Read Roman Urdu Geo yarmiyāh 31 Bible Online

yarmiyāh 31 - Roman Urdu Geo bible

yarmiyāh 31

¹rab farmātā hai, “us waqt maiṅ tamām isrāīlī gharānoṅ kā ḳhudā hūṅgā, aur wuh merī qaum hoṅge.”

²rab farmātā hai, “talwār se bache hue logoṅ ko registān meṅ hī merā fazl hāsil huā hai, aur isrāīl apnī ārāmgāh ke pās pahuṅch rahā hai.”

³rab ne dūr se isrāīl par zāhir ho kar farmāyā, “maiṅ ne tujhe hameshā hī pyār kiyā hai, is lie maiṅ tujhe baṛī shafqat se apne pās khaiṅch lāyā hūṅ.

⁴ai kuṅwārī isrāīl, terī nae sire se tāmīr ho jāegī, kyūṅki maiṅ ḳhud tujhe tāmīr karūṅga. tū dubārā apne dafoṅ se ārāstā ho kar ḳhushī manāne wāloṅ ke loknāch ke lie niklegī.

⁵tū dubārā sāmariyya kī pahāṛiyoṅ par angūr ke bāġh lagāegī. aur jo paudoṅ ko lagāeṅge wuh ḳhud un ke phal se lutfandoz hoṅge.

⁶kyūṅki wuh din āne wālā hai jab ifrāīm ke pahāṛī ilāqe ke pahredār āwāz de kar kaheṅge, ‘āo ham siyyūn ke pās jāeṅ tāki rab apne ḳhudā ko sijdā kareṅ’.”

⁷kyūṅki rab farmātā hai, “yāqūb ko dekh kar ḳhushī manāo! qaumoṅ ke sarbarāh ko dekh kar shādmānī kā nārā māro! buland āwāz se allāh kī hamd-o-sanā karke kaho, ‘ai rab, apnī qaum ko bachā, isrāīl ke bache hue hisse ko chhuṭkārā de.’

⁸kyūṅki maiṅ unheṅ shimālī mulk se wāpas lāūṅgā, unheṅ duniyā kī intihā se jamā karūṅga. andhe aur langaṛe un meṅ shāmil hoṅge, hāmilā aur janm dene wālī aurateṅ bhī sāth chaleṅgī. un kā baṛā hujūm wāpas āegā.

⁹aur jab maiṅ unheṅ wāpas lāūṅgā to wuh rote hue aur iltijāeṅ karte hue mere pīchhe chaleṅge. maiṅ unheṅ nadiyoṅ ke kināre kināre aur aise hamwār rāstoṅ par wāpas le chalūṅgā, jahāṅ ṭhokar khāne kā ḳhatrā nahīṅ hogā. kyūṅki maiṅ isrāīl kā bāp hūṅ, aur ifrāīm [17] merā pahlauṭhā hai.

¹⁰ai qaumo, rab kā kalām suno! dūrdarāz jazīroṅ tak elān karo, ‘jis ne isrāīl ko muntashir kar diyā hai wuh use dubārā jamā karegā aur charwāhe kī sī fikr rakh kar us kī gallābānī karegā.’

¹¹kyūṅki rab ne fidyā de kar yāqūb ko bachāyā hai, us ne iwazānā de kar use zor-āwar ke hāth se chhuṛāyā hai.

¹²tab wuh ā kar siyyūn kī bulandī par ḳhushī ke nāre lagāeṅge, un ke chehre rab kī barkatoṅ ko dekh kar chamak uṭheṅge. kyūṅki us waqt wuh unheṅ anāj, naī mai, zaitūn ke tel aur jawān bheṛ-bakriyoṅ aur gāy-bailoṅ kī kasrat se nawāzegā. un kī jān serāb bāġh kī tarah sarsabz hogī, aur un kī niḍhāl hālat saṅbhal jāegī.

¹³phir kuṅwāriyāṅ ḳhushī ke māre loknāch nācheṅgī, jawān aur buzurg ādmī bhī us meṅ hissā leṅge. yūṅ maiṅ un kā mātam ḳhushī meṅ badal dūṅgā, maiṅ un ke diloṅ se ġham nikāl kar unheṅ apnī tasallī aur shādmānī se bhar dūṅgā.”

