Read Roman Urdu Geo yarmiyāh 25 Bible Online

yarmiyāh 25 - Roman Urdu Geo bible

yarmiyāh 25

¹yahūyaqīm bin yūsiyāh kī hukūmat ke chauthe sāl meṅ allāh kā kalām yarmiyāh par nāzil huā. usī sāl bābal kā bādshāh nabūkadnazzar taḳhtnashīn huā thā. yih kalām yahūdāh ke tamām bāshindoṅ ke bāre meṅ thā.

²chunāṅche yarmiyāh nabī ne yarūshalam ke tamām bāshindoṅ aur yahūdāh kī pūrī qaum se muḳhātib ho kar kahā,

³“23 sāl se rab kā kalām mujh par nāzil hotā rahā hai yānī yūsiyāh bin amūn kī hukūmat ke terhweṅ sāl se le kar āj tak. bār bār maiṅ tumheṅ paiġhāmāt sunātā rahā hūṅ, lekin tum ne dhyān nahīṅ diyā.

⁴mere ilāwā rab dīgar tamām nabiyoṅ ko bhī bār bār tumhāre pās bhejtā rahā, lekin tum ne na sunā, na tawajjuh dī,

⁵go mere ḳhādim tumheṅ bār bār āgāh karte rahe, ‘taubā karo! har ek apnī ġhalat rāhoṅ aur burī harkatoṅ se bāz ā kar wāpas āe. phir tum hameshā tak us mulk meṅ rahoge jo rab ne tumheṅ aur tumhāre bāpdādā ko atā kiyā thā.

⁶ajnabī mābūdoṅ kī pairawī karke un kī ḳhidmat aur pūjā mat karnā! apne hāthoṅ ke banāe hue butoṅ se mujhe taish na dilānā, warnā maiṅ tumheṅ nuqsān pahuṅchāūṅgā’.”

⁷rab farmātā hai, “afsos! tum ne merī na sunī balki mujhe apne hāthoṅ ke banāe hue butoṅ se ġhussā dilā kar apne āp ko nuqsān pahuṅchāyā.”

⁸rabb-ul-afwāj farmātā hai, “chūṅki tum ne mere paiġhāmāt par dhyān na diyā,

⁹is lie maiṅ shimāl kī tamām qaumoṅ aur apne ḳhādim bābal ke bādshāh nabūkadnazzar ko bulā lūṅgā tāki wuh is mulk, is ke bāshindoṅ aur gird-o-nawāh ke mamālik par hamlā kareṅ. tab yih safhā-e-hastī se yūṅ miṭ jāeṅge ki logoṅ ke roṅgṭe khaṛe ho jāeṅge aur wuh un kā mazāq uṛāeṅge. yih ilāqe dāimī khanḍarāt ban jāeṅge.

¹⁰maiṅ un ke darmiyān ḳhushī-o-shādmānī aur dūlhe dulhan kī āwāzeṅ band kar dūṅgā. chakkiyāṅ ḳhāmosh paṛ jāeṅgī aur charāġh bujh jāeṅge.

¹¹pūrā mulk wīrān-o-sunsān ho jāegā, chāroṅ taraf malbe ke ḍher nazar āeṅge. tab tum aur irdgird kī qaumeṅ 70 sāl tak shāh-e-bābal kī ḳhidmat karoge.

¹²lekin 70 sāl ke bād maiṅ shāh-e-bābal aur us kī qaum ko munāsib sazā dūṅgā. maiṅ mulk-e-bābal ko yūṅ barbād karūṅga ki wuh hameshā tak wīrān-o-sunsān rahegā.

¹³us waqt maiṅ us mulk par sab kuchh nāzil karūṅga jo maiṅ ne us ke bāre meṅ farmāyā hai, sab kuchh pūrā ho jāegā jo is kitāb meṅ darj hai aur jis kī peshgoī yarmiyāh ne tamām aqwām ke bāre meṅ kī hai.

¹⁴us waqt unheṅ bhī muta'addid qaumoṅ aur baṛe baṛe bādshāhoṅ kī ḳhidmat karnī paṛegī. yūṅ maiṅ unheṅ un kī harkatoṅ aur āmāl kā munāsib ajr dūṅgā.”

¹⁵rab jo isrāīl kā ḳhudā hai mujh se hamkalām huā, “dekh, mere hāth meṅ mere ġhazab se bharā huā pyālā hai. ise le kar un tamām qaumoṅ ko pilā de jin ke pās maiṅ tujhe bhejtā hūṅ.

¹⁶jo bhī qaum yih pie wuh merī talwār ke āge ḍagmagātī huī dīwānā ho jāegī.”

¹⁷chunāṅche maiṅ ne rab ke hāth se pyālā le kar use un tamām aqwām ko pilā diyā jin ke pās rab ne mujhe bhejā.

¹⁸pahle yarūshalam aur yahūdāh ke shahroṅ ko un ke bādshāhoṅ aur buzurgoṅ samet ġhazab kā pyālā pīnā paṛā. tab mulk malbe kā ḍher ban gayā jise dekh kar logoṅ ke roṅgṭe khaṛe ho gae. āj tak wuh mazāq aur lānat kā nishānā hai.

