, ek roṭī jis meṅ tel ḍālā gayā thā aur ek roṭī jis par tel lagāyā gayā thā le kar charbī aur rān par rakh dī.

²⁷us ne yih sab kuchh hārūn aur us ke beṭoṅ ke hāthoṅ par rakh kar use hilāne wālī qurbānī ke taur par rab ko pesh kiyā.

²⁸phir us ne yih chīzeṅ un se wāpas le kar qurbāngāh par jalā dīṅ jis par pahle bhasm hone wālī qurbānī rakhī gaī thī. rab ke lie jalne wālī yih qurbānī imāmoṅ ko maḳhsūs karne ke lie chaṛhāī gaī, aur us kī ḳhushbū rab ko pasand thī.

²⁹mūsā ne sīnā bhī liyā aur use hilāne wālī qurbānī ke taur par rab ke sāmne hilāyā. yih maḳhsūsiyat ke menḍhe meṅ se mūsā kā hissā thā. mūsā ne is meṅ bhī sab kuchh rab ke hukm ke ain mutābiq kiyā.

³⁰phir us ne masah ke tel aur qurbāngāh par ke ḳhūn meṅ se kuchh le kar hārūn, us ke beṭoṅ aur un ke kapṛoṅ par chhiṛak diyā. yūṅ us ne unheṅ aur un ke kapṛoṅ ko maḳhsūs-o-muqaddas kiyā.

³¹mūsā ne un se kahā, “gosht ko mulāqāt ke ḳhaime ke darwāze par ubāl kar use un roṭiyoṅ ke sāth khānā jo maḳhsūsiyat kī qurbāniyoṅ kī ṭokrī meṅ paṛī haiṅ. kyūṅki rab ne mujhe yihī hukm diyā hai.

³²gosht aur roṭiyoṅ kā baqāyā jalā denā.

³³sāt din tak mulāqāt ke ḳhaime ke darwāze meṅ se na nikalnā, kyūṅki maqdis meṅ ḳhidmat ke lie tumhārī maḳhsūsiyat ke itne hī din haiṅ.

³⁴jo kuchh āj huā hai wuh rab ke hukm ke mutābiq huā tāki tumhārā kaffārā diyā jāe.

³⁵tumheṅ sāt rāt aur din tak ḳhaime ke darwāze ke andar rahnā hai. rab kī is hidāyat ko māno warnā tum mar jāoge, kyūṅki yih hukm mujhe rab kī taraf se diyā gayā hai.”

³⁶hārūn aur us ke beṭoṅ ne un tamām hidāyāt par amal kiyā jo rab ne mūsā kī mārifat unheṅ dī thīṅ.