Read Roman Urdu Geo yarmiyāh 49 Bible Online

yarmiyāh 49 - Roman Urdu Geo bible

yarmiyāh 49

¹ammoniyoṅ ke bāre meṅ rab farmātā hai, “kyā isrāīl kī koī aulād nahīṅ, koī wāris nahīṅ jo jad ke qabāilī ilāqe meṅ rah sake? malik dewatā ke parastāroṅ ne us par kyūṅ qabzā kiyā hai? kyā wajah hai ki yih log jad ke shahroṅ meṅ ābād ho gae haiṅ?”

²chunāṅche rab farmātā hai, “wuh waqt āne wālā hai ki mere hukm par ammonī dār-ul-hukūmat rabbā ke ḳhilāf jang ke nāre lagāe jāeṅge. tab wuh malbe kā ḍher ban jāegā, aur gird-o-nawāh kī ābādiyāṅ nazar-e-ātish ho jāeṅgī. tab isrāīl unheṅ mulk-ba-dar karegā jinhoṅ ne use mulk-ba-dar kiyā thā.” yih rab kā farmān hai.

³“ai hasbon, wāwailā kar, kyūṅki aī shahr barbād huā hai. ai rabbā kī beṭiyo, madad ke lie chillāo! ṭāṭ oṛh kar mātam karo! fasīl ke andar bechainī se idhar udhar phiro! kyūṅki malik dewatā apne pujāriyoṅ aur buzurgoṅ samet jilāwatan ho jāegā.

⁴ai bewafā beṭī, tū apnī zarḳhez wādiyoṅ par itnā faḳhr kyūṅ kartī hai? tū apne māl-o-daulat par bharosā karke sheḳhī mārtī hai ki ab mujh par koī hamlā nahīṅ karegā.”

⁵qādir-e-mutlaq rabb-ul-afwāj farmātā hai, “maiṅ tamām paṛosiyoṅ kī taraf se tujh par dahshat chhā jāne dūṅgā. tum sab ko chāroṅ taraf muntashir kar diyā jāegā, aur tere panāhguzīnoṅ ko koī jamā nahīṅ karegā.

⁶lekin bād meṅ maiṅ ammoniyoṅ ko bahāl karūṅga.” yih rab kā farmān hai.

⁷rabb-ul-afwāj adom ke bāre meṅ farmātā hai, “kyā temān meṅ hikmat kā nām-o-nishān nahīṅ rahā? kyā dānishmand sahīh mashwarā nahīṅ de sakte? kyā un kī dānāī bekār ho gaī hai?

⁸ai dadān ke bāshindo, bhāg kar hijrat karo, zamīn ke andar chhup jāo. kyūṅki maiṅ esau kī aulād par āfat nāzil kartā hūṅ, merī sazā kā din qarīb ā gayā hai.

⁹ai adom, agar tū angūr kā bāġh hotā aur mazdūr fasal chunane ke lie āte to thoṛā bahut un ke pīchhe rah jātā. agar ḍākū rāt ke waqt tujhe lūṭ lete to wuh sirf utnā hī chhīn lete jitnā uṭhā kar le jā sakte haiṅ. lekin terā anjām is se kahīṅ zyādā burā hogā.

¹⁰kyūṅki maiṅ ne esau ko nangā karke us kī tamām chhupne kī jagheṅ ḍhūnḍ nikālī haiṅ. wuh kahīṅ bhī chhup nahīṅ sakegā. us kī aulād, bhāī aur hamsāe halāk ho jāeṅge, ek bhī bāqī nahīṅ rahegā.

¹¹apne yatīmoṅ ko pīchhe chhoṛ de, kyūṅki maiṅ un kī jān ko bachāe rakhūṅgā. tumhārī bewāeṅ bhī mujh par bharosā rakheṅ.”

¹²rab farmātā hai, “jinheṅ mere ġhazab kā pyālā pīne kā faislā nahīṅ sunāyā gayā thā unheṅ bhī pīnā paṛā. to phir terī jān kis tarah bachegī? nahīṅ, tū yaqīnan sazā kā pyālā pī legā.”

