Read Roman Urdu Geo yarmiyāh 48 Bible Online

yarmiyāh 48 - Roman Urdu Geo bible

yarmiyāh 48

¹moāb ke bāre meṅ rabb-ul-afwāj jo isrāīl kā ḳhudā hai farmātā hai, “nabū shahr par afsos, kyūṅki wuh tabāh ho gayā hai. dushman ne qiryatāim kī behurmatī karke us par qabzā kar liyā hai. chaṭān ke qile kī ruswāī ho gaī, wuh pāsh pāsh ho gayā hai.

²ab se koī moāb kī tārīf nahīṅ karegā. hasbon meṅ ādmī us kī shikast kī sāzisheṅ karke kah rahe haiṅ, āo, ham moābī qaum ko nest-o-nābūd kareṅ. ‘ai madmīn, tū bhī tabāh ho jāegā, talwār tere bhī pīchhe paṛ jāegī.’

³suno! horonāim se chīḳheṅ buland ho rahī haiṅ. tabāhī aur baṛī shikast kā shor mach rahā hai.

⁴moāb chūr chūr ho gayā hai, us ke bachche zor se chillā rahe haiṅ.

⁵log rote rote lūhīt kī taraf chaṛh rahe haiṅ. horonāim kī taraf utarte rāste par shikast kī āh-o-zārī sunāī de rahī hai.

⁶bhāg kar apnī jān bachāo! registān meṅ jhāṛī kī mānind ban jāo.

⁷chūṅki tum moābiyoṅ ne apnī kāmyābiyoṅ aur daulat par bharosā rakhā, is lie tum bhī qaid meṅ jāoge. tumhārā dewatā kamos bhī apne pujāriyoṅ aur buzurgoṅ samet jilāwatan ho jāegā.

⁸tabāh karne wālā har shahr par hamlā karegā, ek bhī nahīṅ bachegā. jis tarah rab ne farmāyā hai, wādī bhī tabāh ho jāegī aur maidān-e-murtafā bhī.

⁹moāb par namak ḍāl do, kyūṅki wuh mismār ho jāegā. us ke shahr wīrān-o-sunsān ho jāeṅge, aur un meṅ koī nahīṅ basegā.

¹⁰us par lānat jo sustī se rab kā kām kare! us par lānat jo apnī talwār ko ḳhūn bahāne se rok le!

¹¹apnī jawānī se le kar āj tak moāb ārām-o-sukūn kī zindagī guzārtā āyā hai, us mai kī mānind jo kabhī nahīṅ chheṛī gaī aur kabhī ek bartan se dūsre meṅ unḍelī nahīṅ gaī. is lie us kā mazā qāim aur zāiqā behtarīn rahā hai.”

¹²lekin rab farmātā hai, “wuh din āne wālā hai jab maiṅ aise ādmiyoṅ ko us ke pās bhejūṅgā jo mai ko bartanoṅ se nikāl kar zāe kar deṅge, aur bartanoṅ ko ḳhālī karne ke bād pāsh pāsh kar deṅge.

¹³tab moāb ko apne dewatā kamos par yūṅ sharm āegī jis tarah isrāīl ko bait-el ke us but par sharm āī jis par wuh bharosā rakhtā thā.

¹⁴hāy, tum apne āp par kitnā faḳhr karte ho ki ham sūrme aur zabardast jangjū haiṅ.

¹⁵lekin duniyā kā bādshāh jis kā nām rabb-ul-afwāj hai farmātā hai ki moāb tabāh ho jāegā, aur dushman us ke shahroṅ meṅ ghus āegā. us ke behtarīn jawān qatl-o-ġhārat kī zad meṅ ā kar halāk ho jāeṅge.

¹⁶moāb kā anjām qarīb hī hai, āfat us par nāzil hone wālī hai.

¹⁷ai paṛos meṅ basne wālo, us par mātam karo! jitne us kī shohrat jānte ho āh-o-zārī karo. bolo, ‘hāy, moāb kā zordār asā-e-shāhī ṭūṭ gayā hai, us kī shān-o-shaukat kī alāmat ḳhāk meṅ milāī gaī hai.’

¹⁸ai dībon beṭī, apne shāndār taḳht par se utar kar pyāsī zamīn par baiṭh jā. kyūṅki moāb ko tabāh karne wālā tere ḳhilāf bhī chaṛh āegā, wuh tere qilāband shahroṅ ko bhī mismār karegā.

¹⁹ai aroīr kī rahne wālī, saṛak ke kināre khaṛī ho kar guzarne wāloṅ par ġhaur kar! apnī jān bachāne wāloṅ se pūchh le ki kyā huā hai.

²⁰tab tujhe jawāb milegā, ‘moāb ruswā huā hai, wuh pāsh pāsh ho gayā hai. buland āwāz se wāwailā karo! daryā-e-arnon ke kināre elān karo ki moāb ḳhatm hai.’

²¹maidān-e-murtafā par allāh kī adālat nāzil huī hai. haulūn, yahaz, mifāt,

²²dībon, nabū, bait-diblātāim,

²³qiryatāim, bait-jamūl, bait-maūn,

²⁴qariyot aur busrā, ġharz moāb ke tamām shahroṅ kī adālat huī hai, ḳhwāh wuh dūr hoṅ yā qarīb.”

²⁵rab farmātā hai, “moāb kī tāqat ṭūṭ gaī hai, us kā bāzū pāsh pāsh ho gayā hai.

²⁶use mai pilā pilā kar matwālā karo, wuh apnī qai meṅ loṭ-poṭ ho kar sab ke lie mazāq kā nishānā ban jāe. kyūṅki wuh maġhrūr ho kar rab ke ḳhilāf khaṛā ho gayā hai.

