Read Roman Urdu Geo yarmiyāh 17 Bible Online

yarmiyāh 17 - Roman Urdu Geo bible

yarmiyāh 17

¹ai yahūdāh ke logo, tumhārā gunāh tumhārī zindagiyioṅ kā anmiṭ hissā ban gayā hai. use hīre kī nok rakhne wāle lohe ke āle se tumhāre diloṅ kī taḳhtiyoṅ aur tumhārī qurbāngāhoṅ ke sīṅgoṅ par kandā kiyā gayā hai.

²na sirf tum balki tumhāre bachche bhī apnī qurbāngāhoṅ aur asīrat dewī ke khamboṅ ko yād karte haiṅ, ḳhwāh wuh ghane daraḳhtoṅ ke sāy meṅ yā ūṅchī jaghoṅ par kyūṅ na hoṅ.

³ai mere pahāṛ jo dehāt se ghirā huā hai, tere pūre mulk par gunāh kā asar hai, is lie maiṅ hone dūṅgā ki sab kuchh lūṭ liyā jāegā. terā māl, tere ḳhazāne aur terī ūṅchī jaghoṅ kī qurbāngāheṅ sab chhīn lī jāeṅgī.

⁴apne qusūr ke sabab se tujhe apnī maurūsī milkiyat chhoṛnī paṛegī, wuh milkiyat jo tujhe merī taraf se milī thī. maiṅ tujhe tere dushmanoṅ kā ġhulām banā dūṅgā, aur tū ek nāmālūm mulk meṅ basegā. kyūṅki tum logoṅ ne mujhe taish dilāyā hai, aur ab tum par merā ġhazab kabhī na bujhne wālī āg kī tarah bhaṛaktā rahegā.”

⁵rab farmātā hai, “us par lānat jis kā dil rab se dūr ho kar sirf insān aur usī kī tāqat par bharosā rakhtā hai.

⁶wuh registān meṅ jhāṛī kī mānind hogā, use kisī bhī achchhī chīz kā tajribā nahīṅ hogā balki wuh bayābān ke aise pathrīle aur kallar wāle ilāqoṅ meṅ basegā jahāṅ koī aur nahīṅ rahtā.

⁷lekin mubārak hai wuh jo rab par bharosā rakhtā hai, jis kā etimād usī par hai.

⁸wuh pānī ke kināre par lage us daraḳht kī mānind hai jis kī jaṛeṅ nahar tak phailī huī haiṅ. jhulsāne wālī garmī bhī āe to use ḍar nahīṅ, balki us ke patte hare-bhare rahte haiṅ. kāl bhī paṛe to wuh pareshān nahīṅ hotā balki waqt par phal lātā rahtā hai.

⁹dil had se zyādā farebdih hai, aur us kā ilāj nāmumkin hai. kaun us kā sahīh ilm rakhtā hai?

¹⁰maiṅ, rab hī dil kī taftīsh kartā hūṅ. maiṅ har ek kī bātinī hālat jāṅch kar use us ke chāl-chalan aur amal kā munāsib ajr detā hūṅ.

¹¹jis shaḳhs ne ġhalat tarīqe se daulat jamā kī hai wuh us tītar kī mānind hai jo kisī dūsre ke anḍoṅ par baiṭh jātā hai. kyūṅki zindagī ke urūj par use sab kuchh chhoṛnā paṛegā, aur āḳhirkār us kī hamāqat sab par zāhir ho jāegī.”

¹²hamārā maqdis allāh kā jalālī taḳht hai jo azal se azīm hai.

¹³ai rab, tū hī isrāīl kī ummīd hai. tujhe tark karne wāle sab sharmindā ho jāeṅge. tujh se dūr hone wāle ḳhāk meṅ milāe jāeṅge, kyūṅki unhoṅ ne rab ko chhoṛ diyā hai jo zindagī ke pānī kā sarchashmā hai.

¹⁴ai rab, tū hī mujhe shifā de to mujhe shifā milegī. tū hī mujhe bachā to maiṅ bachūṅgā. kyūṅki tū hī merā faḳhr hai.

