Read Roman Urdu Geo yarmiyāh 2 Bible Online

yarmiyāh 2 - Roman Urdu Geo bible

yarmiyāh 2

¹rab kā kalām mujh par nāzil huā,

²“jā, zor se yarūshalam ke kān meṅ pukār ki rab farmātā hai, ‘mujhe terī jawānī kī wafādārī ḳhūb yād hai. jab terī shādī qarīb āī to tū mujhe kitnā pyār kartī thī, yahāṅ tak ki tū registān meṅ bhī jahāṅ khetībāṛī nāmumkin thī mere pīchhe pīchhe chaltī rahī.

³us waqt isrāīl rab ke lie maḳhsūs-o-muqaddas thā, wuh us kī fasal kā pahlā phal thā. jis ne bhī us meṅ se kuchh khāyā wuh mujrim ṭhahrā, aur us par āfat nāzil huī. yih rab kā farmān hai’.”

⁴ai yāqūb kī aulād, rab kā kalām suno! ai isrāīl ke tamām gharāno, dhyān do!

⁵rab farmātā hai, “tumhāre bāpdādā ne mujh meṅ kaun sī nāinsāfī pāī ki mujh se itne dūr ho gae. hech butoṅ ke pīchhe ho kar wuh ḳhud hech ho gae.

⁶unhoṅ ne pūchhā tak nahīṅ ki rab kahāṅ hai jo hameṅ misr se nikāl lāyā aur registān meṅ sahīh rāh dikhāī, go wuh ilāqā wīrān-o-sunsān thā. har taraf ghāṭiyoṅ, pānī kī saḳht kamī aur tārīkī kā sāmnā karnā paṛā. na koī us meṅ se guzartā, na koī wahāṅ rahtā hai.

⁷maiṅ to tumheṅ bāġhoṅ se bhare mulk meṅ lāyā tāki tum us ke phal aur achchhī paidāwār se lutfandoz ho sako. lekin tum ne kyā kiyā? mere mulk meṅ dāḳhil hote hī tum ne use nāpāk kar diyā, aur maiṅ apnī maurūsī milkiyat se ghin khāne lagā.

⁸na imāmoṅ ne pūchhā ki rab kahāṅ hai, na sharīat ko amal meṅ lāne wāle mujhe jānte the. qaum ke gallābān mujh se bewafā hue, aur nabī befāidā butoṅ ke pīchhe lag kar bāl dewatā ke paiġhāmāt sunāne lage.”

⁹rab farmātā hai, “isī wajah se maiṅ āindā bhī adālat meṅ tumhāre sāth laṛūṅgā. hāṅ, na sirf tumhāre sāth balki tumhārī āne wālī nasloṅ ke sāth bhī.

¹⁰jāo, samundar ko pār karke jazīrā-e-qubrus kī taftīsh karo! apne qāsidoṅ ko mulk-e-qīdār meṅ bhej kar ġhaur se daryāft karo ki kyā wahāṅ kabhī yahāṅ kā sā kām huā hai?

¹¹kyā kisī qaum ne kabhī apne dewatāoṅ ko tabdīl kiyā, go wuh haqīqat meṅ ḳhudā nahīṅ haiṅ? hargiz nahīṅ! lekin merī qaum apnī shān-o-shaukat ke ḳhudā ko chhoṛ kar befāidā butoṅ kī pūjā karne lagī hai.”

¹²rab farmātā hai, “ai āsmān, yih dekh kar haibatzadā ho jā, tere roṅgṭe khaṛe ho jāeṅ, hakkā-bakkā rah jā!

¹³kyūṅki merī qaum se do sangīn jurm sarzad hue haiṅ. ek, unhoṅ ne mujhe tark kiyā, go maiṅ zindagī ke pānī kā sarchashmā hūṅ. dūsre, unhoṅ ne apne zātī hauz banāe haiṅ jo darāṛoṅ kī wajah se bhar hī nahīṅ sakte.

¹⁴kyā isrāīl ibtidā se hī ġhulām hai? kyā us ke wālidain ġhulām the ki wuh ab tak ġhulām hai? hargiz nahīṅ! to phir wuh kyūṅ dūsroṅ kā lūṭā huā māl ban gayā hai?

¹⁵jawān sherbabar dahāṛte hue us par ṭūṭ paṛe haiṅ, garajte garajte unhoṅ ne mulk-e-isrāīl ko barbād kar diyā hai. us ke shahr nazar-e-ātish ho kar wīrān-o-sunsān ho gae haiṅ.

¹⁶sāth sāth memfis aur tahfanhīs ke log bhī tere sar ko munḍwā rahe haiṅ.

¹⁷ai isrāīlī qaum, kyā yih tere ġhalat kām kā natījā nahīṅ? kyūṅki tū ne rab apne ḳhudā ko us waqt tark kiyā jab wuh terī rāhnumāī kar rahā thā.

¹⁸ab mujhe batā ki misr ko jā kar daryā-e-nīl kā pānī pīne kā kyā fāidā? mulk-e-asūr meṅ jā kar daryā-e-furāt kā pānī pīne se kyā hāsil?

¹⁹terā ġhalat kām tujhe sazā de rahā hai, terī bewafā harkateṅ hī terī sarzanish kar rahī haiṅ. chunāṅche jān le aur dhyān de ki rab apne ḳhudā ko chhoṛ kar us kā ḳhauf na mānane kā phal kitnā burā aur kaṛwā hai.” yih qādir-e-mutlaq rabb-ul-afwāj kā farmān hai.

