Read Roman Urdu Geo yarmiyāh 14 Bible Online

yarmiyāh 14 - Roman Urdu Geo bible

yarmiyāh 14

¹kāl ke daurān rab yarmiyāh se hamkalām huā,

²“yahūdāh mātam kar rahā hai, us ke darwāzoṅ kī hālat qābil-e-rahm hai. log sogwār hālat meṅ farsh par baiṭhe haiṅ, aur yarūshalam kī chīḳheṅ āsmān tak buland ho rahī haiṅ.

³amīr apne naukaroṅ ko pānī bharne bhejte haiṅ, lekin hauzoṅ ke pās pahuṅch kar patā chaltā hai ki pānī nahīṅ hai, is lie wuh ḳhālī hāth wāpas ā jāte haiṅ. sharmindagī aur nadāmat ke māre wuh apne saroṅ ko ḍhāṅp lete haiṅ.

⁴bārish na hone kī wajah se zamīn meṅ darāṛeṅ paṛ gaī haiṅ. khetoṅ meṅ kām karne wāle bhī sharm ke māre apne saroṅ ko ḍhāṅp lete haiṅ.

⁵ghās nahīṅ hai, is lie hirnī apne naumaulūd bachche ko chhoṛ detī hai.

⁶janglī gadhe banjar ṭīloṅ par khaṛe gīdaṛoṅ kī tarah hāṅpte haiṅ. hariyālī na milne kī wajah se wuh bejān ho rahe haiṅ.”

⁷ai rab, hamāre gunāh hamāre ḳhilāf gawāhī de rahe haiṅ. to bhī apne nām kī ḳhātir ham par rahm kar. ham mānte haiṅ ki burī tarah bewafā ho gae haiṅ, ham ne terā hī gunāh kiyā hai.

⁸ai allāh, tū isrāīl kī ummīd hai, tū hī musībat ke waqt use chhuṭkārā detā hai. to phir hamāre sāth terā sulūk mulk meṅ ajnabī kā sā kyūṅ hai? tū rāt ko kabhī idhar kabhī idhar ṭhaharne wāle musāfir jaisā kyūṅ hai?

⁹tū kyūṅ us ādmī kī mānind hai jo achānak dam-ba-ḳhud ho jātā hai, us sūrme kī mānind jo bebas ho kar bachā nahīṅ saktā. ai rab, tū to hamāre darmiyān hī rahtā hai, aur ham par tere hī nām kā ṭhappā lagā hai. hameṅ tark na kar!

¹⁰lekin rab is qaum ke bāre meṅ farmātā hai, “yih log āwārā phirne ke shauqīn haiṅ, yih apne pāoṅ ko rok hī nahīṅ sakte. maiṅ un se nāḳhush hūṅ. ab mujhe un ke ġhalat kām yād raheṅge, ab maiṅ un ke gunāhoṅ kī sazā dūṅgā.”

¹¹rab mazīd mujh se hamkalām huā, “is qaum kī bahbūdī ke lie duā mat karnā.

¹²go yih rozā bhī rakheṅ to bhī maiṅ in kī iltijāoṅ par dhyān nahīṅ dūṅgā. go yih bhasm hone wālī aur ġhallā kī qurbāniyāṅ pesh bhī kareṅ to bhī maiṅ in se ḳhush nahīṅ hūṅgā balki inheṅ kāl, talwār aur bīmāriyoṅ se nest-o-nābūd kar dūṅgā.”

¹³yih sun kar maiṅ ne etirāz kiyā, “ai rab qādir-e-mutlaq, nabī inheṅ batāte āe haiṅ, ‘na qatl-o-ġhārat kā ḳhatrā hogā, na kāl paṛegā balki maiṅ yihīṅ tumhāre lie amn-o-amān kā pakkā band-o-bast kar lūṅgā’.”

¹⁴rab ne jawāb diyā, “nabī merā nām le kar jhūṭī peshgoiyāṅ bayān kar rahe haiṅ. maiṅ ne na unheṅ bhejā, na unheṅ koī zimmādārī dī aur na un se hamkalām huā. yih tumheṅ jhūṭī royāeṅ, fuzūl peshgoiyāṅ aur apne dil ke wahm sunāte rahe haiṅ.”

¹⁵chunāṅche rab farmātā hai, “yih nabī talwār aur kāl kī zad meṅ ā kar mar jāeṅge. kyūṅki go maiṅ ne unheṅ nahīṅ bhejā to bhī yih mere nām meṅ nabuwwat karke kahte haiṅ ki mulk meṅ na qatl-o-ġhārat kā ḳhatrā hogā, na kāl paṛegā.

¹⁶aur jin logoṅ ko wuh apnī nabuwwateṅ sunāte rahe haiṅ wuh talwār aur kāl kā shikār ban jāeṅge, un kī lāsheṅ yarūshalam kī galiyoṅ meṅ phaiṅk dī jāeṅgī. unheṅ dafnāne wālā koī nahīṅ hogā, na un ko, na un kī bīwiyoṅ ko aur na un ke beṭe-beṭiyoṅ ko. yūṅ maiṅ un par un kī apnī badkārī nāzil karūṅga.

¹⁷ai yarmiyāh, unheṅ yih kalām sunā, ‘din rāt mere āṅsū bah rahe haiṅ. wuh ruk nahīṅ sakte, kyūṅki merī qaum, merī kuṅwārī beṭī ko gahrī choṭ lag gaī hai, aisā zaḳhm jo bhar nahīṅ saktā.

¹⁸dehāt meṅ jā kar mujhe wuh sab nazar āte haiṅ jo talwār se qatl kie gae haiṅ. jab maiṅ shahr meṅ wāpas ātā hūṅ to chāroṅ taraf kāl ke bure asarāt dikhāī dete haiṅ. nabī aur imām mulk meṅ māre māre phir rahe haiṅ, aur unheṅ mālūm nahīṅ ki kyā kareṅ’.”

¹⁹ai rab, kyā tū ne yahūdāh ko sarāsar radd kiyā hai? kyā tujhe siyyūn se itnī ghin ātī hai? tū ne hameṅ itnī bār kyūṅ mārā ki hamārā ilāj nāmumkin ho gayā hai? ham amn-o-amān ke intizār meṅ rahe, lekin hālāt ṭhīk na hue. ham shifā pāne kī ummīd rakhte the, lekin is ke bajāe ham par dahshat chhā gaī.

²⁰ai rab, ham apnī bedīnī aur apne bāpdādā kā qusūr taslīm karte haiṅ. ham ne terā hī gunāh kiyā hai.

²¹apne nām kī ḳhātir hameṅ haqīr na jān, apne jalālī taḳht kī behurmatī hone na de! hamāre sāth apnā ahd yād kar, use mansūḳh na kar.

²²kyā dīgar aqwām ke dewatāoṅ meṅ se koī hai jo bārish barsā sake? yā kyā āsmān ḳhud hī bārisheṅ zamīn par bhej detā hai? hargiz nahīṅ, balki tū hī yih sab kuchh kartā hai, ai rab hamāre ḳhudā. isī lie ham tujh par ummīd rakhte haiṅ. tū hī ne yih sārā intizām qāim kiyā hai.