¹⁵log mujh se pūchhte rahte haiṅ, “rab kā jo kalām tū ne pesh kiyā wuh kahāṅ hai? use pūrā hone de!”

¹⁶ai allāh, tū ne mujhe apnī qaum kā gallābān banāyā hai, aur maiṅ ne yih zimmādārī kabhī nahīṅ chhoṛī. maiṅ ne kabhī ḳhwāhish nahīṅ rakhī ki musībat kā din āe. tū yih sab kuchh jāntā hai, jo bhī bāt mere muṅh se niklī hai wuh tere sāmne hai.

¹⁷ab mere lie dahshat kā bāis na ban! musībat ke din maiṅ tujh meṅ hī panāh letā hūṅ.

¹⁸merā tāqqub karne wāle sharmindā ho jāeṅ, lekin merī ruswāī na ho. un par dahshat chhā jāe, lekin maiṅ is se bachā rahūṅ. un par musībat kā din nāzil kar, un ko do bār kuchal kar ḳhāk meṅ milā de.

¹⁹rab mujh se hamkalām huā, “shahr ke awāmī darwāze meṅ khaṛā ho jā, jise yahūdāh ke bādshāh istemāl karte haiṅ jab shahr meṅ āte aur us se nikalte haiṅ. isī tarah yarūshalam ke dīgar darwāzoṅ meṅ bhī khaṛā ho jā.

²⁰wahāṅ logoṅ se kah, ‘ai darwāzoṅ meṅ se guzarne wālo, rab kā kalām suno! ai yahūdāh ke bādshāho aur yahūdāh aur yarūshalam ke tamām bāshindo, merī taraf kān lagāo!

²¹rab farmātā hai ki apnī jān ḳhatre meṅ na ḍālo balki dhyān do ki tum sabat ke din māl-o-asbāb shahr meṅ na lāo aur use uṭhā kar shahr ke darwāzoṅ meṅ dāḳhil na ho.

²²na sabat ke din bojh uṭhā kar apne ghar se kahīṅ aur le jāo, na koī aur kām karo, balki use is tarah manānā ki maḳhsūs-o-muqaddas ho. maiṅ ne tumhāre bāpdādā ko yih karne kā hukm diyā thā,

²³lekin unhoṅ ne merī na sunī, na tawajjuh dī balki apne mauqif par aṛe rahe aur na merī sunī, na merī tarbiyat qabūl kī.

²⁴rab farmātā hai ki agar tum wāqaī merī suno aur sabat ke din apnā māl-o-asbāb is shahr meṅ na lāo balki ārām karne se yih din maḳhsūs-o-muqaddas māno

²⁵to phir āindā bhī dāūd kī nasl ke bādshāh aur sardār is shahr ke darwāzoṅ meṅ se guzareṅge. tab wuh ghoṛoṅ aur rathoṅ par sawār ho kar apne afsaroṅ aur yahūdāh aur yarūshalam ke bāshindoṅ ke sāth shahr meṅ āte jāte raheṅge. agar tum sabat ko māno to yih shahr hameshā tak ābād rahegā.

²⁶phir pūre mulk se log yahāṅ āeṅge. yahūdāh ke shahroṅ aur yarūshalam ke gird-o-nawāh ke dehāt se, binyamīn ke qabāilī ilāqe se, maġhrib ke nashebī pahāṛī ilāqe se, pahāṛī ilāqe se aur dasht-e-najab se sab apnī qurbāniyāṅ lā kar rab ke ghar meṅ pesh kareṅge. un kī tamām bhasm hone wālī qurbāniyāṅ, zabah, ġhallā, baḳhūr aur salāmatī kī qurbāniyāṅ rab ke ghar meṅ chaṛhāī jāeṅgī.

²⁷lekin agar tum merī na suno aur sabat kā din maḳhsūs-o-muqaddas na māno to phir tumheṅ saḳht sazā milegī. agar tum sabat ke din apnā māl-o-asbāb shahr meṅ lāo to maiṅ in hī darwāzoṅ meṅ ek na bujhne wālī āg lagā dūṅgā jo jaltī jaltī yarūshalam ke mahaloṅ ko bhasm kar degī’.”