²⁷tum moābiyoṅ ne isrāīl ko apne mazāq kā nishānā banāyā thā. tum yūṅ use gāliyāṅ dete rahe jaise use chorī karte waqt pakaṛā gayā ho.

²⁸lekin ab tumhārī bārī ā gaī hai. apne shahroṅ ko chhoṛ kar chaṭānoṅ meṅ jā baso! kabūtar ban kar chaṭānoṅ kī darāṛoṅ meṅ apne ghoṅsle banāo.

²⁹ham ne moāb ke takabbur ke bāre meṅ sunā hai, kyūṅki wuh had se zyādā mutakabbir, maġhrūr, ghamanḍī, ḳhudpasand aur anāparast hai.”

³⁰rab farmātā hai, “maiṅ us ke takabbur se wāqif hūṅ. lekin us kī ḍīṅgeṅ abas haiṅ, un ke pīchhe kuchh nahīṅ hai.

³¹is lie maiṅ moāb par āh-o-zārī kar rahā, tamām moāb ke sabab se chillā rahā hūṅ. qīr-harāsat ke bāshindoṅ kā anjām dekh kar maiṅ āheṅ bhar rahā hūṅ.

³²ai sibmāh kī angūr kī bel, yāzer kī nisbat maiṅ kahīṅ zyādā tujh par mātam kar rahā hūṅ. terī koṅpleṅ yāzer tak phailī huī thīṅ balki samundar ko pār bhī kartī thīṅ. lekin ab tabāh karne wālā dushman tere pake hue angūroṅ aur mausam-e-garmā ke phal par ṭūṭ paṛā hai.

³³ab ḳhushī-o-shādmānī moāb ke bāġhoṅ aur khetoṅ se jātī rahī hai. maiṅ ne angūr kā ras nikālne kā kām rok diyā hai. koī ḳhushī ke nāre lagā lagā kar angūr ko pāoṅ tale nahīṅ raundtā. shor to mach rahā hai, lekin ḳhushī ke nāre buland nahīṅ ho rahe balki jang ke.

³⁴hasbon meṅ log madad ke lie pukār rahe haiṅ, un kī āwāz ilīālī aur yahaz tak sunāī de rahī hai. isī tarah zuġhar kī chīḳheṅ horonāim aur ijlat-shalīshiyāh tak pahuṅch gaī haiṅ. kyūṅki nimrīm kā pānī bhī ḳhushk ho jāegā.”

³⁵rab farmātā hai, “moāb meṅ jo ūṅchī jaghoṅ par chaṛh kar apne dewatāoṅ ko baḳhūr aur bāqī qurbāniyāṅ pesh karte haiṅ un kā maiṅ ḳhātmā kar dūṅgā.

³⁶is lie merā dil bāṅsrī ke mātamī sur nikāl kar moāb aur qīr-harāsat ke lie nohā kar rahā hai. kyūṅki un kī hāsilshudā daulat jātī rahī hai.

³⁷har sar ganjā, har dāṛhī munḍwāī gaī hai. har hāth kī jild ko zaḳhmī kar diyā gayā hai, har kamr ṭāṭ se mulabbas hai.

³⁸moāb kī tamām chhatoṅ par aur us ke chaukoṅ meṅ āh-o-zārī buland ho rahī hai.” kyūṅki rab farmātā hai, “maiṅ ne moāb ko bekār miṭṭī ke bartan kī tarah toṛ ḍālā hai.

³⁹hāy, moāb pāsh pāsh ho gayā hai! log zār-o-qatār ro rahe haiṅ, aur moāb ne sharm ke māre apnā muṅh ḍhāṅp liyā hai. wuh mazāq kā nishānā ban gayā hai, use dekh kar tamām paṛosiyoṅ ke roṅgṭe khaṛe ho gae haiṅ.”

⁴⁰rab farmātā hai, “wuh dekho! dushman uqāb kī tarah moāb par jhapaṭṭā mārtā hai. apne paroṅ ko phailā kar wuh pūre mulk par sāyā ḍāltā hai.

⁴¹qariyot qiloṅ samet us ke qabze meṅ ā gayā hai. us din moābī sūrmāoṅ kā dil dard-e-zah meṅ mubtalā aurat kī tarah pech-o-tāb khāegā.

⁴²kyūṅki moābī qaum safhā-e-hastī se miṭ jāegī, is lie ki wuh maġhrūr ho kar rab ke ḳhilāf khaṛī ho gaī hai.

⁴³ai moābī qaum, dahshat, gaṛhā aur phandā tere nasīb meṅ haiṅ.”

⁴⁴kyūṅki rab farmātā hai, “jo dahshat se bhāg kar bach jāe wuh gaṛhe meṅ gir jāegā, aur jo gaṛhe se nikal jāe wuh phande meṅ phaṅs jāegā. kyūṅki maiṅ moāb par us kī adālat kā sāl lāūṅgā.

⁴⁵panāhguzīn thakehāre hasbon ke sāy meṅ ruk jāte haiṅ. lekin afsos, hasbon se āg nikal āī hai aur sīhon bādshāh ke shahr meṅ se sholā bhaṛak uṭhā hai jo moāb kī peshānī ko aur shor machāne wāloṅ ke chāṅdoṅ ko nazar-e-ātish karegā.

⁴⁶ai moāb, tujh par afsos! kamos dewatā ke parastār nest-o-nābūd haiṅ, tere beṭe-beṭiyāṅ qaidī ban kar jilāwatan ho gae haiṅ.

⁴⁷lekin āne wāle dinoṅ meṅ maiṅ moāb ko bahāl karūṅga.” yih rab kā farmān hai. yahāṅ moāb par adālat kā faislā iḳhtitām par pahuṅch gayā hai.