¹³rab farmātā hai, “mere nām kī qasam, busrā shahr gird-o-nawāh ke tamām shahroṅ samet abadī khanḍarāt ban jāegā. use dekh kar logoṅ ke roṅgṭe khaṛe ho jāeṅge, aur wuh use lān-tān kareṅge. lānat karne wālā apne dushman ke lie busrā hī kā sā anjām chāhegā.”

¹⁴maiṅ ne rab kī taraf se paiġhām sunā hai, “ek qāsid ko aqwām ke pās bhejā gayā hai jo unheṅ hukm de, ‘jamā ho kar adom par hamlā karne ke lie niklo! us se laṛne ke lie uṭho!’

¹⁵ab maiṅ tujhe chhoṭā banā dūṅgā, ek aisī qaum jise dīgar log haqīr jāneṅge.

¹⁶māzī meṅ dūsre tujh se dahshat khāte the, lekin is bāt ne aur tere ġhurūr ne tujhe fareb diyā hai. beshak tū chaṭānoṅ kī darāṛoṅ meṅ baserā kartā hai, aur pahāṛī bulandiyāṅ tere qabze meṅ haiṅ. lekin ḳhwāh tū apnā ghoṅslā uqāb kī sī ūṅchī jaghoṅ par kyūṅ na banāe to bhī maiṅ tujhe wahāṅ se utār kar ḳhāk meṅ milā dūṅgā.” yih rab kā farmān hai.

¹⁷“mulk-e-adom yūṅ barbād ho jāegā ki wahāṅ se guzarne wāloṅ ke roṅgṭe khaṛe ho jāeṅge. us ke zaḳhmoṅ ko dekh kar wuh ‘taubā taubā’ kaheṅge.”

¹⁸rab farmātā hai, “us kā anjām sadūm, amūrā aur un ke paṛosī shahroṅ kī mānind hogā jinheṅ allāh ne ulṭā kar nest-o-nābūd kar diyā. wahāṅ koī nahīṅ basegā.

¹⁹jis tarah sherbabar yardan ke jangal se nikal kar shādāb charāgāhoṅ meṅ charne wālī bheṛ-bakriyoṅ par ṭūṭ paṛtā hai usī tarah maiṅ achānak adom par hamlā karke use us ke apne mulk se bhagā dūṅgā. tab wuh jise maiṅ ne muqarrar kiyā hai adom par hukūmat karegā. kyūṅki kaun merī mānind hai? kaun mujh se jawāb talab kar saktā hai? kaun sā gallābān merā muqābalā kar saktā hai?”

²⁰chunāṅche adom par rab kā faislā suno! temān ke bāshindoṅ ke lie us ke mansūbe par dhyān do! dushman pūre rewaṛ ko sab se nanhe bachchoṅ se le kar baṛoṅ tak ghasīṭ kar le jāegā. us kī charāgāh wīrān-o-sunsān ho jāegī.

²¹adom itne dhaṛām se gir jāegā ki zamīn thartharā uṭhegī. logoṅ kī chīḳheṅ bahr-e-qulzum tak sunāī deṅgī.

²²wuh dekho! dushman uqāb kī tarah uṛ kar adom par jhapaṭṭā mārtā hai. wuh apne paroṅ ko phailā kar busrā par sāyā ḍāltā hai. us din adomī sūrmāoṅ kā dil dard-e-zah meṅ mubtalā aurat kī tarah pech-o-tāb khāegā.

²³rab damishq ke bāre meṅ farmātā hai, “hamāt aur arfād sharmindā ho gae haiṅ. burī ḳhabreṅ sun kar wuh himmat hār gae haiṅ. pareshānī ne unheṅ us mutalātim samundar jaisā bechain kar diyā hai jo tham nahīṅ saktā.

²⁴damishq himmat hār kar bhāgne ke lie muṛ gayā hai. dahshat us par chhā gaī hai, aur wuh dard-e-zah meṅ mubtalā aurat kī tarah taṛap rahā hai.

