Read Roman Urdu Geo yarmiyāh 1 Bible Online

yarmiyāh 1 - Roman Urdu Geo bible

yarmiyāh 1

¹zail meṅ yarmiyāh bin ḳhilqiyāh ke paiġhāmāt qalamband kie gae haiṅ. (binyamīn ke qabāilī ilāqe ke shahr anatot meṅ kuchh imām rahte the, aur yarmiyāh kā wālid un meṅ se thā).

²rab kā farmān pahlī bār yahūdāh ke bādshāh yūsiyāh bin amūn kī hukūmat ke 13weṅ sāl meṅ yarmiyāh par nāzil huā,

³aur yarmiyāh ko yih paiġhāmāt yahūyaqīm bin yūsiyāh ke daur-e-hukūmat se le kar sidqiyāh bin yūsiyāh kī hukūmat ke 11weṅ sāl ke pāṅchweṅ mahīne [1] tak milte rahe. us waqt yarūshalam ke bāshindoṅ ko jilāwatan kar diyā gayā.

⁴ek din rab kā kalām mujh par nāzil huā,

⁵“maiṅ tujhe māṅ ke peṭ meṅ tashkīl dene se pahle hī jāntā thā, terī paidāish se pahle hī maiṅ ne tujhe maḳhsūs-o-muqaddas karke aqwām ke lie nabī muqarrar kiyā.”

⁶maiṅ ne etirāz kiyā, “ai rab qādir-e-mutlaq, afsos! maiṅ terā kalām sunāne kā sahīh ilm nahīṅ rakhtā, maiṅ to bachchā hī hūṅ.”

⁷lekin rab ne mujh se farmāyā, “mat kah ‘maiṅ bachchā hī hūṅ.’ kyūṅki jin ke pās bhī maiṅ tujhe bhejūṅgā un ke pās tū jāegā, aur jo kuchh bhī maiṅ tujhe sunāne ko kahūṅgā use tū sunāegā.

⁸logoṅ se mat ḍarnā, kyūṅki maiṅ tere sāth hūṅ, maiṅ tujhe bachāe rakhūṅgā.” yih rab kā farmān hai.

⁹phir rab ne apnā hāth baṛhā kar mere hoṅṭoṅ ko chhū diyā aur farmāyā, “dekh, maiṅ ne apne alfāz ko tere muṅh meṅ ḍāl diyā hai.

¹⁰āj maiṅ tujhe qaumoṅ aur saltanatoṅ par muqarrar kar detā hūṅ. kahīṅ tujhe unheṅ jaṛ se ukhāṛ kar girā denā, kahīṅ barbād karke ḍhā denā aur kahīṅ tāmīr karke paude kī tarah lagā denā hai.”

¹¹rab kā kalām mujh par nāzil huā, “ai yarmiyāh, tujhe kyā nazar ā rahā hai?” maiṅ ne jawāb diyā, “bādām kī ek shāḳh, us daraḳht kī jo ‘deḳhne wālā’ kahlātā hai.”

¹²rab ne farmāyā, “tū ne sahīh dekhā hai. is kā matlab hai ki maiṅ apne kalām kī dekh-bhāl kar rahā hūṅ, maiṅ dhyān de rahā hūṅ ki wuh pūrā ho jāe.”

¹³phir rab kā kalām dubārā mujh par nāzil huā, “tujhe kyā nazar ā rahā hai?” maiṅ ne jawāb diyā, “shimāl meṅ deg dikhāī de rahī hai. jo kuchh us meṅ hai wuh ubal rahā hai, aur us kā muṅh hamārī taraf jhukā huā hai.”

¹⁴tab rab ne mujh se kahā, “isī tarah shimāl se mulk ke tamām bāshindoṅ par āfat ṭūṭ paṛegī.”

¹⁵kyūṅki rab farmātā hai, “maiṅ shimālī mamālik ke tamām gharānoṅ ko bulā lūṅgā, aur har ek ā kar apnā taḳht yarūshalam ke darwāzoṅ ke sāmne hī khaṛā karegā. hāṅ, wuh us kī pūrī fasīl ko gher kar us par balki yahūdāh ke tamām shahroṅ par chhāpā māreṅge.

¹⁶yūṅ maiṅ apnī qaum par faisle sādir karke un ke ġhalat kāmoṅ kī sazā dūṅgā. kyūṅki unhoṅ ne mujhe tark karke ajnabī mābūdoṅ ke lie baḳhūr jalāyā aur apne hāthoṅ se bane hue butoṅ ko sijdā kiyā hai.

¹⁷chunāṅche kamarbastā ho jā! uṭh kar unheṅ sab kuchh sunā de jo maiṅ farmāūṅgā. un se dahshat mat khānā, warnā maiṅ tujhe un ke sāmne hī dahshatzadā kar dūṅgā.

¹⁸dekh, āj maiṅ ne tujhe qilāband shahr, lohe ke satūn aur pītal kī chārdīwārī jaisā mazbūt banā diyā hai tāki tū pūre mulk kā sāmnā kar sake, ḳhwāh yahūdāh ke bādshāh, afsar, imām yā awām tujh par hamlā kyūṅ na kareṅ.

¹⁹tujh se laṛne ke bāwujūd wuh tujh par ġhālib nahīṅ āeṅge, kyūṅki maiṅ tere sāth hūṅ, maiṅ hī tujhe bachāe rakhūṅgā.” yih rab kā farmān hai.