²⁰“kyūṅki shurū se hī tū apne jūe aur rassoṅ ko toṛ kar kahtī rahī, ‘maiṅ terī ḳhidmat nahīṅ karūṅgī!’ tū har bulandī par aur har ghane daraḳht ke sāy meṅ leṭ kar ismatfaroshī kartī rahī.

²¹pahle tū angūr kī maḳhsūs aur qābil-e-etimād nasl kī panīrī thī jise maiṅ ne ḳhud zamīn meṅ lagāyā. to yih kyā huā ki tū bigaṛ kar janglī [2] bel ban gaī?

²²ab tere qusūr kā dāġh utar nahīṅ saktā, ḳhwāh tū kitnā khārī soḍā aur sābun kyūṅ na istemāl kare.” yih rab qādir-e-mutlaq kā farmān hai.

²³“tū kis tarah yih kahne kī jur'at kar saktī hai ki maiṅ ne apne āp ko ālūdā nahīṅ kiyā, maiṅ bāl dewatāoṅ ke pīchhe nahīṅ gaī. wādī meṅ apnī harkatoṅ par to ġhaur kar! jān le ki tujh se kyā kuchh sarzad huā hai. tū bemaqsad idhar udhar bhāgne wālī ūṅṭnī hai.

²⁴balki tū registān meṅ rahne kī ādī gadhī hī hai jo shahwat ke māre hāṅptī hai. mastī ke is ālam meṅ kaun us par qābū pā saktā hai? jo bhī us se milnā chāhe use zyādā jidd-o-jahd kī zarūrat nahīṅ, kyūṅki mastī ke mausam meṅ wuh har ek ke lie hāzir hai.

²⁵ai isrāīl, itnā na dauṛ ki tere jūte ghis kar phaṭ jāeṅ aur terā galā ḳhushk ho jāe. lekin afsos, tū bazid hai, ‘nahīṅ, mujhe chhoṛ de! maiṅ ajnabī mābūdoṅ ko pyār kartī hūṅ, aur lāzim hai ki maiṅ un ke pīchhe bhāgtī jāūṅ.’

²⁶suno! isrāīlī qaum ke tamām afrād un ke bādshāhoṅ, afsaroṅ, imāmoṅ aur nabiyoṅ samet sharmindā ho jāeṅge. wuh pakaṛe hue chor kī sī sharm mahsūs kareṅge.

²⁷yih log lakaṛī ke but se kahte haiṅ, ‘tū merā bāp hai’ aur patthar ke dewatā se, ‘tū ne mujhe janm diyā.’ lekin go yih merī taraf rujū nahīṅ karte balki apnā muṅh mujh se pher kar chalte haiṅ to bhī jūṅ hī koī āfat un par ā jāe to yih mujh se iltijā karne lagte haiṅ ki ā kar hameṅ bachā!

²⁸ab yih but kahāṅ haiṅ jo tū ne apne lie banāe? wuhī khaṛe ho kar dikhāeṅ ki tujhe musībat se bachā sakte haiṅ. ai yahūdāh, āḳhir jitne tere shahr haiṅ utne tere dewatā bhī haiṅ.”

²⁹rab farmātā hai, “tum mujh par kyūṅ ilzām lagāte ho? tum to sab mujh se bewafā ho gae ho.

³⁰maiṅ ne tumhāre bachchoṅ ko sazā dī, lekin befāidā. wuh merī tarbiyat qabūl nahīṅ karte. balki tum ne phāṛne wāle sherbabar kī tarah apne nabiyoṅ par ṭūṭ kar unheṅ talwār se qatl kiyā.

³¹ai maujūdā nasl, rab ke kalām par dhyān do! kyā maiṅ isrāīl ke lie registān yā tārīktarīn ilāqe kī mānind thā? merī qaum kyūṅ kahtī hai, ‘ab ham āzādī se idhar udhar phir sakte haiṅ, āindā ham tere huzūr nahīṅ āeṅge?’

³²kyā kuṅwārī kabhī apne zewarāt ko bhūl saktī hai, yā dulhan apnā urūsī libās? hargiz nahīṅ! lekin merī qaum beshumār dinoṅ se mujhe bhūl gaī hai.

³³tū ishq ḍhūṅḍne meṅ kitnī māhir hai! badkār aurateṅ bhī tujh se bahut kuchh sīkh letī haiṅ.

³⁴tere libās kā dāman begunāh ġharīboṅ ke ḳhūn se ālūdā hai, go tū ne unheṅ naqabzanī jaisā ġhalat kām karte waqt na pakaṛā. is sab kuchh ke bāwujūd bhī

³⁵tū bazid hai ki maiṅ bequsūr hūṅ, allāh kā mujh par ġhussā ṭhanḍā ho gayā hai. lekin maiṅ terī adālat karūṅga, is lie ki tū kahtī hai, ‘mujh se gunāh sarzad nahīṅ huā.’

³⁶tū kabhī idhar, kabhī idhar jā kar itnī āsānī se apnā ruḳh kyūṅ badaltī hai? yaqīn kar ki jis tarah tū apne ittihādī asūr se māyūs ho kar sharmindā huī hai usī tarah tū nae ittihādī misr se bhī nādim ho jāegī.

³⁷tū us jagah se bhī apne hāthoṅ ko sar par rakh kar niklegī. kyūṅki rab ne unheṅ radd kiyā hai jin par tū bharosā rakhtī hai. un se tujhe madad hāsil nahīṅ hogī.”