²⁵hāy, damishq ko tark kiyā gayā hai! jis mashhūr shahr se merā dil lutfandoz hotā thā wuh wīrān-o-sunsān hai.”

²⁶rabb-ul-afwāj farmātā hai, “us din us ke jawān ādmī galiyoṅ meṅ gir kar rah jāeṅge, us ke tamām faujī halāk ho jāeṅge.

²⁷maiṅ damishq kī fasīl ko āg lagā dūṅgā jo phailte phailte bin-hasad bādshāh ke mahaloṅ ko bhī apnī lapeṭ meṅ le legī.”

²⁸zail meṅ qīdār aur hasūr ke baddū qabīloṅ ke bāre meṅ kalām darj hai. bād meṅ shāh-e-bābal nabūkadnazzar ne unheṅ shikast dī. rab farmātā hai, “uṭho! qīdār par hamlā karo! mashriq meṅ basne wāle baddū qabīloṅ ko tabāh karo!

²⁹tum un ke ḳhaimoṅ, bheṛ-bakriyoṅ aur ūṅṭoṅ ko chhīn loge, un ke ḳhaimoṅ ke pardoṅ aur bāqī sāmān ko lūṭ loge. chīḳheṅ sunāī deṅgī, ‘hāy, chāroṅ taraf dahshat hī dahshat’!”

³⁰rab farmātā hai, “ai hasūr meṅ basne wāle qabīlo, jaldī se bhāg jāo, zamīn kī darāṛoṅ meṅ chhup jāo! kyūṅki shāh-e-bābal ne tum par hamlā karne kā faislā karke tumhāre ḳhilāf mansūbā bāndh liyā hai.”

³¹rab farmātā hai, “ai bābal ke faujiyo, uṭh kar us qaum par hamlā karo jo alāhidagī meṅ pursukūn aur mahfūz zindagī guzārtī hai, jis ke na darwāze, na kunḍe haiṅ.

³²un ke ūṅṭ aur baṛe baṛe rewaṛ lūṭ kā māl ban jāeṅge. kyūṅki maiṅ registān ke kināre par rahne wāle in qabīloṅ ko chāroṅ taraf muntashir kar dūṅgā. un par chāroṅ taraf se āfat āegī.” yih rab kā farmān hai.

³³“hasūr hameshā tak wīrān-o-sunsān rahegā, us meṅ koī nahīṅ basegā. gīdaṛ hī us meṅ apne ghar banā leṅge.”

³⁴shāh-e-yahūdāh sidqiyāh kī hukūmat ke ibtidāī dinoṅ meṅ rab yarmiyāh nabī se hamkalām huā. paiġhām ailām ke mutālliq thā.

³⁵“rabb-ul-afwāj farmātā hai, ‘maiṅ ailām kī kamān ko toṛ ḍāltā hūṅ, us hathiyār ko jis par ailām kī tāqat mabnī hai.

³⁶āsmān kī chāroṅ simtoṅ se maiṅ ailāmiyoṅ ke ḳhilāf tez hawāeṅ chalāūṅgā jo unheṅ uṛā kar chāroṅ taraf muntashir kar deṅgī. koī aisā mulk nahīṅ hogā jis tak ailāmī jilāwatan nahīṅ pahuṅcheṅge.’

³⁷rab farmātā hai, ‘maiṅ ailām ko us ke jānī dushmanoṅ ke sāmne pāsh pāsh kar dūṅgā. maiṅ un par āfat lāūṅgā, merā saḳht qahr un par nāzil hogā. jab tak wuh nest na hoṅ maiṅ talwār ko un ke pīchhe chalātā rahūṅgā.

³⁸tab maiṅ ailām meṅ apnā taḳht khaṛā karke us ke bādshāh aur buzurgoṅ ko tabāh kar dūṅgā.’ yih rab kā farmān hai.

³⁹lekin rab yih bhī farmātā hai, ‘āne wāle dinoṅ meṅ maiṅ ailām ko bahāl karūṅga’.”