Read Roman Urdu Geo yarmiyāh 20 Bible Online

yarmiyāh 20 - Roman Urdu Geo bible

yarmiyāh 20

¹us waqt ek imām rab ke ghar meṅ thā jis kā nām fashhūr bin immer thā. wuh rab ke ghar kā ālā afsar thā. jab yarmiyāh kī yih peshgoiyāṅ us ke kānoṅ tak pahuṅch gaīṅ

²to us ne yarmiyāh nabī kī piṭāī karwā kar us ke pāoṅ kāṭh meṅ ṭhoṅk die. yih kāṭh rab ke ghar se mulhiq shahr ke ūpar wāle darwāze banām binyamīn meṅ thā.

³agle din fashhūr ne use āzād kar diyā. tab yarmiyāh ne us se kahā, “rab ne āp kā ek nayā nām rakhā hai. ab se āp kā nām fashhūr nahīṅ hai balki ‘chāroṅ taraf dahshat hī dahshat.’

⁴kyūṅki rab farmātā hai, ‘maiṅ hone dūṅgā ki tū apne lie aur apne tamām dostoṅ ke lie dahshat kī alāmat banegā. kyūṅki tū apnī āṅkhoṅ se apne dostoṅ kī qatl-o-ġhārat dekhegā. maiṅ yahūdāh ke tamām bāshindoṅ ko bābal ke bādshāh ke qabze meṅ kar dūṅgā jo bāz ko mulk-e-bābal meṅ le jāegā aur bāz ko maut ke ghāṭ utār degā.

⁵maiṅ is shahr kī sārī daulat dushman ke hawāle kar dūṅgā, aur wuh is kī tamām paidāwār, qīmtī chīzeṅ aur shāhī ḳhazāne lūṭ kar mulk-e-bābal le jāegā.

⁶ai fashhūr, tū bhī apne ghar wāloṅ samet mulk-e-bābal meṅ jilāwatan hogā. wahāṅ tū mar kar dafnāyā jāegā. aur na sirf tū balki tere wuh sāre dost bhī jinheṅ tū ne jhūṭī peshgoiyāṅ sunāī haiṅ’.”

⁷ai rab, tū ne mujhe manwāyā, aur maiṅ mān gayā. tū mujhe apne qābū meṅ lā kar mujh par ġhālib āyā. ab maiṅ pūrā din mazāq kā nishānā banā rahtā hūṅ. har ek merī haṅsī uṛātā rahtā hai.

⁸kyūṅki jab bhī maiṅ apnā muṅh kholtā hūṅ to mujhe chillā kar ‘zulm-o-tabāhī’ kā nārā lagānā paṛtā hai. chunāṅche maiṅ rab ke kalām ke bāis pūrā din gāliyoṅ aur mazāq kā nishānā banā rahtā hūṅ.

⁹lekin agar maiṅ kahūṅ, “āindā maiṅ na rab kā zikr karūṅga, na us kā nām le kar bolūṅgā” to phir us kā kalām āg kī tarah mere dil meṅ bhaṛakne lagtā hai. aur yih āg merī haḍḍiyoṅ meṅ band rahtī aur kabhī nahīṅ nikaltī. maiṅ ise bardāsht karte karte thak gayā hūṅ, yih mere bas kī bāt nahīṅ rahī.

¹⁰muta'addid logoṅ kī sargoshiyāṅ mere kānoṅ tak pahuṅchtī haiṅ. wuh kahte haiṅ, “chāroṅ taraf dahshat hī dahshat? yih kyā kah rahā hai? us kī rapaṭ likhwāo! āo, ham us kī riporṭ kareṅ.” mere tamām nām-nihād dost is intizār meṅ haiṅ ki maiṅ phisal jāūṅ. wuh kahte haiṅ, “shāyad wuh dhokā khā kar phaṅs jāe aur ham us par ġhālib ā kar us se intiqām le sakeṅ.”

¹¹lekin rab zabardast sūrme kī tarah mere sāth hai, is lie merā tāqqub karne wāle mujh par ġhālib nahīṅ āeṅge balki ḳhud ṭhokar khā kar gir jāeṅge. un ke muṅh kāle ho jāeṅge, kyūṅki wuh nākām ho jāeṅge. un kī ruswāī hameshā hī yād rahegī aur kabhī nahīṅ miṭegī.

¹²ai rabb-ul-afwāj, tū rāstbāz kā muāinā karke dil aur zahan ko parakhtā hai. ab baḳhsh de ki maiṅ apnī āṅkhoṅ se wuh intiqām dekhūṅ jo tū mere muḳhālifoṅ se legā. kyūṅki maiṅ ne apnā muāmalā tere hī sapurd kar diyā hai.

¹³rab kī madahsarāī karo! rab kī tamjīd karo! kyūṅki us ne zarūratmand kī jān ko sharīroṅ ke hāth se bachā liyā hai.

¹⁴us din par lānat jab maiṅ paidā huā! wuh din mubārak na ho jab merī māṅ ne mujhe janm diyā.

¹⁵us ādmī par lānat jis ne mere bāp ko baṛī ḳhushī dilā kar ittilā dī ki tere beṭā paidā huā hai!

¹⁶wuh un shahroṅ kī mānind ho jin ko rab ne berahmī se ḳhāk meṅ milā diyā. allāh kare ki subh ke waqt use chīḳheṅ sunāī deṅ aur dopahar ke waqt jang ke nāre.

¹⁷kyūṅki use mujhe usī waqt mār ḍālnā chāhie thā jab maiṅ abhī māṅ ke peṭ meṅ thā. phir merī māṅ merī qabr ban jātī, us kā pāoṅ hameshā tak bhārī rahtā.

¹⁸maiṅ kyūṅ māṅ ke peṭ meṅ se niklā? kyā sirf is lie ki musībat aur ġham dekhūṅ aur zindagī ke iḳhtitām tak ruswāī kī zindagī guzārūṅ?