Read Roman Urdu Geo yarmiyāh 10 Bible Online

yarmiyāh 10 - Roman Urdu Geo bible

yarmiyāh 10

¹ai isrāīl ke gharāne, rab kā paiġhām sun!

²rab farmātā hai, “dīgar aqwām kī butparastī mat apnānā. yih log ilm-e-nujūm se mustaqbil jān lene kī koshish karte karte pareshān ho jāte haiṅ, lekin tum un kī bātoṅ se pareshān na ho jāo.

³kyūṅki dīgar qaumoṅ ke rasm-o-riwāj fuzūl hī haiṅ. jangal meṅ daraḳht kaṭ jātā hai, phir kārīgar use apne auzār se tashkīl detā hai.

⁴log use apnī sonā-chāṅdī se sajā kar kīloṅ se kahīṅ lagā dete haiṅ tāki hile na.

⁵but un putloṅ kī mānind haiṅ jo khīre ke khet meṅ khaṛe kie jāte haiṅ tāki parindoṅ ko bhagā deṅ. na wuh bol sakte, na chal sakte haiṅ, is lie log unheṅ uṭhā kar apne sāth le jāte haiṅ. un se mat ḍarnā, kyūṅki na wuh nuqsān kā bāis haiṅ, na bhalāī kā.”

⁶ai rab, tujh jaisā koī nahīṅ hai, tū azīm hai, tere nām kī azmat zordār tarīqe se zāhir huī hai.

⁷ai aqwām ke bādshāh, kaun terā ḳhauf nahīṅ mānegā? kyūṅki tū is lāiq hai. aqwām ke tamām dānishmandoṅ aur un ke tamām mamālik meṅ tujh jaisā koī nahīṅ hai.

⁸sab ahmaq aur bewuqūf sābit hue haiṅ, kyūṅki un kī tarbiyat lakaṛī ke bekār butoṅ se hāsil huī hai.

⁹tarsīs se chāṅdī kī chādareṅ aur ūfāz se sonā lāyā jātā hai. un se kārīgar aur sunār but banā dete haiṅ jise qirmizī aur arġhawānī rang ke kapṛe pahnāe jāte haiṅ. sab kuchh māhir ustādoṅ ke hāth se banāyā jātā hai.

¹⁰lekin rab hī haqīqī ḳhudā hai. wuhī zindā ḳhudā aur abadī bādshāh hai. jab wuh nārāz ho jātā hai to zamīn larazne lagtī hai. aqwām us kā qahr bardāsht nahīṅ kar saktīṅ.

¹¹butparastoṅ ko batāo ki dewatāoṅ ne na āsmān ko banāyā aur na zamīn ko, un kā nām-o-nishān to āsmān-o-zamīn se miṭ jāegā.

¹²dekho, allāh hī ne apnī qudrat se zamīn ko ḳhalaq kiyā, usī ne apnī hikmat se duniyā kī bunyād rakhī, aur usī ne apnī samajh ke mutābiq āsmān ko ḳhaime kī tarah tān liyā.

¹³us ke hukm par āsmān par pānī ke zaḳhīre garajne lagte haiṅ. wuh duniyā kī intihā se bādal chaṛhnī detā, bārish ke sāth bijlī kaṛakne detā aur apne godāmoṅ se hawā nikalne detā hai.

¹⁴tamām insān ahmaq aur samajh se ḳhālī haiṅ. har sunār apne butoṅ ke bāis sharmindā huā hai. us ke but dhokā hī haiṅ, un meṅ dam nahīṅ.

¹⁵wuh fuzūl aur mazhakāḳhez haiṅ. adālat ke waqt wuh nest ho jāeṅge.

¹⁶allāh jo yāqūb kā maurūsī hissā hai in kī mānind nahīṅ hai. wuh sab kā ḳhāliq hai, aur isrāīlī qaum us kā maurūsī hissā hai. rabb-ul-afwāj hī us kā nām hai.

¹⁷ai muhāsarāshudā shahr, apnā sāmān sameṭ kar mulk se nikalne kī tayyāriyāṅ kar le.

¹⁸kyūṅki rab farmātā hai, “is bār maiṅ mulk ke bāshindoṅ ko bāhar phaiṅk dūṅgā. maiṅ unheṅ tang karūṅga tāki unheṅ pakaṛā jāe.”

¹⁹hāy, merā beṛā ġharq ho gayā hai! hāy, merā zaḳhm bhar nahīṅ saktā. pahle maiṅ ne sochā ki yih aisī bīmārī hai jise mujhe bardāsht hī karnā hai.

²⁰lekin ab merā ḳhaimā tabāh ho gayā hai, us ke tamām rasse ṭūṭ gae haiṅ. mere beṭe mere pās se chale gae haiṅ, ek bhī nahīṅ rahā. koī nahīṅ hai jo merā ḳhaimā dubārā lagāe, jo us ke parde nae sire se laṭkāe.

²¹kyūṅki qaum ke gallābān ahmaq ho gae haiṅ, unhoṅ ne rab ko talāsh nahīṅ kiyā. is lie wuh kāmyāb nahīṅ rahe, aur un kā pūrā rewaṛ titar-bitar ho gayā hai.

²²suno! ek ḳhabar pahuṅch rahī hai, shimālī mulk se shor-o-ġhauġhā sunāī de rahā hai. yahūdāh ke shahr us kī zad meṅ ā kar barbād ho jāeṅge. āindā gīdaṛ hī un meṅ baseṅge.

²³ai rab, maiṅ ne jān liyā hai ki insān kī rāh us ke apne hāth meṅ nahīṅ hotī. apnī marzī se na wuh chaltā, na qadam uṭhātā hai.

²⁴ai rab, merī tambīh kar, lekin munāsib had tak. taish meṅ ā kar merī tambīh na kar, warnā maiṅ bhasm ho jāūṅgā.

²⁵apnā ġhazab un aqwām par nāzil kar jo tujhe nahīṅ jāntīṅ, un ummatoṅ par jo terā nām le kar tujhe nahīṅ pukārtīṅ. kyūṅki unhoṅ ne yāqūb ko haṛap kar liyā hai. unhoṅ ne use mukammal taur par nigal kar us kī charāgāh ko tabāh kar diyā hai.