Read Roman Urdu Geo yarmiyāh 46 Bible Online

yarmiyāh 46 - Roman Urdu Geo bible

yarmiyāh 46

¹yarmiyāh par muḳhtalif qaumoṅ ke bāre meṅ bhī paiġhāmāt nāzil hue. yih zail meṅ darj haiṅ.

²pahlā paiġhām misr ke bāre meṅ hai. yahūdāh ke bādshāh yahūyaqīm bin yūsiyāh ke chauthe sāl meṅ shāh-e-bābal nabūkadnazzar ne daryā-e-furāt par wāqe shahr karkimīs ke pās misrī fauj ko shikast dī thī. un dinoṅ meṅ misrī bādshāh nikoh fir'aun kī fauj ke bāre meṅ rab kā kalām nāzil huā,

³“apnī baṛī aur chhoṭī ḍhāleṅ tayyār karke jang ke lie niklo!

⁴ghoṛoṅ ko rathoṅ meṅ joto! dīgar ghoṛoṅ par sawār ho jāo! ḳhod pahan kar khaṛe ho jāo! apne nezoṅ ko rauġhan se chamkā kar zirābaktar pahan lo!

⁵lekin mujhe kyā nazar ā rahā hai? misrī faujiyoṅ par dahshat tārī huī hai. wuh pīchhe haṭ rahe haiṅ, un ke sūrmāoṅ ne hathiyār ḍāl die haiṅ. wuh bhāg bhāg kar farār ho rahe haiṅ aur pīchhe bhī nahīṅ deḳhte. rab farmātā hai ki chāroṅ taraf dahshat hī dahshat phail gaī hai.

⁶kisī ko bhī bachne na do, ḳhwāh wuh kitnī tezī se kyūṅ na bhāg rahā ho yā kitnā zabardast faujī kyūṅ na ho. shimāl meṅ daryā-e-furāt ke kināre hī wuh ṭhokar khā kar gir gae haiṅ.

⁷yih kyā hai jo daryā-e-nīl kī tarah chaṛh rahā hai, jo sailāb ban kar sab kuchh ġharq kar rahā hai?

⁸misr daryā-e-nīl kī tarah chaṛh rahā hai, wuhī sailāb ban kar sab kuchh ġharq kar rahā hai. wuh kahtā hai, ‘maiṅ chaṛh kar pūrī zamīn ko ġharq kar dūṅgā. maiṅ shahroṅ ko un ke bāshindoṅ samet tabāh karūṅga.’

⁹ai ghoṛo, dushman par ṭūṭ paṛo! ai ratho, dīwānoṅ kī tarah dauṛo! ai faujiyo, laṛne ke lie niklo! ai ethūpiyā aur libiyā ke sipāhiyo, apnī ḍhāleṅ pakaṛ kar chalo, ai ludiyā ke tīr chalāne wālo, apne kamān tān kar āge baṛho!

¹⁰lekin āj qādir-e-mutlaq, rabb-ul-afwāj kā hī din hai. intiqām ke is din wuh apne dushmanoṅ se badlā legā. us kī talwār unheṅ khā khā kar ser ho jāegī, aur un kā ḳhūn pī pī kar us kī pyās bujhegī. kyūṅki shimāl meṅ daryā-e-furāt ke kināre unheṅ qādir-e-mutlaq, rabb-ul-afwāj ko qurbān kiyā jāegā.

¹¹ai kuṅwārī misr beṭī, mulk-e-jiliād meṅ jā kar apne zaḳhmoṅ ke lie balsān ḳharīd le. lekin kyā fāidā? ḳhwāh tū kitnī dawāī kyūṅ na istemāl kare terī choṭeṅ bhar hī nahīṅ saktīṅ!

¹²terī sharmindagī kī ḳhabar dīgar aqwām meṅ phail gaī hai, terī chīḳheṅ pūrī duniyā meṅ gūṅj rahī haiṅ. kyūṅki tere sūrme ek dūsre se ṭhokar khā kar gir gae haiṅ.”

¹³jab shāh-e-bābal nabūkadnazzar misr par hamlā karne āyā to rab is ke bāre meṅ yarmiyāh se hamkalām huā,

¹⁴“misrī shahroṅ mijdāl, memfis aur tahfanhīs meṅ elān karo, ‘jang kī tayyāriyāṅ karke laṛne ke lie khaṛe ho jāo! kyūṅki talwār tumhāre ās-pās sab kuchh khā rahī hai.’

