Read Roman Urdu Geo yarmiyāh 41 Bible Online

yarmiyāh 41 - Roman Urdu Geo bible

yarmiyāh 41

¹ismāīl bin nataniyāh bin ilīsamā shāhī nasl kā thā aur pahle shāh-e-yahūdāh kā ālā afsar thā. sātweṅ mahīne [27] meṅ wuh das ādmiyoṅ ko apne sāth le kar misfāh meṅ jidaliyāh se milne āyā. jab wuh mil kar khānā khā rahe the

²to ismāīl aur us ke das ādmī achānak uṭhe aur apnī talwāroṅ ko khaiṅch kar jidaliyāh ko mār ḍālā. yūṅ ismāīl ne us ādmī ko qatl kiyā jise bābal ke bādshāh ne sūbā yahūdāh par muqarrar kiyā thā.

³us ne misfāh meṅ jidaliyāh ke sāth rahne wāle tamām hamwatanoṅ ko bhī qatl kiyā aur wahāṅ ṭhaharne wāle bābal ke faujiyoṅ ko bhī.

⁴agle din jab kisī ko mālūm nahīṅ thā ki jidaliyāh ko qatl kiyā gayā hai

⁵to 80 ādmī wahāṅ pahuṅche jo sikam, sailā aur sāmariyya se ā kar rab ke tabāhshudā ghar meṅ us kī parastish karne jā rahe the. un ke pās ġhallā aur baḳhūr kī qurbāniyāṅ thīṅ, aur unhoṅ ne ġham ke māre apnī dāṛhiyāṅ munḍwā kar apne kapṛe phāṛ lie aur apnī jild ko zaḳhmī kar diyā thā.

⁶ismāīl rote rote misfāh se nikal kar un se milne āyā. jab wuh un ke pās pahuṅchā to kahne lagā, “jidaliyāh bin aḳhīqām ke pās āo aur dekho ki kyā huā hai!”

⁷jūṅ hī wuh shahr meṅ dāḳhil hue to ismāīl aur us ke sāthiyoṅ ne unheṅ qatl karke ek hauz meṅ phaiṅk diyā.

⁸sirf das ādmī bach gae jab unhoṅ ne ismāīl se kahā, “hameṅ mat qatl karnā, kyūṅki hamāre pās gandum, jau aur shahd ke zaḳhīre haiṅ jo ham ne khule maidān meṅ kahīṅ chhupā rakhe haiṅ.” yih sun kar us ne unheṅ dūsroṅ kī tarah na mārā balki zindā chhoṛā.

⁹jis hauz meṅ ismāīl ne mazkūrā ādmiyoṅ kī lāsheṅ phaiṅk dīṅ wuh bahut baṛā thā. yahūdāh ke bādshāh āsā ne use us waqt banwāyā thā jab isrāīlī bādshāh bāshā se jang thī aur wuh misfāh ko mazbūt banā rahā thā. ismāīl ne isī hauz ko maqtūloṅ se bhar diyā thā.

¹⁰misfāh ke bāqī logoṅ ko us ne qaidī banā liyā. un meṅ yahūdāh ke bādshāh kī beṭiyāṅ aur bāqī wuh tamām log shāmil the jin par shāhī muhāfizoṅ ke sardār nabūzarādān ne jidaliyāh bin aḳhīqām ko muqarrar kiyā thā. phir ismāīl un sab ko apne sāth le kar mulk-e-ammon ke lie rawānā huā.

¹¹lekin yūhanān bin qarīh aur us ke sāthī afsaroṅ ko ittilā dī gaī ki ismāīl se kyā jurm huā hai.

¹²tab wuh apne tamām faujiyoṅ ko jamā karke ismāīl se laṛne ke lie nikle aur us kā tāqqub karte karte use jibaūn ke johaṛ ke pās jā liyā.

¹³jūṅ hī ismāīl ke qaidiyoṅ ne yūhanān aur us ke afsaroṅ ko dekhā to wuh ḳhush hue.

¹⁴sab ne ismāīl ko chhoṛ diyā aur muṛ kar yūhanān ke pās bhāg āe.

¹⁵ismāīl āṭh sāthiyoṅ samet farār huā aur yūhanān ke hāth se bach kar mulk-e-ammon meṅ chalā gayā.

¹⁶yūṅ misfāh ke bache hue tamām log jibaūn meṅ yūhanān aur us ke sāthī afsaroṅ ke zer-e-nigarānī āe. un meṅ wuh tamām faujī, ḳhawātīn, bachche aur darbārī shāmil the jinheṅ ismāīl ne jidaliyāh ko qatl karne ke bād qaidī banāyā thā.

¹⁷lekin wuh misfāh wāpas na gae balki āge chalte chalte bait-laham ke qarīb ke gāoṅ banām sarāy-kimhām meṅ ruk gae. wahāṅ wuh misr ke lie rawānā hone kī tayyāriyāṅ karne lage,

¹⁸kyūṅki wuh bābal ke intiqām se ḍarte the, is lie ki jidaliyāh bin aḳhīqām ko qatl karne se ismāīl bin nataniyāh ne us ādmī ko maut ke ghāṭ utārā thā jise shāh-e-bābal ne yahūdāh kā gawarnar muqarrar kiyā thā.