Read Roman Urdu Geo yarmiyāh 18 Bible Online

yarmiyāh 18 - Roman Urdu Geo bible

yarmiyāh 18

¹rab yarmiyāh se hamkalām huā,

²“uṭh aur kumhār ke ghar meṅ jā! wahāṅ maiṅ tujh se hamkalām hūṅgā.”

³chunāṅche maiṅ kumhār ke ghar meṅ pahuṅch gayā. us waqt wuh chāk par kām kar rahā thā.

⁴lekin miṭṭī kā jo bartan wuh apne hāthoṅ se tashkīl de rahā thā wuh ḳharāb ho gayā. yih dekh kar kumhār ne usī miṭṭī se nayā bartan banā diyā jo use zyādā pasand thā.

⁵tab rab mujh se hamkalām huā,

⁶“ai isrāīl, kyā maiṅ tumhāre sāth waisā sulūk nahīṅ kar saktā jaisā kumhār apne bartan se kartā hai? jis tarah miṭṭī kumhār ke hāth meṅ tashkīl pātī hai usī tarah tum mere hāth meṅ tashkīl pāte ho.” yih rab kā farmān hai.

⁷“kabhī maiṅ elān kartā hūṅ ki kisī qaum yā saltanat ko jaṛ se ukhāṛ dūṅgā, use girā kar tabāh kar dūṅgā.

⁸lekin kaī bār yih qaum apnī ġhalat rāh ko tark kar detī hai. is sūrat meṅ maiṅ pachhtā kar us par wuh āfat nahīṅ lātā jo maiṅ ne lāne ko kahā thā.

⁹kabhī maiṅ kisī qaum yā saltanat ko panīrī kī tarah lagāne aur tāmīr karne kā elān bhī kartā hūṅ.

¹⁰lekin afsos, kaī dafā yih qaum merī nahīṅ suntī balki aisā kām karne lagtī hai jo mujhe nāpasand hai. is sūrat meṅ maiṅ pachhtā kar us par wuh mehrbānī nahīṅ kartā jis kā elān maiṅ ne kiyā thā.

¹¹ab yahūdāh aur yarūshalam ke bāshindoṅ se muḳhātib ho kar kah, ‘rab farmātā hai ki maiṅ tum par āfat lāne kī tayyāriyāṅ kar rahā hūṅ, maiṅ ne tumhāre ḳhilāf mansūbā bāndh liyā hai. chunāṅche har ek apnī ġhalat rāh se haṭ kar wāpas āe, har ek apnā chāl-chalan aur apnā rawayyā durust kare.’

¹²lekin afsos, yih etirāz kareṅge, ‘dafā karo! ham apne hī mansūbe jārī rakheṅge. har ek apne sharīr dil kī zid ke mutābiq hī zindagī guzāregā’.”

¹³is lie rab farmātā hai, “dīgar aqwām se daryāft karo ki un meṅ kabhī aisī bāt sunane meṅ āī hai. kuṅwārī isrāīl se nihāyat ghinaunā jurm huā hai!

¹⁴kyā lubnān kī pathrīlī choṭiyoṅ kī barf kabhī pighal kar ḳhatm ho jātī hai? kyā dūrdarāz chashmoṅ se bahne wālā barfīlā pānī kabhī tham jātā hai?

¹⁵lekin merī qaum mujhe bhūl gaī hai. yih log bātil butoṅ ke sāmne baḳhūr jalāte haiṅ, un chīzoṅ ke sāmne jin ke bāis wuh ṭhokar khā kar qadīm rāhoṅ se haṭ gae haiṅ aur ab kachche rāstoṅ par chal rahe haiṅ.

¹⁶is lie un kā mulk wīrān ho jāegā, ek aisī jagah jise dūsre apne mazāq kā nishānā banāeṅge. jo bhī guzare us ke roṅgṭe khaṛe ho jāeṅge, wuh afsos se apnā sar hilāegā.

¹⁷dushman āegā to maiṅ apnī qaum ko us ke āge āge muntashir karūṅga. jis tarah gard mashriqī hawā ke tez jhoṅkoṅ se uṛ kar bikhar jātī hai usī tarah wuh titar-bitar ho jāeṅge. jab āfat un par nāzil hogī to maiṅ un kī taraf rujū nahīṅ karūṅga balki apnā muṅh un se pher lūṅgā.”

¹⁸yih sun kar log āpas meṅ kahne lage, “āo, ham yarmiyāh ke ḳhilāf mansūbe bāndheṅ, kyūṅki us kī bāteṅ sahīh nahīṅ haiṅ. na imām sharīat kī hidāyat se, na dānishmand achchhe mashwaroṅ se, aur na nabī allāh ke kalām se mahrūm ho jāegā. āo, ham zabānī us par hamlā kareṅ aur us kī bātoṅ par dhyān na deṅ, ḳhwāh wuh kuchh bhī kyūṅ na kahe.”

¹⁹ai rab, mujh par tawajjuh de aur us par ġhaur kar jo mere muḳhālif kah rahe haiṅ.

²⁰kyā insān ko nek kām ke badle meṅ burā kām karnā chāhie? kyūṅki unhoṅ ne mujhe phaṅsāne ke lie gaṛhā khod kar tayyār kar rakhā hai. yād kar ki maiṅ ne tere huzūr khaṛe ho kar un ke lie shafā'at kī tāki terā ġhazab un par nāzil na ho.

²¹ab hone de ki un ke bachche bhūke mar jāeṅ aur wuh ḳhud talwār kī zad meṅ āeṅ. un kī bīwiyāṅ beaulād aur shauharoṅ se mahrūm ho jāeṅ. un ke ādmiyoṅ ko maut ke ghāṭ utārā jāe, un ke naujawān jang meṅ laṛte laṛte halāk ho jāeṅ.

²²achānak un par jangī daste lā tāki un ke gharoṅ se chīḳhoṅ kī āwāzeṅ buland hoṅ. kyūṅki unhoṅ ne mujhe pakaṛne ke lie gaṛhā khodā hai, unhoṅ ne mere pāoṅ ko phaṅsāne ke lie mere rāste meṅ phande chhupā rakhe haiṅ.

²³ai rab, tū un kī mujhe qatl karne kī tamām sāzisheṅ jāntā hai. un kā qusūr muāf na kar, aur un ke gunāhoṅ ko na miṭā balki unheṅ hameshā yād kar. hone de ki wuh ṭhokar khā kar tere sāmne gir jāeṅ. jab terā ġhazab nāzil hogā to un se bhī nipaṭ le.