¹⁴rab farmātā hai, “maiṅ imāmoṅ kī jān ko tar-o-tāzā karūṅga, aur merī qaum merī barkatoṅ se ser ho jāegī.”

¹⁵rab farmātā hai, “rāmā meṅ shor mach gayā hai, rone pīṭne aur shadīd mātam kī āwāzeṅ. rāḳhil apne bachchoṅ ke lie ro rahī hai aur tasallī qabūl nahīṅ kar rahī, kyūṅki wuh halāk ho gae haiṅ.”

¹⁶lekin rab farmātā hai, “rone aur āṅsū bahāne se bāz ā, kyūṅki tujhe apnī mehnat kā ajr milegā. yih rab kā wādā hai ki wuh dushman ke mulk se lauṭ āeṅge.

¹⁷terā mustaqbil purummīd hogā, kyūṅki tere bachche apne watan meṅ wāpas āeṅge.” yih rab kā farmān hai.

¹⁸“isrāīl [18] kī giryā-o-zārī mujh tak pahuṅch gaī hai. kyūṅki wuh kahtā hai, ‘hāy, tū ne merī saḳht tādīb kī hai. merī yūṅ tarbiyat huī hai jis tarah bachhṛe kī hotī hai jab us kī gardan par pahlī bār jūā rakhā jātā hai. ai rab, mujhe wāpas lā tāki maiṅ wāpas āūṅ, kyūṅki tū hī rab merā ḳhudā hai.

¹⁹mere wāpas āne par mujhe nadāmat mahsūs huī, aur samajh āne par maiṅ apnā sīnā pīṭne lagā. mujhe sharmindagī aur ruswāī kā shadīd ehsās ho rahā hai, kyūṅki ab maiṅ apnī jawānī ke sharmnāk phal kī fasal kāṭ rahā hūṅ.’

²⁰lekin rab farmātā hai ki isrāīl merā qīmtī beṭā, merā lāḍlā hai. go maiṅ bār bār us ke ḳhilāf bāteṅ kartā hūṅ to bhī use yād kartā rahtā hūṅ. is lie merā dil us ke lie taṛaptā hai, aur lāzim hai ki maiṅ us par tars khāūṅ.

²¹ai merī qaum, aise nishān khaṛe kar jin se logoṅ ko sahīh rāste kā patā chale! us pakkī saṛak par dhyān de jis par tū ne safar kiyā hai. ai kuṅwārī isrāīl, wāpas ā, apne in shahroṅ meṅ lauṭ ā!

²²ai bewafā beṭī, tū kab tak bhaṭaktī phiregī? rab ne mulk meṅ ek naī chīz paidā kī hai, yih ki āindā aurat ādmī ke gird rahegī.”

²³rabb-ul-afwāj jo isrāīl kā ḳhudā hai farmātā hai, “jab maiṅ isrāīliyoṅ ko bahāl karūṅga to mulk-e-yahūdāh aur us ke shahroṅ ke bāshinde dubārā kaheṅge, ‘ai rāstī ke ghar, ai muqaddas pahāṛ, rab tujhe barkat de!’

²⁴tab yahūdāh aur us ke shahr dubārā ābād hoṅge. kisān bhī mulk meṅ baseṅge, aur wuh bhī jo apne rewaṛoṅ ke sāth idhar udhar phirte haiṅ.

²⁵kyūṅki maiṅ thakemāndoṅ ko naī tāqat dūṅgā aur ġhash khāne wāloṅ ko tar-o-tāzā karūṅga.”

²⁶tab maiṅ jāg uṭhā aur chāroṅ taraf dekhā. merī nīnd kitnī mīṭhī rahī thī!

²⁷rab farmātā hai, “wuh waqt āne wālā hai jab maiṅ isrāīl ke gharāne aur yahūdāh ke gharāne kā bīj bo kar insān-o-haiwān kī tādād baṛhā dūṅgā.

