Read Roman Urdu Geo yarmiyāh 11 Bible Online

yarmiyāh 11 - Roman Urdu Geo bible

yarmiyāh 11

¹rab yarmiyāh se hamkalām huā,

²“yarūshalam aur yahūdāh ke bāshindoṅ se kah ki us ahd kī sharāit par dhyān do jo maiṅ ne tumhāre sāth bāndhā thā.

³rab jo isrāīl kā ḳhudā hai farmātā hai ki us par lānat jo us ahd kī sharāit pūrī na kare

⁴jo maiṅ ne tumhāre bāpdādā se bāndhā thā jab unheṅ misr se nikāl lāyā, us maqām se jo lohā pighlāne wālī bhaṭṭī kī mānind thā. us waqt maiṅ bolā, ‘merī suno aur mere har hukm par amal karo to tum merī qaum hoge aur maiṅ tumhārā ḳhudā hūṅgā.

⁵phir maiṅ wuh wādā pūrā karūṅga jo maiṅ ne qasam khā kar tumhāre bāpdādā se kiyā thā, maiṅ tumheṅ wuh mulk dūṅgā jis meṅ dūdh aur shahd kī kasrat hai.’ āj tum usī mulk meṅ rah rahe ho.” maiṅ, yarmiyāh ne jawāb diyā, “ai rab, āmīn, aisā hī ho!”

⁶tab rab ne mujhe hukm diyā ki yahūdāh ke shahroṅ aur yarūshalam kī galiyoṅ meṅ phir kar yih tamām bāteṅ sunā de. elān kar, “ahd kī sharāit par dhyān de kar un par amal karo.

⁷tumhāre bāpdādā ko misr se nikālte waqt maiṅ ne unheṅ āgāh kiyā ki merī suno. āj tak maiṅ bār bār yihī bāt dohrātā rahā,

⁸lekin unhoṅ ne na merī sunī, na dhyān diyā balki har ek apne sharīr dil kī zid ke mutābiq zindagī guzārtā rahā. ahd kī jin bātoṅ par maiṅ ne unheṅ amal karne kā hukm diyā thā un par unhoṅ ne amal na kiyā. natīje meṅ maiṅ un par wuh tamām lānateṅ lāyā jo ahd meṅ bayān kī gaī haiṅ.”

⁹rab mazīd mujh se hamkalām huā, “yahūdāh aur yarūshalam ke bāshindoṅ ne mere ḳhilāf sāzish kī hai.

¹⁰un se wuhī gunāh sarzad hue haiṅ jo un ke bāpdādā ne kie the. kyūṅki yih bhī merī bāteṅ sunane ke lie tayyār nahīṅ haiṅ, yih bhī ajnabī mābūdoṅ ke pīchhe ho lie haiṅ tāki un kī ḳhidmat kareṅ. isrāīl aur yahūdāh ne mil kar wuh ahd toṛā hai jo maiṅ ne un ke bāpdādā se bāndhā thā.

¹¹is lie rab farmātā hai ki maiṅ un par aisī āfat nāzil karūṅga jis se wuh bach nahīṅ sakeṅge. tab wuh madad ke lie mujh se faryād kareṅge, lekin maiṅ un kī nahīṅ sunūṅgā.

¹²phir yahūdāh aur yarūshalam ke bāshinde apne shahroṅ se nikal kar chīḳhte chillāte un dewatāoṅ se minnat kareṅge jin ke sāmne baḳhūr jalāte rahe haiṅ. lekin ab jab wuh musībat meṅ mubtalā hoṅge to yih unheṅ nahīṅ bachāeṅge.

¹³ai yahūdāh, tere dewatā tere shahroṅ jaise beshumār ho gae haiṅ. sharmnāk dewatā bāl ke lie baḳhūr jalāne kī itnī qurbāngāheṅ khaṛī kī gaī haiṅ jitnī yarūshalam meṅ galiyāṅ hotī haiṅ.

¹⁴ai yarmiyāh, is qaum ke lie duā mat karnā! is ke lie na minnat kar, na samājat. kyūṅki jab āfat un par āegī aur wuh chillā kar mujh se faryād kareṅge to maiṅ un kī nahīṅ sunūṅgā.

¹⁵merī pyārī qaum mere ghar meṅ kyūṅ hāzir hotī hai? wuh to apnī beshumār sāzishoṅ se bāz hī nahīṅ ātī. kyā āne wālī āfat qurbānī kā muqaddas gosht pesh karne se ruk jāegī? agar aisā hotā to tū ḳhushī manā saktī.

¹⁶rab ne terā nām ‘zaitūn kā phaltā phūltā daraḳht jis kā ḳhūbsūrat phal hai’ rakhā, lekin ab wuh zabardast āṅdhī kā shor machā kar daraḳht ko āg lagāegā. tab us kī tamām ḍāliyāṅ bhasm ho jāeṅgī.

¹⁷ai isrāīl aur yahūdāh, rabb-ul-afwāj ne ḳhud tumheṅ zamīn meṅ lagāyā. lekin ab us ne tum par āfat lāne kā faislā kiyā hai. kyūṅ? tumhāre ġhalat kām kī wajah se, aur is lie ki tum ne bāl dewatā ko baḳhūr kī qurbāniyāṅ pesh karke mujhe taish dilāyā hai.”

¹⁸rab ne mujhe ittilā dī to mujhe mālūm huā. hāṅ, us waqt tū hī ne mujhe un ke mansūboṅ se āgāh kiyā.

¹⁹pahle maiṅ us bhūle-bhāle bheṛ ke bachche kī mānind thā jise qasāī ke pās lāyā jā rahā ho. mujhe kyā patā thā ki yih mere ḳhilāf sāzisheṅ kar rahe haiṅ. āpas meṅ wuh kah rahe the, “āo, ham daraḳht ko phal samet ḳhatm kareṅ, āo ham use zindoṅ ke mulk meṅ se miṭāeṅ tāki us kā nām-o-nishān tak yād na rahe.”

²⁰ai rabb-ul-afwāj, tū ādil munsif hai jo logoṅ ke sab se gahre ḳhayālāt aur rāz jāṅch letā hai. ab baḳhsh de ki maiṅ apnī āṅkhoṅ se wuh intiqām dekhūṅ jo tū mere muḳhālifoṅ se legā. kyūṅki maiṅ ne apnā muāmalā tere hī sapurd kar diyā hai.

²¹rab farmātā hai, “anatot ke ādmī tujhe qatl karnā chāhte haiṅ. wuh kahte haiṅ, ‘rab kā nām le kar nabuwwat mat karnā, warnā tū hamāre hāthoṅ mār diyā jāegā’.”

²²chūṅki yih log aisī bāteṅ karte haiṅ is lie rabb-ul-afwāj farmātā hai, “maiṅ unheṅ sazā dūṅgā! un ke jawān ādmī talwār se aur un ke beṭe-beṭiyāṅ kāl se halāk ho jāeṅge.

²³un meṅ se ek bhī nahīṅ bachegā. kyūṅki jis sāl un kī sazā nāzil hogī, us waqt maiṅ anatot ke ādmiyoṅ par saḳht āfat lāūṅgā.”