¹⁵ai misr, tere sūrmāoṅ ko ḳhāk meṅ kyūṅ milāyā gayā hai? wuh khaṛe nahīṅ rah sakte, kyūṅki rab ne unheṅ dabā diyā hai.

¹⁶us ne muta'addid afrād ko ṭhokar khāne diyā, aur wuh ek dūsre par gir gae. unhoṅ ne kahā, ‘āo, ham apnī hī qaum aur apne watan meṅ wāpas chale jāeṅ jahāṅ zālim kī talwār ham tak nahīṅ pahuṅch saktī.’

¹⁷wahāṅ wuh pukār uṭhe, ‘misr kā bādshāh shor to bahut machātā hai lekin is ke pīchhe kuchh bhī nahīṅ. jo sunahrā mauqā use milā wuh jātā rahā hai’.”

¹⁸duniyā kā bādshāh jis kā nām rabb-ul-afwāj hai farmātā hai, “merī hayāt kī qasam, jo tum par hamlā karne ā rahā hai wuh dūsroṅ se utnā baṛā hai jitnā tabūr dīgar pahāṛoṅ se aur karmil samundar se ūṅchā hai.

¹⁹ai misr ke bāshindo, apnā māl-o-asbāb bāndh kar jilāwatan hone kī tayyāriyāṅ karo. kyūṅki memfis mismār ho kar nazar-e-ātish ho jāegā. us meṅ koī nahīṅ rahegā.

²⁰misr ḳhūbsūrat sī jawān gāy hai, lekin shimāl se mohlak makkhī ā kar us par dhāwā bol rahī hai. hāṅ, wuh ā rahī hai.

²¹misrī fauj ke bhāṛe ke faujī moṭe-tāze bachhṛe haiṅ, lekin wuh bhī muṛ kar farār ho jāeṅge. ek bhī qāim nahīṅ rahegā. kyūṅki āfat kā din un par āne wālā hai, wuh waqt jab unheṅ pūrī sazā milegī.

²²misr sāṅp kī tarah phunkārte hue pīchhe haṭ jāegā jab dushman ke faujī pūre zor se us par hamlā kareṅge, jab wuh lakkaṛhāroṅ kī tarah apnī kulhāṛiyāṅ pakaṛe hue us par ṭūṭ paṛeṅge.”

²³rab farmātā hai, “tab wuh misr kā jangal kāṭ ḍāleṅge, go wuh kitnā ghanā kyūṅ na ho. kyūṅki un kī tādād ṭiḍḍiyoṅ se zyādā hogī balki wuh anginat hoṅge.

²⁴misr beṭī kī be'izzatī kī jāegī, use shimālī qaum ke hawāle kiyā jāegā.”

²⁵rabb-ul-afwāj jo isrāīl kā ḳhudā hai farmātā hai, “maiṅ thības shahr ke dewatā āmūn, fir'aun aur tamām misr ko us ke dewatāoṅ aur bādshāhoṅ samet sazā dūṅgā. hāṅ, maiṅ fir'aun aur us par etimād rakhne wāle tamām logoṅ kī adālat karūṅga.”

²⁶rab farmātā hai, “maiṅ unheṅ un ke jānī dushmanoṅ ke hawāle kar dūṅgā, aur wuh shāh-e-bābal nabūkadnazzar aur us ke afsaroṅ ke qābū meṅ ā jāeṅge. lekin bād meṅ misr pahle kī tarah dubārā ābād ho jāegā.

²⁷jahāṅ tak terā tālluq hai, ai yāqūb mere ḳhādim, ḳhauf mat khā! ai isrāīl, hauslā mat hār! dekh, maiṅ tujhe dūrdarāz mulk se chhuṭkārā dūṅgā. terī aulād ko maiṅ us mulk se najāt dūṅgā jahāṅ use jilāwatan kiyā gayā hai. phir yāqūb wāpas ā kar ārām-o-sukūn kī zindagī guzāregā. koī nahīṅ hogā jo use haibatzadā kare.”

²⁸rab farmātā hai, “ai yāqūb mere ḳhādim, ḳhauf na khā, kyūṅki maiṅ tere sāth hūṅ. maiṅ un tamām qaumoṅ ko nest-o-nābūd kar dūṅgā jin meṅ maiṅ ne tujhe muntashir kar diyā hai, lekin tujhe maiṅ is tarah safhā-e-hastī se nahīṅ miṭāūṅgā. albattā maiṅ munāsib had tak terī tambīh karūṅga, kyūṅki maiṅ tujhe sazā die baġhair nahīṅ chhoṛ saktā.”