²⁸pahle maiṅ ne baṛe dhyān se unheṅ jaṛ se ukhāṛ diyā, girā diyā, ḍhā diyā, hāṅ tabāh karke ḳhāk meṅ milā diyā. lekin āindā maiṅ utne hī dhyān se unheṅ tāmīr karūṅga, unheṅ panīrī kī tarah lagā dūṅgā.” yih rab kā farmān hai.

²⁹“us waqt log yih kahne se bāz āeṅge ki wālidain ne khaṭṭe angūr khāe, lekin dāṅt un ke bachchoṅ ke khaṭṭe ho gae haiṅ.

³⁰kyūṅki ab se khaṭṭe angūr khāne wāle ke apne hī dāṅt khaṭṭe hoṅge. ab se usī ko sazā-e-maut dī jāegī jo qusūrwār hai.”

³¹rab farmātā hai, “aise din ā rahe haiṅ jab maiṅ isrāīl ke gharāne aur yahūdāh ke gharāne ke sāth ek nayā ahd bāndhūṅgā.

³²yih us ahd kī mānind nahīṅ hogā jo maiṅ ne un ke bāpdādā ke sāth us din bāndhā thā jab maiṅ un kā hāth pakaṛ kar unheṅ misr se nikāl lāyā. kyūṅki unhoṅ ne wuh ahd toṛ diyā, go maiṅ un kā mālik thā.” yih rab kā farmān hai.

³³“jo nayā ahd maiṅ un dinoṅ ke bād isrāīl ke gharāne ke sāth bāndhūṅgā us ke taht maiṅ apnī sharīat un ke andar ḍāl kar un ke diloṅ par kandā karūṅga. tab maiṅ hī un kā ḳhudā hūṅgā, aur wuh merī qaum hoṅge.

³⁴us waqt se is kī zarūrat nahīṅ rahegī ki koī apne paṛosī yā bhāī ko tālīm de kar kahe, ‘rab ko jān lo.’ kyūṅki chhoṭe se le kar baṛe tak sab mujhe jāneṅge. kyūṅki maiṅ un kā qusūr muāf karūṅga aur āindā un ke gunāhoṅ ko yād nahīṅ karūṅga.” yih rab kā farmān hai.

³⁵rab farmātā hai, “maiṅ hī ne muqarrar kiyā hai ki din ke waqt sūraj chamke aur rāt ke waqt chāṅd sitāroṅ samet raushnī de. maiṅ hī samundar ko yūṅ uchhāl detā hūṅ ki us kī maujeṅ garajne lagtī haiṅ. rabb-ul-afwāj hī merā nām hai.”

³⁶rab farmātā hai, “jab tak yih qudratī usūl mere sāmne qāim raheṅge us waqt tak isrāīl qaum mere sāmne qāim rahegī.

³⁷kyā insān āsmān kī paimāish kar saktā hai? yā kyā wuh zamīn kī bunyādoṅ kī taftīsh kar saktā hai? hargiz nahīṅ! isī tarah yih mumkin hī nahīṅ ki maiṅ isrāīl kī pūrī qaum ko us ke gunāhoṅ ke sabab se radd karūṅ.” yih rab kā farmān hai.

³⁸rab farmātā hai, “wuh waqt āne wālā hai jab yarūshalam ko rab ke lie nae sire se tāmīr kiyā jāegā. tab us kī fasīl hanan-el ke burj se le kar kone ke darwāze tak tayyār ho jāegī.

³⁹wahāṅ se shahr kī sarhad sīdhī jarīb pahāṛī tak pahuṅchegī, phir joā kī taraf muṛegī.

⁴⁰us waqt jo wādī lāshoṅ aur bhasm huī charbī kī rākh se nāpāk huī hai wuh pūre taur par rab ke lie maḳhsūs-o-muqaddas hogī. us kī ḍhalānoṅ par ke tamām khet bhī wādī-e-qidron tak shāmil hoṅge, balki mashriq meṅ ghoṛe ke darwāze ke kone tak sab kuchh muqaddas hogā. āindā shahr ko na kabhī dubārā jaṛ se ukhāṛā jāegā, na tabāh kiyā jāegā.”