Read Roman Urdu Geo yarmiyāh 35 Bible Online

yarmiyāh 35 - Roman Urdu Geo bible

yarmiyāh 35

¹jab yahūyaqīm bin yūsiyāh abhī yahūdāh kā bādshāh thā to rab mujh se hamkalām huā,

²“raikābī ḳhāndān ke pās jā kar unheṅ rab ke ghar ke sahan ke kisī kamre meṅ āne kī dāwat de. jab wuh āeṅ to unheṅ mai pilā de.”

³chunāṅche maiṅ yāzaniyāh bin yarmiyāh bin habassiniyāh ke pās gayā aur use us ke bhāiyoṅ aur tamām beṭoṅ yānī raikābiyoṅ ke pūre gharāne samet

⁴rab ke ghar meṅ lāyā. ham hanān ke beṭoṅ ke kamre meṅ baiṭh gae. hanān mard-e-ḳhudā yijdaliyāh kā beṭā thā. yih kamrā buzurgoṅ ke kamre se mulhiq aur rab ke ghar ke darbān māsiyāh bin sallūm ke kamre ke ūpar thā.

⁵wahāṅ maiṅ ne mai ke jām aur pyāle raikābī ādmiyoṅ ko pesh karke un se kahā, “āeṅ, kuchh mai pī leṅ.”

⁶lekin unhoṅ ne inkār karke kahā, “ham mai nahīṅ pīte, kyūṅki hamāre bāp yūnadab bin raikāb ne hameṅ aur hamārī aulād ko mai pīne se manā kiyā hai.

⁷us ne hameṅ yih hidāyat bhī dī, ‘na makān tāmīr karnā, na bīj bonā aur na angūr kā bāġh lagānā. yih chīzeṅ kabhī bhī tumhārī milkiyat meṅ shāmil na hoṅ, kyūṅki lāzim hai ki tum hameshā ḳhaimoṅ meṅ zindagī guzāro. phir tum lambe arse tak us mulk meṅ rahoge jis meṅ tum mehmān ho.’

⁸chunāṅche ham apne bāp yūnadab bin raikāb kī in tamām hidāyāt ke tābe rahte haiṅ. na ham aur na hamārī bīwiyāṅ yā bachche kabhī mai pīte haiṅ.

⁹ham apnī rihāish ke lie makān nahīṅ banāte, aur na angūr ke bāġh, na khet yā fasleṅ hamārī milkiyat meṅ hotī haiṅ.

¹⁰is ke bajāe ham āj tak ḳhaimoṅ meṅ rahte haiṅ. jo bhī hidāyat hamāre bāp yūnadab ne hameṅ dī us par ham pūre utre haiṅ.

¹¹ham sirf ārizī taur par shahr meṅ ṭhahre hue haiṅ. kyūṅki jab shāh-e-bābal nabūkadnazzar is mulk meṅ ghus āyā to ham bole, ‘āeṅ, ham yarūshalam shahr meṅ jāeṅ tāki bābal aur shām kī faujoṅ se bach jāeṅ.’ ham sirf isī lie yarūshalam meṅ ṭhahre hue haiṅ.”

¹²tab rab kā kalām mujh par nāzil huā,

¹³“rabb-ul-afwāj jo isrāīl kā ḳhudā hai farmātā hai ki yahūdāh aur yarūshalam ke bāshindoṅ ke pās jā kar kah, ‘tum merī tarbiyat kyūṅ qabūl nahīṅ karte? tum merī kyūṅ nahīṅ sunte?

¹⁴yūnadab bin raikāb par ġhaur karo. us ne apnī aulād ko mai pīne se manā kiyā, is lie us kā gharānā āj tak mai nahīṅ pītā. yih log apne bāp kī hidāyāt ke tābe rahte haiṅ. is ke muqābale meṅ tum log kyā kar rahe ho? go maiṅ bār bār tum se hamkalām huā to bhī tum ne merī nahīṅ sunī.

¹⁵bār bār maiṅ apne nabiyoṅ ko tumhāre pās bhejtā rahā tāki mere ḳhādim tumheṅ āgāh karte raheṅ ki har ek apnī burī rāh tark karke wāpas āe! apnā chāl-chalan durust karo aur ajnabī mābūdoṅ kī pairawī karke un kī ḳhidmat mat karo! phir tum us mulk meṅ rahoge jo maiṅ ne tumheṅ aur tumhāre bāpdādā ko baḳhsh diyā thā. lekin tum ne na tawajjuh dī, na merī sunī.

¹⁶yūnadab bin raikāb kī aulād apne bāp kī hidāyāt par pūrī utrī hai, lekin is qaum ne merī nahīṅ sunī.’

¹⁷is lie rab jo lashkaroṅ kā aur isrāīl kā ḳhudā hai farmātā hai, ‘suno! maiṅ yahūdāh par aur yarūshalam ke har bāshinde par wuh tamām āfat nāzil karūṅga jis kā elān maiṅ ne kiyā hai. go maiṅ un se hamkalām huā to bhī unhoṅ ne na sunī. maiṅ ne unheṅ bulāyā, lekin unhoṅ ne jawāb na diyā’.”

¹⁸lekin raikābiyoṅ se yarmiyāh ne kahā, “rabb-ul-afwāj jo isrāīl kā ḳhudā hai farmātā hai, ‘tum apne bāp yūnadab ke hukm par pūre utar kar us kī har hidāyat aur har hukm par amal karte ho.’

¹⁹is lie rabb-ul-afwāj jo isrāīl kā ḳhudā hai farmātā hai, ‘yūnadab bin raikāb kī aulād meṅ se hameshā koī na koī hogā jo mere huzūr ḳhidmat karegā’.”