¹⁹phir yake bād dīgare muta'addid qaumoṅ ko ġhazab kā pyālā pīnā paṛā. zail meṅ un kī fahrist hai: misr kā bādshāh fir'aun, us ke darbārī, afsar, pūrī misrī qaum

²⁰aur mulk meṅ basne wāle ġhairmulkī, mulk-e-ūz ke tamām bādshāh, filistī bādshāh aur un ke shahr askqalūn, ġhazzā aur aqrūn, nīz filistī shahr ashdūd kā bachā-khuchā hissā,

²¹adom, moāb aur ammon,

²²sūr aur saidā ke tamām bādshāh, bahīrā-e-rūm ke sāhilī ilāqe,

²³dadān, taimā aur būz ke shahr, wuh qaumeṅ jo registān ke kināre kināre rahtī haiṅ,

²⁴mulk-e-arab ke tamām bādshāh, registān meṅ mil kar basne wāle ġhairmulkiyoṅ ke bādshāh,

²⁵zimrī, ailām aur mādī ke tamām bādshāh,

²⁶shimāl ke dūr-o-nazdīk ke tamām bādshāh. yake bād dīgare duniyā ke tamām mamālik ko ġhazab kā pyālā pīnā paṛā. āḳhir meṅ sheshak ke bādshāh [10] ko bhī yih pyālā pīnā paṛā.

²⁷phir rab ne kahā, “unheṅ batā, ‘rabb-ul-afwāj jo isrāīl kā ḳhudā hai farmātā hai ki ġhazab kā pyālā ḳhūb piyo! itnā piyo ki nashe meṅ ā kar qai āne lage. us waqt tak pīte jāo jab tak tum merī talwār ke āge gir kar paṛe na raho.’

²⁸agar wuh tere hāth se pyālā na leṅ balki use pīne se inkār kareṅ to unheṅ batā, ‘rabb-ul-afwāj ḳhud farmātā hai ki piyo!

²⁹dekho, jis shahr par mere nām kā ṭhappā lagā hai usī par maiṅ āfat lāne lagā hūṅ. agar maiṅ ne usī se shurū kiyā to phir tum kis tarah bache rahoge? yaqīnan tumheṅ sazā milegī, kyūṅki maiṅ ne tai kar liyā hai ki duniyā ke tamām bāshinde talwār kī zad meṅ ā jāeṅ’.” yih rabb-ul-afwāj kā farmān hai.

³⁰“ai yarmiyāh, unheṅ yih tamām peshgoiyāṅ sunā kar batā ki rab bulandiyoṅ se dahāṛegā. us kī muqaddas sukūnatgāh se us kī kaṛaktī āwāz niklegī, wuh zor se apnī charāgāh ke ḳhilāf garjegā. jis tarah angūr kā ras nikālne wāle angūr ko raundte waqt zor se nāre lagāte haiṅ usī tarah wuh nāre lagāegā, albattā jang ke nāre. kyūṅki wuh duniyā ke tamām bāshindoṅ ke ḳhilāf jang ke nāre lagāegā.

³¹us kā shor duniyā kī intihā tak gūṅjegā, kyūṅki rab adālat meṅ aqwām se muqaddamā laṛegā, wuh tamām insānoṅ kā insāf karke sharīroṅ ko talwār ke hawāle kar degā.” yih rab kā farmān hai.

³²rabb-ul-afwāj farmātā hai, “dekho, yake bād dīgare tamām qaumoṅ par āfat nāzil ho rahī hai, zamīn kī intihā se zabardast tūfān ā rahā hai.

³³us waqt rab ke māre hue logoṅ kī lāsheṅ duniyā ke ek sire se dūsre sire tak paṛī raheṅgī. na koī un par mātam karegā, na unheṅ uṭhā kar dafn karegā. wuh khet meṅ bikhre gobar kī tarah zamīn par paṛī raheṅgī.

³⁴ai gallābāno, wāwailā karo! ai rewaṛ ke rāhnumāo, rākh meṅ loṭ-poṭ ho jāo! kyūṅki waqt ā gayā hai ki tumheṅ zabah kiyā jāe. tum gir kar nāzuk bartan kī tarah pāsh pāsh ho jāoge.

³⁵gallābān kahīṅ bhī bhāg kar panāh nahīṅ le sakeṅge, rewaṛ ke rāhnumā bach hī nahīṅ sakeṅge.

³⁶suno! gallābānoṅ kī chīḳheṅ aur rewaṛ ke rāhnumāoṅ kī āheṅ! kyūṅki rab un kī charāgāh ko tabāh kar rahā hai.

³⁷pursukūn murġhzāroṅ kā satyānās hogā jab rab kā saḳht ġhazab nāzil hogā,

³⁸jab rab jawān sherbabar kī tarah apnī chhupne kī jagah se nikal kar logoṅ par ṭūṭ paṛegā. tab zālim kī tez talwār aur rab kā shadīd qahr un kā mulk tabāh karegā.”