Read Roman Urdu Geo yarmiyāh 16 Bible Online

yarmiyāh 16 - Roman Urdu Geo bible

yarmiyāh 16

¹rab mujh se hamkalām huā,

²“is maqām meṅ na terī shādī ho, na tere beṭe-beṭiyāṅ paidā ho jāeṅ.”

³kyūṅki rab yahāṅ paidā hone wāle beṭe-beṭiyoṅ aur un ke māṅ-bāp ke bāre meṅ farmātā hai,

⁴“wuh mohlak bīmāriyoṅ se mar kar khetoṅ meṅ gobar kī tarah paṛe raheṅge. na koī un par mātam karegā, na unheṅ dafnāegā, kyūṅki wuh talwār aur kāl se halāk ho jāeṅge, aur un kī lāsheṅ parindoṅ aur darindoṅ kī ḳhurāk ban jāeṅgī.”

⁵rab farmātā hai, “aise ghar meṅ mat jānā jis meṅ koī faut ho gayā hai. [4] us meṅ na mātam karne ke lie, na afsos karne ke lie dāḳhil honā. kyūṅki ab se maiṅ is qaum par apnī salāmatī, mehrbānī aur rahm kā izhār nahīṅ karūṅga.” yih rab kā farmān hai.

⁶“is mulk ke bāshinde mar jāeṅge, ḳhwāh baṛe hoṅ yā chhoṭe. aur na koī unheṅ dafnāegā, na mātam karegā. koī nahīṅ hogā jo ġham ke māre apnī jild ko kāṭe yā apne sar ko munḍwāe.

⁷kisī kā bāp yā māṅ bhī intiqāl kar jāe to bhī log mātam karne wāle ghar meṅ nahīṅ jāeṅge, na tasallī dene ke lie janāze ke khāne-pīne meṅ sharīk hoṅge.

⁸aise ghar meṅ bhī dāḳhil na honā jahāṅ log ziyāfat kar rahe haiṅ. un ke sāth khāne-pīne ke lie mat baiṭhnā.”

⁹kyūṅki rabb-ul-afwāj jo isrāīl kā ḳhudā hai farmātā hai, “tumhāre jīte jī, hāṅ tumhāre deḳhte deḳhte maiṅ yahāṅ ḳhushī-o-shādmānī kī āwāzeṅ band kar dūṅgā. ab se dūlhā dulhan kī āwāzeṅ ḳhāmosh ho jāeṅgī.

¹⁰jab tū is qaum ko yih sab kuchh batāegā to log pūchheṅge, ‘rab itnī baṛī āfat ham par lāne par kyūṅ tulā huā hai? ham se kyā jurm huā hai? ham ne rab apne ḳhudā kā kyā gunāh kiyā hai?’

¹¹unheṅ jawāb de, ‘wajah yih hai ki tumhāre bāpdādā ne mujhe tark kar diyā. wuh merī sharīat ke tābe na rahe balki mujhe chhoṛ kar ajnabī mābūdoṅ ke pīchhe lag gae aur un hī kī ḳhidmat aur pūjā karne lage.

¹²lekin tum apne bāpdādā kī nisbat kahīṅ zyādā ġhalat kām karte ho. dekho, merī koī nahīṅ suntā balki har ek apne sharīr dil kī zid ke mutābiq zindagī guzārtā hai.

¹³is lie maiṅ tumheṅ is mulk se nikāl kar ek aise mulk meṅ phaiṅk dūṅgā jis se na tum aur na tumhāre bāpdādā wāqif the. wahāṅ tum din rāt ajnabī mābūdoṅ kī ḳhidmat karoge, kyūṅki us waqt maiṅ tum par rahm nahīṅ karūṅga’.”

¹⁴lekin rab yih bhī farmātā hai, “aisā waqt āne wālā hai ki log qasam khāte waqt nahīṅ kaheṅge, ‘rab kī hayāt kī qasam jo isrāīliyoṅ ko misr se nikāl lāyā.’

¹⁵is ke bajāe wuh kaheṅge, ‘rab kī hayāt kī qasam jo isrāīliyoṅ ko shimālī mulk aur un dīgar mamālik se nikāl lāyā jin meṅ us ne unheṅ muntashir kar diyā thā.’ kyūṅki maiṅ unheṅ us mulk meṅ wāpas lāūṅgā jo maiṅ ne un ke bāpdādā ko diyā thā.”

¹⁶lekin maujūdā hāl ke bāre meṅ rab farmātā hai, “maiṅ bahut se māhīgīr bhej dūṅgā jo jāl ḍāl kar unheṅ pakaṛeṅge. is ke bād maiṅ muta'addid shikārī bhej dūṅgā jo un kā tāqqub karke unheṅ har jagah pakaṛeṅge, ḳhwāh wuh kisī pahāṛ yā ṭīle par chhup gae hoṅ, ḳhwāh chaṭānoṅ kī kisī darāṛ meṅ.

¹⁷kyūṅki un kī tamām harkateṅ mujhe nazar ātī haiṅ. mere sāmne wuh chhup nahīṅ sakte, aur un kā qusūr mere sāmne poshīdā nahīṅ hai.

¹⁸ab maiṅ unheṅ un ke gunāhoṅ kī dugnī sazā dūṅgā, kyūṅki unhoṅ ne apne bejān butoṅ aur ghinaunī chīzoṅ se merī maurūsī zamīn ko bhar kar mere mulk kī behurmatī kī hai.”

¹⁹ai rab, tū merī quwwat aur merā qilā hai, musībat ke din maiṅ tujh meṅ panāh letā hūṅ. duniyā kī intihā se aqwām tere pās ā kar kaheṅgī, “hamāre bāpdādā ko mīrās meṅ jhūṭ hī milā, aise bekār but jo un kī madad na kar sake.

²⁰insān kis tarah apne lie ḳhudā banā saktā hai? us ke but to ḳhudā nahīṅ haiṅ.”

²¹rab farmātā hai, “chunāṅche is bār maiṅ unheṅ sahīh pahchān atā karūṅga. wuh merī quwwat aur tāqat ko pahchān leṅge, aur wuh jān leṅge ki merā nām rab hai.